မတ်မလီု၊ မေ ၁
ကံင်ဇြဳပၞာန် ရပ်စပ်ကၠုၚ်သၟတ်အဝဲစိုပ်တုဲတံ နဒဒှ်ဗျူဟာပၞာန်မွဲသာ်တုဲ ကဵုလုပ်ကၠုၚ်ပၞာန်ဂှ်ဝွံ ဒှ်အမှုရာဇဝတ် မကလိလောန် လ္တူဂကူမၞိဟ်တံဏောၚ်ဂှ် သ္ၚဳဂၠိပ်ဒၟံၚ်ရ။
သွက်ဂွံသောၚ်ကလး ပြဒ္ဒညာ ဇြဟတ်ကောန်ပၞာန်အောန်စှ်ေကၠုၚ်ဒၟံၚ် သိုက်က်ဂှ်ကဵု ပရေၚ်ဖျေံလွဟ်ပြံၚ်လ္ပာ်တံ ဂၠိုၚ်ကၠုၚ်ဂှ် ကံၚ်ဇြဳပၞာန်ဝွံ ရပ်စပ်ဒၟံၚ်သၞောဝ်ယိုက်လျိုၚ်ပၞာန် နဒဒှ်ဗျူဟာမွဲသာ်ရောၚ် NUG သ္ဂးရ။
ထ္မံက်ထ္ၜးလဝ် ပ္ဍဲကဵုလိက်ဒုၚ်စဳရေၚ် ဌာနဝန်ဇၞော်အခေါၚ်အရာမၞိဟ် အလဵုအသဳညဳသၟဟ်ဂကူ NUG မလလောၚ်ပ္တိတ်လဝ် ပ္ဍဲဂိတုဨပရဴ ၂၈ တေံ နကဵုက္ဍိုပ်လိက် “ပရေၚ်ကဵုယိုက်လျိုၚ်ပၞာန် ဗွဲအဓမ္မ− အကာဲအရာနတဲ ပရေၚ်မကဵုယိုက်လျိုၚ်ပၞာန် ဗွဲအနိၚ်အပိုၚ် ပ္ဍဲဍုၚ်ဗၟာ” ရ။
အတိုၚ်တၚ်နၚ် ဇာဇၞိက်သၟတ်ကောန်ဂကူ NYC ဂှ်မ္ဂး ပ္ဍဲကဵုလၟေၚ်ဒဒှ် ကော်ကဵုယိုက်လျိုၚ်ပၞာန် ဗွဲအဓမ္မ ၈၈၆ ဂှ် ပွမဓရတ်ကော်ကၠုၚ် ဗွဲအဓမ္မဂှ်ဝွံ နွံဒၟံၚ် ၅၆၀ ဂှ်ရ ၜိုတ် ၆၃ တၟံကၠံဂှ်ဝွံ ဒးဒုၚ်ကဵုလဝ်ဇြဟတ်ဓရိုဟ်ဏောၚ်ဂှ် သ္ဂးရ။
သၟတ်ညးမဂြိပ်တိတ်ကၠုၚ် နူဒဒှ်မပကောံကၠုၚ်ကောန်ပၞာန် ဗွဲအဓမ္မတအ်ဂှ် နကဵုကောန်ဍုၚ်ဇိုၚ်ဝုတ်ဒိုဟ်ဂမၠိုၚ် ဒုၚ်သ္ဇိုၚ်ကဵုမူဝါဒပရေၚ်ဗ္စာရဏာမၞိဟ်တုဲ သွက်ဂွံမၚ်မွဲကဵုဂှ် ဌာနဝန်ဇၞော်အခေါၚ်အရာမၞိဟ် NUG ဖ္တိုက်ဖ္အောဝ်လဝ်ရ။
