ဍာ်ဗု၊ မေ ၄
ပ္ဍဲရးတၞၚ်သဳ ပွိုၚ်ဍုၚ်ဍာ်ဗု ပ္ဍဲကဵုကွာန်(စိန်ဘုံ)ဂှ် ကောန်သ္ဂံၚ်ဒပ်စဵုဒၞါညးဍုၚ်ကွာန် PDF မွဲတၠ မပါလုပ် ကောန်အရာပ်ပိတၠဂှ် ဒပ်ကံၚ်ဇြဳပၞာန် ရပ်ဒက်တုဲပြိုက်ဂစိုတ်လဝ်ရောၚ် ဂွံတီကေတ် ဇရေၚ်ကရောၚ်ပၞာန်ဒဝ်ဏရ။
တုဲကၠုၚ် ဂိတုမေ ၁ အခိၚ်ဇိုၚ်သဝ်တ္ၚဲ ၜိုတ် ၃ နာဍဳဂှ် ကောန်သ္ဂံၚ် PDF မွဲတၠကဵု ကောန်ကွာန်ၜါတၠ စဴကၠုၚ်နူရာန်ဇွောံမသွက်ဂကောံဒပ် နကဵုကွဳစက်ဂှ် အာဂဗကဵု ကၚ်ဒပ်ကံၚ်ဇြဳပၞာန် မၚ်တောပ်ဗ္တိုက်ဒၟံၚ် ပ္ဍဲကွာန်(စိန်ဘုံ) ဂှ်တုဲ ဒးဒုၚ်ရပ်ဒက်လဝ်ရ။
ဒပ်ကံၚ်ဇြဳပၞာန် ပန်ဂစိုတ်ထောံလဝ် ကောန်သ္ဂံၚ် PDF ကဵု ကောန်အရာပ်ၜါတၠ မဒးဒုၚ်ရပ်လဝ်ဂှ် ပ္ဍဲကဵုဒၞါဲဂှ်တုဲ ကွဳစက်ညးတံပိတၠ မဍိုက်ကၠုၚ်လဝ် မွဲဖ္ဍိုက်ဂှ်လေဝ် သီဏာလဝ်ရောၚ် သဝ်ဒါကိုဝ် သ္ကိုပ်ပြုပြေၚ်ပၞာန် ကရောၚ်ပၞာန်ဒဝ်ဏ ဗျူဟာ ၃၃ မဒှ်ကရောၚ်ပၞာန် PDF မွဲဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကောန်သ္ဂံၚ် PDF ဒးဒုၚ်ရပ်ဂစိုတ်လဝ်ဂှ်ဝွံ ဒှ်သ္ဂံၚ်နူဒပ်ဒဝ်ဏ ဒပ်စြေက် ၄ တုဲ ကောန်ကွာန်ၜါတၠဂှ်တှ်ေ ဒှ်ကောန်ကွာန်(ဘုရားသုံးဆူ) ပွိုၚ်ဍုၚ်ဍာ်ဗုရောၚ် သ္ဂးရ။
ပ္ဍဲထလဳဂရာမ်ချာန်နေဝ် ရဲထံက်ဂလာန်ဒပ်ပၞာန်တံဂှ်တှ်ေ ဟိုတ်နူညးဍုၚ်ကွာန်တံ ကဵုပရိုၚ်တုဲ ပန်ပသောၚ်ထောံလဝ် ကောန်ဒပ် PDF ပိတၠ ပ္ဍဲကွာန်(စိန်ဘုံ) ဂှ်တုဲ ညးဗြဴမွဲတၠ မဒှ်ကောန်ဂကောံဒပ် PDF ဂှ်လေဝ် ရပ်ဂွံလဝ်ရောၚ် ချူထ္မံက်ထ္ၜးလဝ် နွံဒၟံၚ်ရ။
ပ္ဍဲပွိုၚ်ဍုၚ်ဍာ်ဗုဂှ် စနူဂိတုဨပရဴ သတ္တာဟတတိယဂှ်တုဲ အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ ဂကောံဇြဟတ်ပၠန်ဂတးတံဂှ် ဒှ်ဒၟံၚ်ပေါဲဗ္တိုက်တုဲ လ္ပာ်ဒပ်ကံၚ်ဇြဳပၞာန်ဂှ်လေဝ် ထ္ပက်ဒၟံၚ်ကရောၚ်ပၞာန် နကဵုဇြဟတ်လၟိဟ်ဗွဲမဂၠိုၚ်ဂၠေၚ်တုဲ ပရေၚ်ပၞာန်ၜါလ္ပာ် ဆက်ကြံၚ်မ္ၚိုဟ်ဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု− SAC Telegram