မတ်မလီု၊ မေ ၄
သွက်ဂွံပတုဲဗဒှ်ကၠေံ ပဋိပက္ခရပ်လွဟ် မ္ဒးဆေၚ်ဒၟံၚ်မုက်လၟုဟ်ဂှ်တုဲ သ္ဂုတ်သွာတ်လဝ် ပရေၚ်ဒေါအ်ပန်ပှော် နဗ္ၜတ်အလုံဍုၚ်မွဲ နဒဒှ်အစဳဇန်ထ္မံက်ရုပ်ရဴ အလန်ပထမကၠာအိုတ်ရောၚ် သ္ကိုပ်ဗိုလ်ဇၞော် သဝ်ကျဝ်ညောအ် ညးမၞုံအခေါၚ်ဟီုဂး ဂကောံမဟာမိတ်ဒေါအ်ပန်ပှော် ၇ ဂကောံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကောံဓရီုက္ဍိုက်ပ် မဟာမိတ်ဂကောံရပ်လွဟ်ကောန်ဍုၚ်အရၚ်ဒေါအ်ပန်ပှော် ၇ ဂကောံဂှ် ကၠောန်ဗဒှ်လဝ် နူကဵုလပှ်ကျာ အလန်စတုတ္ထ ပ္ဍဲဂိတုဨပရဴ ၂၉ ကဵု ၃၀ ဂှ်တုဲ သဳကၠဳသ္ဂုတ်သွာတ်လဝ် အစဳဇန်ပြံၚ်လှာဲလွေဟ် ဖေတ်ဒရာဒဳမဝ်ကရေဇြဳ မသုန်သာ်ရ။
ပ္ဍဲကဵုအစဳဇန်ဂမၠိုၚ်ဂှ် ဟွံပြဟ်ဒုၚ်သၞောတ်ဗ္ၜတ်စွံလဝ် ဂကောံဗော်သွးမဆေၚ်စပ်တံဂှ်တုဲ နကဵုဗ္ၜတ်အလုံဍုၚ်မွဲ သွက်ဂွံဒေါအ်ပန်ပှော်ဂှ် ကဵုလဝ်က္ဍိုပ်တုဲ သဳကၠဳအာ ကိစ္စစပ်ကဵုဖေဝ်ဒရာဒဳမဝ်ကရေဇြဳတံဏောၚ်ဂှ်ရ ညးမဆက်စပ်ဂမၠိုၚ် သွက်ဂွံဒစးဒုၚ်ကေတ်လဝ်ကတိကဝတ်တံဂှ်လေဝ် ပါလုပ်ရ။
သ္အာၚ်နူဂှ်ပၠန် သွက်ဂွံဒက်ဂကောံအလဵုအသဳ ကာလပြံၚ်လှာဲလွေဟ် ဖေဝ်ဒရာဒဳမဝ်ကရေဇြဳ၊ သွက်ဂွံချူခၞံသၞောဝ်သ္ဇိုၚ်ဒက်ပ္တန်ဖေဝ်ဒရာဒဳမဝ်ကရေဇြဳ ကေုာံ သွက်ဂွံကၠောန်ဗဒှ်ပေါဲရုဲမာဲ ဗွဲမဗဗွဲကဵုသၞောဝ်သ္ဇိုၚ်ဒက်ပ္တန် မမံက်ဂတဝ်ကၠုၚ်တံ ဒှ်တဴရ။
ပရေၚ်ဒေါအ်ပန်ပှော်ဗ္ၜတ်အလုံဍုၚ်မွဲဝွံ ဟိုတ်နူအကြေပ်အဂြတ်မ္ဒးဂဗဒၟံၚ်လၟုဟ်တံဂှ်တုဲ ယဝ်ကၠောန်အလန်ကိုပ်ကၠာအိုတ်မာန်မ္ဂး လ္တူအစဳဇန်ကမၠောန်မသှ်ေဒၟံၚ်တံဂှ်လေဝ် ဒှ်တဴအထံက်အပၚ်တၟာဂလိုၚ်မာန်ရောၚ် ညာတ်ကေတ်ရ။