နာဲအဲမန် ပရိုဝ်ဂရာမ်ဒါရိုက်တာ ဌာန်ဒတန်အခေါၚ်အရာမၞိဟ်ဍုၚ်မန်ဂှ်တှ်ေ သၞောဝ်ယိုက်လျိုၚ်ပၞာန်ဝွံ စကာဒၟံၚ်သၟတ်ဂမၠိုၚ် နဒဒှ်ဇွောံစဵုဒၞါပၞာန် ပ္ဍဲကဵုဒၞါဲဂစိုတ်မၞိဟ်ဂှ်တုဲ ဖံက်ပ္ကဝ်ဒၟံၚ် အခေါၚ်အရာမၞိဟ် မဂၠိုၚ်ဂၠေၚ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ဒှ်ဒၟံၚ်သၞောဝ် ရန်တၟံသွက်ဂွံရပ်စကာသၟတ် နဒဒှ်ဇွောံစဵုဒၞါပၞာန် အပ္ဍဲကဵုဒၞါဲဂစိုတ်မၞိဟ်တံဂှ်တုဲ သၞောဝ်ဏံဂှ် ဖံက်ပ္ကဝ်ဒၟံၚ် အခေါၚ်အရာမၞိဟ်တၟာဂလိုၚ်ဂှ် ပိုယ်တံ ဂွံညာတ်ကေတ် မံက်က်ထေၚ်ၚ်ရ။ အခေါၚ်ဗၠးၜး အခေါၚ်သ္ဂုတ်သွာတ် ဗွဲမဗၠးၜးတံသၟးဟွံကပုဟ်။ ပရေၚ်ဖံက်ပ္ကဝ် အဆက်လက္ကရဴ မထ္မံက်ကၠုၚ်ရုပ်ရဴ ဗွဲအနိၚ်အပိုၚ်တၞဟ်ဟ်တံ မပ္တံကဵု ဘပဠဂြောဝ်ဂတာ၊ ရပ်ဓရတ် ကော်ကေတ်အတေၚ်၊ အာတ်မိက်သြန် နကဵုနဲကဲ ဟွံဗဗွဲကဵုဓဝ်၊ မွဲလ္ပာ်ဂှ်ပၠန်လေဝ် ဗက်စအဂတိ၊ ဖံက်ပ္ကဝ်ဒၟံၚ် အခေါၚ်သၟတ်တအ်အာကၠုၚ် ဗွဲမဗၠးၜး မပါလုပ် သွက်ဂွံဂျိုၚ်လမျီု မံၚ်တန်တဴဂှ်လေဝ် ဝးပ္ကဝ်ဒၟံၚ်အခေါၚ်အရာ မဂွံကၠောန်ၜိုတ်စသုၚ်တံဂှ်တုဲတုဲဏောၚ်” သာ်ဝွံ သ္ဂးရ။
ကံၚ်ဇြဳပၞာန် ဖျေံစၟတ်ကၠုၚ်ကိုန်စဳမာန်တုဲ ရပ်ဒက်ဒၟံၚ်သၟတ်ဂမၠိုၚ် ပ္ဍဲကဵုသ္ၚိဒၟံၚ်၊ ပ္ဍဲကဵုကမၠောန် ကေုာံ ပ္ဍဲသၞေဟ်ကၚ်စၟဳတ်တံဂှ်လေဝ် ကၠောန်ဒၟံၚ်တုဲ နကဵုနဲကဲဘပဠ ကရေပ်ဓရတ် ကောန်သ္ၚိကၟိန်တံဂှ်လေဝ် ပကောံဒၟံၚ်ကောန်ပၞာန်ရ။
ပ္ဍဲကဵုသၟတ် ဒးဒုၚ်ပကောံကၠုၚ် သွက်ဂွံလုပ်ပၞာန်တံဂှ် ကောန်ၚာ်သၟတ် အာယုက်ဟွံပေၚ်ဏီတအ်၊ ညးလုပ်ယိုက်လျိုၚ်ပၞာန်ဟွံထေက် ညးစိုတ်ဓာတ်၊ ကာယဟွံခံၚ်တံလေဝ် ဒဒှ်ရပါလုပ်ဂှ် ဂွံဆဵုကေတ်ရောၚ် လိက်ဒုၚ်စဳရေၚ် NUG ထ္မံက်ထ္ၜးလဝ်ရ။
