သဓီု၊ မေ ၁
ပ္ဍဲတွဵုရးဍုၚ်မန် ခရိုၚ်သဓီုဂှ် ပေါဲဗ္တိုက်ဒှ်ဟွံမွဲမွဲသာ် အပ္ဍဲဂိတုဨပရဴ ပွိုၚ်မွဲဂိတုဂှ် ဒပ်ကံၚ်ဇြဳပၞာန် ထောံမခတိုဟ် ဗ္တိုက်ကၠုၚ်ဒၟံၚ်ကဵုလွဟ်ဇၞော် သီုကဵုက္ၜၚ်ကျာတံဂှ်ရောၚ် တမ်ရိုဟ်ပရိုၚ်ဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်အမၠံက် စၟတ် ၃၁၀ မဒှ်ဒပ်သၟဝ်တဲကံၚ်ဇြဳပၞာန် ဖျေံသ္ဇိုၚ် ပ္ဍဲကွာန်လက်ပါန် ပွိုၚ်ဍုၚ်ဝဝ် ရးဗဂေါဂှ်ဝွံ ပေါဲဗ္တိုက်ဟၟဲမွဲသာ် ပန်ပှော်ဗ္တိုက်ကဵုဒၟံၚ်လွဟ်ဇၞော် ပ္ဍဲကွာန် အပ္ဍဲပွိုၚ်ဍုၚ်ကျာ်ထဝ် ခရိုၚ်သဓီုဂှ်ရ။
သ္အာၚ်နူဂှ်ပၠန် က္ၜၚ်ကျာကံၚ်ဇြဳပၞာန်တံလေဝ် ကၠုၚ်စိုပ်ထောံမခတိုဟ် ဗ္တိုက်ဒၟံၚ်မွဲဏှမွဲဏှဂှ်ရ ညးဍုၚ်ကွာန်ဒေသဂမၠိုၚ် မ္ၚးနူဇီုကပိုက်ချိုတ်အာဂှ် ဒးဂဗဒၟံၚ် သီုကဵုပရေၚ်လီုလာ်ဆောံလေၚ်တံရ။
ပဒိုဝ်သဝ်အေနာၚ် ညးအုပ်ကာ ခရိုၚ်သဓီု KNU ဂှ်တှ်ေ ပ္ဍဲကာလကံၚ်ဇြဳပၞာန် လလောၚ်တြးလဝ် ဒေါအ်ပန်ပှော်ဂှ် အပ္ဍဲခရိုၚ်သဓီုဂှ် ထောံမခတိုဟ်နကဵုက္ၜၚ်ကျာ၊ ပန်ကဵုလွဟ်ဇၞော်တံဂှ် ကၠောန်ကၠုၚ်ဒၟံၚ် အဆက်က်ရောၚ် ဟီုရ။
“နကဵုကံၚ်ဇြဳပၞာန် လလောၚ်တြးလဝ် ဒေါအ်ပန်ပှော် နူဂိတုဨပရဴ ၂ စဵုကဵု ၂၂ တုဲဂှ် ထပ်လလောၚ်တြးကၠုၚ် ဒေါအ်ပန်ပှော် နူစၟတ်တ္ၚဲ ၂၃ စဵုကဵု ၃၀ ရ။ အပ္ဍဲကာလ မလလောၚ်တြးလဝ်ဒေါအ်ပန်ပှော်ဂှ် ထောံဂြာတ်မံၚ်မခတိုဟ် နကဵုက္ၜၚ်ကျာ လ္တူဘာလကျာ်တံဂှ်ရ။ လ္ပာ်ပွိုၚ်ဍုၚ်ကျာ်ထဝ်ဂှ် ထောံမံၚ်မခတိုဟ် ပ္ဍဲကၠအ်ထၜိုတ်၊ တုဲတှ်ေ ပ္ဍဲကဵုကွာန်တံဂှ် ပန်ခ္ဍိုၚ်ဒၟံၚ်လွဟ်ဇၞော်ဂှ်နွံ။ ဆ္ဂး အပ္ဍဲကာလလလောၚ်တြးလဝ် ဒေါအ်ပန်ပှော်ဂှ် ဍေံတံ ဟွံဒေါအ်ဇူမွဲသာ် ကၠောန်ဒၟံၚ်အရာညးဍုၚ်ကွာန်တံ မဒးဖေက်ဂၟံက်တံဂှ်ရ“ သာ်ဝွံ သ္ဂးရ။
