ကအ်ကြိက်၊ မေ ၄
ပ္ဍဲပေါဲဗ္တိုက် ဗ္ဒါဲကအ်ကြိက်−ကြုၚ်ဒဵု တွဵုရးကရေၚ်ဂှ် မ္ၚးနူကဵုလွဟ်ဇၞော် နူဒပ်ကံၚ်ဇြဳပၞာန်ဂှ် သီုဗ္တိုက်ထောံကၠုၚ်မခတိုဟ်တံဂှ်တုဲ ကောန်အရာပ်ဇီုကပိုက်ချိုတ်တံ ဆက်သၠုၚ်တိုန်ကၠုၚ်ရောၚ် တမ်ရိုဟ်ပရိုၚ်ဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဗ္ဒါဲဍုၚ်ကအ်ကြိက်−ကြုၚ်ဒဵုဂှ် အခိၚ်ဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတး သၟဝ်သ္ကိုပ်သ္က KNLA တံ ဒှ်ဒၟံၚ်ပေါဲဗ္တိုက်သ္ကာတ်မြဟ်ဂှ် ဒပ်ကံၚ်ဇြဳပၞာန် ထောံကၠုၚ်မခတိုဟ်နကဵုက္ၜၚ်ကျာ လ္တူကွာန် မၞုံသ္ကုတ်သၠုၚ်ကျာကအ်ကြိက် ဒၞါဲပေါဲဗ္တိုက်ဟွံမွဲတံဂှ် အဆက်က်ရ။
ပ္ဍဲဂိတုဨပပရဴ ၂ အခိၚ်လဒေါဝ်တ္ၚဲ ၜိုတ် ၁ နာဍဳဝိုက်ဂှ်လေဝ် ဒပ်ကံၚ်ဇြဳပၞာန် ထောံဂြာတ်ကၠုၚ်မခတိုဟ် လ္တူကွာန်မွဲကွာန် နူကဵုသ္ကုတ်သၠုၚ်ကျာကအ်ကြိက်ဂှ် နကဵုက္ၜၚ်ကျာY12 တုဲ ဒတုံဗ္တိုဟ်ထ္ကးအာလဝ် လ္တူသ္ၚိညးပါဲဘဲပၞာန်တံ ဇူဒီုဒၟံၚ်ဂှ်တုဲ ကောန်ၚာ်သၟတ် အာယုက် ၅ သၞာံမွဲတၠ မပါလုပ် ကောန်အရာပ်ၜါတၠ ဇီုကပိုက်ကလိဂွံလဝ်ဝပ်တုဲ သ္ၚိဗ္ဒါဲ ၁၀ မလေဝ် လီုအာလဝ်ရ။
သ္အာၚ်နူဂှ်ပၠန် ပ္ဍဲဂိတုဨပရဴ ၁ တေံဂှ်လေဝ် ဒပ်ကံၚ်ဇြဳပၞာန် ဗ္တိုက်ထောံလဝ်မခတိုဟ် နကဵုက္ၜၚ်ကျာ ပ္ဍဲကဵုကွာန်ချံၚ်ဖျာကဵု ကွာန်(ကြာအၚ်းစု) မၞုံဗွဲဒိုဟ်ဨသာန် ဍုၚ်ကြုၚ်ဒဵုဂှ်တုဲ ကောန်အရာပ်ဇီုကပိုက်ဒး ဟွံမွဲကီုလေဝ် စမြိုၚ်သ္ၚိဒၟံၚ်လ္ၚဵု လီုလာ်အာလဝ်နွံရောၚ် ညးဒေသကြုၚ်ဒဵုဂမၠိုၚ် သ္ဂးရ။
အပ္ဍဲကာလပေါဲဗ္တိုက် ကအ်ကြိက်−ကြုၚ်ဒဵု စကၠုၚ်လဝ် ပ္ဍဲဂိတုဨပရဴ ၁၄ တေံဂှ် ဟိုတ်နူဒပ်ကံၚ်ဇြဳပၞာန် ဗ္တိုက်ကၠုၚ်ကဵုလွဟ်ဇၞော် ကေုာံ ပၞာန်ကျာတံဂှ်တုဲ ညးဍုၚ်ကွာန်ကောန်အရာပ် ၂၀ တၠပြၚ် ချိုတ်အာလဝ်တုဲ ညးမကလိဂွံလဝ်ဝပ် သၠုၚ်တိုန်ကၠုၚ် ဗ္ဒါဲ ၄၀ တၠဂှ် ဂွံတီကေတ် အတိုၚ်တၚ်လလောၚ်တြး ဂကောံပၠန်ဂတးတံကဵု တမ််ရိုဟ်ပရိုၚ်ဒေသဂမၠိုၚ်ရ။
ဟိုတ်နူပေါဲဗ္တိုက်ၜါလ္ပာ်တုဲ ညးပါဲဘဲပၞာန် ဂြိပ်ပါဲဒလေတ်ဒၟံၚ် လ္ပာ်ပွိုၚ်ဍုၚ်ကအ်ကြိက်ကဵု ပွိုၚ်ဍုၚ်ကြုၚ်ဒဵုတံဂှ် လၟိဟ်နွံ ကြပ်ဗ္ဒါဲမွဲကိုဋ်တုဲ ညးဍုၚ်ကွာန်ပါဲဘဲပၞာန်ဂမၠိုၚ်ဝွံ အခိၚ်လၟုဟ် နွံပၟိက်ဒၟံၚ်ကဵု အရီုဗၚ်ပရေၚ်ဗ္စာရဏာမၞိဟ် မပ္တံကဵုဇွောံမစၞစ၊ ဂဥုဲဇဗတံဂှ်ရောၚ် ဂွံတီကေတ် အတိုၚ်ဂလာန် ညးမရီုဗၚ်ရေၚ်တၠုၚ်ကဵုဒၟံၚ် ပရေၚ်ပါဲဒဴဘဲပၞာန်တံရ။
ပရိုၚ်−သြၚ်လောန်တိုၚ်(မ်)
ဗီု−KHRG