သ္အာၚ်နူဂှ်ပၠန် ကံက်ဒၟံၚ်စရၚ် ညးဗြဴဂမၠိုၚ် သွက်ဂွံလုပ်ပၞာန် ဗွဲအနိၚ်အပိုၚ်ဂှ်လေဝ် နွံဒၟံၚ်တုဲ ယဝ်အကာဲအရာဗလးပၞာန်တေံ သာပရေံကၠုၚ်မ္ဂး ညးဗြဴဂမၠိုၚ်ဝွံ ဒှ်ကၠုၚ်ပွန်မာန်ဏောၚ်ဂှ် စၟဳလဝ်ရ။
ညးချဳဒရာၚ်အခေါၚ်အရာမၞိဟ်ဂမၠိုၚ်ဂှ်တှ်ေ ဟိုတ်နူဒှ်ရာဇဝတ် မကလိလောန်ဒၟံၚ် လ္တူဂကူမၞိဟ်တံဂှ်တုဲ ဖံက်ပ္ကဝ်ဒၟံၚ် အခေါၚ်ဗၠးၜးပူဂဵု ကေုာံ အခေါၚ်သ္ဂုတ်သွာတ်တံဂှ်ရောၚ် ထံက်ထ္ၜးလဝ်ရ။
အတိုၚ်လိက်ဒုၚ်စဳရေၚ်ဂှ်မ္ဂး ညးဒးဒုၚ်ပကောံပကောန်ပၞာန် ဗွဲအဓမ္မဂမၠိုၚ်ဝွံ ဒးဒုၚ်ဓရတ် ဒးဒုၚ်စကာဒၟံၚ် ပ္ဍဲတန်ဗ္တောန်ပ္ကတ်ပ္ကေၚ် ပ္ဍဲဗလးမုက်ပၞာန်တေံသၟးဟွံက သီုဒးဒုၚ်ဍဵုဍိုက်ပျဲပျာံ ဒးဒုၚ်ကဵုလဝ်ဒုဟ်တံလေဝ် နွံဒၟံၚ်ရောၚ် ဂွံတီကေတ်ရ။
ကောန်တန်ဗ္တောန်ပၞာန်ဂမၠိုၚ်ဝွံ ဒးဒုၚ်ဖျေံလဝ်လျိုၚ်ပၞာန် သွက်ဂွံတိတ်ဗ္တိုက်ပၞာန် ပ္ဍဲမုက်ပၞာန်၊ သွက်ဂွံကေတ်တာလျိုၚ်ဂီုကၠီု၊ သွက်ဂွံကံက်အခေါန်ဖလှာ၊ သွက်ဂွံပသောၚ်မာၚ်၊ သွက်ဂွံဒုၚ်စကာ ပ္ဍဲအရာသိုၚ်ခၞံဒပ်ယာတံ မဒှ်ရ။
နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF ဂှ်တှ်ေ ပရေၚ်ပကောံကောန်ပၞာန်ဂှ်ဝွံ ဒှ်ကမၠောန်သုၚ်စောဲသၟတ်ဂမၠိုၚ် သွက်ဒတုဲဖဵုဒပ်ပၞာန်ဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ဍေံတံကၠောန်ဒၟံၚ်သာ်ဏံဂှ်ဝွံ ပြဝဒပ်ပၞာန်ဍုၚ်မွဲ Standard Army မွဲဂှ် သာ်လဵုမှဟွံသေၚ်ပုဟ်ဟီုဂှ် အလဵုဍေံတံ တီကီုလေဝ် ညံၚ်ဒတုဲဖဵုဍေံတံ ညံၚ်အဝဵုဍေံတံ ညံၚ်ပရေၚ်ပိုန်ဒြပ်ဂြောဝ်ဂတာဍေံတံ ဂွံခိုၚ်ဗိုန်အာဂှ် ရပ်စပ်စကာဒၟံၚ်သၟတ်တံ ညးဍုၚ်ကွာန်တံဂှ်ဏောၚ်ဂှ် နကဵုအဲ ညာတ်ကေတ်ရ” သာ်ဝွံ သ္ဂးရ။