သ္အာၚ်နူဂှ်ပၠန် ဒၞါဲကံၚ်ဇြဳပၞာန် ဗ္တိုက်ပန်ပှော်ကဵုလွဟ်ဇၞော် ကဵုက္ၜၚ်ကျာတံဂှ်ဝွံ ဒှ်ဒၞါဲဂကောံဇြဟတ်ပၠန်ဂတးတံ နွံဟွံသေၚ်တုဲ ဒှ်ကွာန်ညးဒေသဂမၠိုၚ် မံၚ်တန်တဴတုဲ ကံၚ်ဇြဳပၞာန် ပန်ပှော်ဗ္တိုက်ကၠုၚ်ဒၟံၚ် ညးဍုၚ်ကွာန်တံ နကဵုတၚ်ရန်တၟံနွံနွံရောၚ် ညးဆက်ဟီုရ။
ညးဒေသမွဲတၠဂှ်တှ်ေ ဟိုတ်နူကံၚ်ဇြဳပၞာန် ဗ္တိုက်ကၠုၚ်ကဵုလွဟ်ဇၞော် သီုကဵုက္ၜၚ်ကျာတံဂှ်တုဲ ညးပါဲကၠုၚ်ဘဲပၞာန် လ္ပာ်လ္တူဍုၚ် နွံကၠုၚ်ကဵုလ္ၚီတုဲ နကဵုညးပါဲဘဲပၞာန်လၟုဟ်ဂမၠိုၚ် မံၚ်ဒၟံၚ် ပ္ဍဲဘာလကျာ်၊ ပ္ဍဲသ္ၚိ မကြပ်တံဂှ်တုဲ ဗီုပြေပြံၚ် ဒးမံၚ်စံၚ်စသုၚ်ဒၟံၚ်ရောၚ် ဟီုရ။
“ (ညးပါဲဘဲပၞာန်) ၜိုတ်လ္ၚီပြၚ် နွံဏောၚ် ထေၚ်ကေတ်ရ။ ပ္ဍဲဘာလကျာ်ဂှ်လေဝ် နွံ။ ပ္ဍဲဇြပ်သဘၚ်ဓဝ်ဂှ်လေဝ် နွံ။ ဗက်မံၚ် ဒၞါဲပြေပြံၚ်၊ ဒၞါဲသ္ၚိမကြပ်တံဂှ်ရ။ ဒှ်အခက်အခုဲဂှ်တှ်ေ ပရေၚ်စသုၚ်ရဏောၚ်။ ဒုၚ်ဒါန် နူပရဟိတ ညိညတုဲ ဒးဗ္စဒၟံၚ်ရ။ အရာမပါကၠုၚ်ပ္ဍဲညးတံလေဝ် စဒၟံၚ်ကီုရ။ ဗီုပြေပြံၚ်ဂှ် စသုၚ်ဒၟံၚ်အိုတ်ရ” သာ်ဝွံ သ္ဂးရ။
သ္အာၚ်နူဂှ်ပၠန် လၟိဟ်ညးပါဲဘဲပၞာန်လၟုဟ် ဂၠိုၚ်ကၠုၚ်ဗက် မ္ၚးနူဗၞိက်စၞစသုၚ်သ္ဇိုၚ်ဂှ် နွံပၟိက်ကၠုၚ်ဒၟံၚ် သီုကဵုဂဥုဲဇဗ ကေုာံ ကပေါတ်အရပ်စပ်ဂမၠိုၚ်တုဲ နွံပၟိက်ကၠုၚ်ဒၟံၚ် သီုကဵုအရီုဗၚ်ကာတၟေၚ်ဂမၠိုၚ်မာန်ရောၚ် ညးဆက်ဟီုရ။
အခိၚ်လၟုဟ် ကံၚ်ဇြဳပၞာန် လလောၚ်တြးလဝ် ဒေါအ်ပန်ပှော်ယာယဳကီုလေဝ် ဟိုတ်နူဗ္တိုက်ပန်ပှော်ဒၟံၚ်ကြာန်န် အရိုဟ်ဒဒှ်တ္ၚဲဂှ်တုဲ ပ္ဍဲကဵုကွာန်ဗွဲမဂၠိုၚ် မၞုံအပ္ဍဲခရိုၚ်သဓီုဂှ် နကဵုညးဒေသဂမၠိုၚ် ဟွံဂံၚ်မံၚ်ရတုဲ ဒးပါဲဒၟံၚ်ဘဲပၞာန်ရ။
ကံၚ်ဇြဳပၞာန်ဝွံ ပ္ဍဲကဵုကွာန် နူကဵုပွိုၚ်ဍုၚ်ကျာ်ထဝ်၊ ပွိုၚ်ဍုၚ်ၜဳကလေၚ် ကေုာံ ပွိုၚ်ဍုၚ်သဓီု နူအပ္ဍဲခရိုၚ်သဓီုတံဂှ် ဗွဲကြဴဏံ ပန်ပှော်ဒၟံၚ်လွဟ်ဇၞော် ထောံဂြာတ်မခတိုဟ် နကဵုပၞာန်ကျာတံဂှ် သာတုဲကၠောန်ကၠုၚ်ဂှ် တမ်ရိုဟ်ပရိုၚ်ပရေၚ်ပၞာန်ဂမၠိုၚ် ဟီုလဝ်ရ။
ပရိုၚ်−သြၚ်လောန်တိုၚ်(မ်)
ဗီု− CJ