မုၚ်၊ မေ ၁
လ္ပာ်ကံၚ်ဇြဳပၞာန် လလောၚ်တြးလဝ်ဒေါအ်ပန်ပှော်ကီုလေဝ် ပ္ဍဲပွိုၚ်ဍုၚ်မုၚ် မဒှ်တိဍာ်အုပ်ဓုပ် ဗော်သွးကောန်ဂကူကရေၚ် KNU ဂှ် ဟိုတ်နူဗ္တိုက်ကဵုပၞာန်ကျာတုဲ ကောန်အရာပ်ပန်တၠ ချိုတ်တုဲ ၜါတၠ ကလိဂွံလဝ်ဝပ်ရောၚ် ပ္ဍဲဂိတုဨပရဴ ၃၀ တေံ KNU ဗဟဵု လလောၚ်ပ္တိတ်လဝ်ရ။
ဒပ်ကံၚ်ဇြဳပၞာန်ဝွံ ပ္ဍဲဂိတုဨပရဴ ၂၈ ဂှ် ပေါဲဗ္တိုက်ဟွံမွဲမွဲသာ် ပန်ပှော်ဗ္တိုက်ကၠုၚ် နူကဵုပၞာန်ကျာ လ္တူကွာန်မၞုံပ္ဍဲပွိုၚ်ဍုၚ်မုၚ် KNU ၁၁ ကွာန်ဂှ်တုဲ ညးဍုၚ်ကွာန်ကောန်အရာပ် ဇီုကပိုက်ချိုတ်အာ နွံလဝ်ရ။
ဟိုတ်နူပရေၚ်ဗ္တိုက်ကဵုပၞာန်ကျာဂှ်တုဲ ကိုဝ်တုၚ်ဇြဝ်ဥူ အာယုက် ၂၇ သၞာံ ဒၟံၚ်ကွာန်ယဲအေန် ပွိုၚ်ဍုၚ်မုၚ်၊ ဒဝ်ခိုၚ်ဝေန် ကေုာံ ဥူသုၚ်ယေန် အာယုက် ၅၀ သၞာံ ဒၟံၚ်ကွာန်ကညေန်တိုၚ် ကေုာံ ဒဝ်အိယှိုဲဝေန် အာယုက် ၄၄ သၞာံတအ် ဇီုကပိုက်ချိုတ်အာလဝ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
သ္အာၚ်နူဂှ်ပၠန် ကောန်ၚာ်သၟတ် အာယုက် ၂ သၞာံမွဲတၠ ဒၟံၚ်ကွာန်ကညေန်တိုၚ်ကဵု ဥူအံၚ်မျဵု အာယုက် ၅၃ သၞာံတံ ဇီုကပိုက်ကလိဂွံလဝ်ဝပ်တုဲ သ္ၚိပန်မ လီုလာ်အာလဝ်ရ။
အတိုၚ်စၟတ်သမ္တီ ဌာနဝန်ဇၞော်အခေါၚ်အရာမၞိဟ် အလဵုအသဳညဳသၟဟ်ဂကူ NUG ဂှ်မ္ဂး စနူအခိၚ်တိချဳတုဲ စဵုကဵုဂိတုဨပရဴ ၂၅ ဂှ် အလုံဍုၚ်မွဲ ဟိုတ်နူကံၚ်ဇြဳပၞာန် ဗ္တိုက်ကၠုၚ်ကဵုပၞာန်ကျာတုဲ ကောန်အရာပ် ၂၄၂ တၠ ဒးချိုတ်အာလဝ်တုဲ ညးကလိဂွံဝပ် နွံလဝ် ဗ္ဒါဲ ၄၀၀ ရ။
ပ္ဍဲရးသက်ကိုၚ်မွဲဓဝ် မဒးလဝ်ဘဲတိချဳ ဇၞော်ကဵုဇြဟတ်ဂှ် ပရေၚ်ဗ္တိုက်ကဵုပၞာန်ကျာဂှ် ဒှ်အာလဝ် ၅၂ ဝါတုဲ ညးမဒးပြဟ်လလုဲအာ ၈၀ တၠကဵု ညးကလိဂွံဝပ် စဵုကဵု ၁၂၁ တၠ နွံလဝ်ဂၠိုၚ်အိုတ်ရာၚ် ထ္မံက်ထ္ၜးလဝ်ရ။
ပရိုၚ်−သြၚ်လောန်တိုၚ်(မ်)
ဗီု−KPSN