လုပ်ပေါဲဗ္တိုက်ရပ်လွဟ် ကုသၞောတ်တၠအဝဵုပၞာန်ဂှ်မှဟေၚ် ထပိုတ်ရိုဟ်ကၞက် ဗ္တိုက်သၠေက်အာမာန်ဏောၚ်ဂှ်ရ နကဵုညးဍုၚ်ကွာန်ဂမၠိုၚ် သွက်ဂွံကၠုၚ်စိုပ်ပံၚ်တောဲကဵု ဂကောံပၠန်ဂတးတံ၊ သွက်ဂွံထံက်ပၚ်ကဵုအိုတ်ဂှ် နာဲနဂါ ဖ္တိုက်ဖ္အောဝ်လဝ်ရ။
အခိၚ်လၟုဟ်ဂှ်တှ်ေ နကဵုသၞောဝ်ယိုက်လျိုၚ်ပၞာန်ဂှ် ပံက်ကၠုၚ်လဝ် တန်ဗ္တောန်ကွတ်ပၞာန်သ္ဇိုၚ် စဵုကဵုလၟေၚ် ၁၂ တုဲ ပ္ဍဲကဵုမွဲမွဲလၟေၚ်ဂှ် ရန်လဝ် သ္ဂောံကော်အာ ကောန်တန်ဗ္တောန် ၅၀၀၀ ဂှ်ရ ညးသၟတ်ၜိုတ်တြဴဠက်ဝွံ ဒးဒုၚ်ဓရိုဟ်ပလံၚ်ဒၟံၚ် ပ္ဍဲပၞာန်ရ။
အတိုၚ်သၞောဝ်ယိုက်လျိုၚ်ပၞာန် ကံၚ်ဇြဳပၞာန် မစၞောန်ပျးလဝ်ဂှ်မ္ဂး ဇၟာပ်ကောန်ဍုၚ် နူအာယုက် ၁၈ စဵုကဵု ၃၅ ဂှ်ဝွံ ဟွံဒေါအ်ဟွံဂွံ ဒးလုပ်အာပၞာန် အောန်အိုတ် နူ ၂ သၞာံ စဵုကဵု ၅ သၞာံရ။ သ္အာၚ်နူဂှ်ပၠန် ညးမတၞီလုပ် အတိုၚ်နဲသၞောဝ်ဥပဒေတံဂှ်တှ်ေ ကၟာတ်လဒဵုလဝ် အခေါၚ်တိတ်ဍုၚ်သ္အာၚ်ရ။
အရာတံဏံဝွံ ကၟာတ်ကြိုၚ်လဝ်သၟတ်ဂမၠိုၚ် အပ္ဍဲဍုၚ်တုဲ နကဵုဗီုပြၚ်ဇွောံစဵုဒၞါပၞာန်ဂှ် ဒှ်သၞောဝ် မဒှ်ဆအစဳဇန် မပလံၚ်ဗစိုပ်ဒၟံၚ်သၟတ်ဂမၠိုၚ် အပ္ဍဲဒၞါဲဂစိုတ်မၞိဟ် သိုက်က်မွဲရောၚ် ညးချဳဒရာၚ်အခေါၚ်အရာမၞိဟ်ဂမၠိုၚ် ပါ်ပါဲလဝ်ရ။
ပရိုၚ်−သြၚ်လောန်တိုၚ်(မ်)
ဗီု− SAC Telegram