ဟိုတ်ဂှ်ရ ကြဴနူကသဳတိဇၞော်ကဵုဇြဟတ် ချဳဇတဝ်အာလဝ်တုဲ အခိၚ်ဍုၚ်သ္အာၚ် ကေုာံ ဍုၚ်ဇိုၚ်ဝုတ်ဒိုဟ်ဂမၠိုၚ် စိုတ်လုပ်စကၠုၚ် ပ္ဍဲပရေၚ်ဍုၚ်ဗၟာဂၠိုၚ်ကၠုၚ်ဂှ် ကေတ်အခေါၚ်ခိုဟ်တုဲ ညံၚ်ဂွံဂွံပၞော်တိတ် နူအကြေပ်အဂြတ်ဂှ် ပ္တိတ်ဒၟံၚ်ဇြဟတ်ရောၚ် သ္ကိုပ်ဗိုလ်ဇၞော် သဝ်ကျဝ်ညောအ် ဟီုရ။
“ပြဟ်ဟ်ဏံ ဍုၚ်ဇိုၚ်ဝိုတ်ဒိုဟ်ပိုယ်တံကီု ဍုၚ်သ္အာၚ်နူသ္ၚောဲသ္ၚောဲဂမၠိုၚ်တံဂှ်ကီု ၜတ်ကဵုကၠာတေံမ္ဂး စိုတ်လုပ်စကၠုၚ်ညိညရ။ ပရေၚ်ပံၚ်တောဲရေၚ်တၠုၚ်တံဂှ်လေဝ် အခိၚ်ဂွံညာတ်ဂၠိုၚ်ကၠုၚ်ဂှ် ကေတ်အခေါၚ်ခိုဟ်တုဲ ဂွံဂွံပၞော်တိတ် ပ္ဍဲအကြေပ်အဂြတ် ပဋိပက္ခရပ်လွဟ်ပိုယ်တံ အလုံဍုၚ်မွဲ မ္ဒးဂဗဒၟံၚ်ဂှ် နကဵုပိုယ်တံ ပံၚ်တောဲကေတ် ဇြဟတ်ဍုၚ်သ္အာၚ်ကီု ဇြဟတ်ပိုယ်တံကီုတုဲ ယဝ်ရုန်ဂ္စါန်အာမ္ဂး ဂွံကၠုၚ်ပၞော်တိတ်မာန်ဟာဟွံတီ နကဵုပိုယ်တံ မိက်ဂွံကဵုဒှ်ဇြဟတ်ညိည နူကဵုသၟဝ်အကာဲအရာ မကြေပ်ဂြတ်ဒၟံၚ်ဏံဂှ်ရ” သာ်ဝွံ သ္ဂးရ။
အစဳဇန်ပြံၚ်လှာဲလွေဟ် ဖေဝ်ဒရာဒဳမဝ်ကရေဇြဳ မသုန်သာ်ဂှ်ဝွံ ကလေၚ်ဒုၚ်သ္ဇိုၚ်ကဵု ဂလာန်ပ္တိုန်စပ်ကဵုဗီုတိထ္ၜးဂၠံၚ်ပရေၚ်ဍုၚ်ကွာန် နူကဵုဂကောံက္ဍိုက်ပ်လၟေၚ်ကမၠောန်ပရေၚ်ၜိုဟ်လလမ် PPST ကၠာတေံဂှ်တုဲ ညံၚ်ဂွံကိတ်ညဳကဵု အကာဲအရာပရေၚ်ဍုၚ်ကွာန်လၟုဟ်ဏံဂှ် သ္ဂုတ်သွာတ်လဝ်ရောၚ် ဟီုရ။
ဂွံထ္မံက်ရုပ်ရဴ အစဳဇန်မသုန်သာ်မာန်ဂှ် ကေတ်အဆက်ကဵု ဂကောံဇြဟတ်ပရေၚ်ဍုၚ်ကွာန် ဗော်ပရေၚ်ဍုၚ်ကွာန် မၞုံအပ္ဍဲဍုၚ် မဆက်ဆောံဒၟံၚ်ကဵု ဂကောံမဟာမိတ်ဒေါအ်ပန်ပှော် ၇ ဂကောံတံ၊ ဂကောံဗော်သွးဍုၚ်သ္အာၚ်၊ ဂကောံအလဵုအသဳဍုၚ်သ္အာၚ်တံဂှ်တုဲ ကဵုသမ္တီသောၚ်ကလးအာ မွဲကဆံၚ်တုဲမွဲကဆံၚ်ဏောၚ်ဂှ် သ္ဂးရ။
သ္အာၚ်နူဂှ်ပၠန် ညံၚ်ဂွံဆက်ဆောံ ကုဂကောံရပ်လွဟ်ကောန်ဍုၚ်အရၚ်တၞဟ်ဟ်တံမာန်ဂှ်လေဝ် ပ္တိတ်အာဇြဟတ်ဏောၚ်တုဲ စပ်ကဵုအစဳဇန်ကမၠောန် မထ္မံက်အာရုပ်ရဴ အပ္ဍဲဂကောံတံဂှ်တုဲလေဝ် ဂၠါဲဂၠံၚ်ပ္ညဳပ္ညပ်အာဏောၚ် သ္ကိုပ်ဗိုလ်ဇၞော် သဝ်ကျဝ်ညောအ် သောၚ်ထ္ၜးလဝ်ရ။
ဒံက်တာသာၚ်ကျဳဇြေန်သဵု ညးလ္ၚတ်သ္ၚဳဂၠိပ်ပရေၚ်ဍုၚ်ဗၟာဂှ်တှ်ေ အကာဲအရာလၟုဟ်ဏံဂှ် ဂကောံဒေါအ်ပန်ပှော် ၇ ဂကောံကဵု ဂကောံရပ်လွဟ်ကောန်ဍုၚ်အရၚ်တၞဟ်ဟ်တံဂှ်ဝွံ ဗီုပြၚ်ဟွံတုပ်သၟဟ်ညးသ္ကအ်ရတုဲ ဂကောံမဆေၚ်စပ်ဂမၠိုၚ်လေဝ် ဂၠိုၚ်ကၠုၚ်ဂှ်ရ ဗီုပြၚ်ချပ်လေဝ် ဟွံတုပ်ရပုဟ်ဂှ် သ္ၚဳဂၠိပ်လဝ်ရ။
“7 EAO Alliance ဂှ်တှ်ေ အကြာညးတံရဂှ် ဒးပ္ညဳပ္ညပ်ဒၟံၚ်တၟာလှ်ေဏီဏောၚ်။ မွဲပၠန်ဂှ် ကရောံ 7 EAO Alliance ဏံဂှ် EAO ERO သှ်ေတံဂှ်တှ်ေ ဗီုပြၚ်ညးတံ ဟွံတုပ်ပုဟ်ဂှ် ဂွံဆဵုကေတ်ဏောၚ်။ ဗွဲတၟေၚ် ဟိုတ်နူပရေၚ်ပၞာန် Northern Alliance တုဲ အကာဲအရာမပြံၚ်လှာဲအာတံဂှ်ကီု မွဲပၠန်ဂှ် ဂကောံရပ်လွဟ် ဂၠိုၚ်တိုန်ကၠုၚ် ပ္ဍဲဒေသအညာတေံ ဟွံသေၚ်မ္ဂး ဂကောံပၠန်ဂတးဂမၠိုၚ်။ အေ ဂှ်တှ်ေ State Holder ပရေၚ်ဍုၚ်ကွာန်တံဂှ် ဂၠိုၚ်အာကွေံကွေံယျ။ ဟိုတ်ဂှ်ရ ဂၠံၚ်တရဴပရေၚ်ဍုၚ်ကွာန် မိက်ဂွံအာဒၟံၚ်လၟုဟ်တံဂှ်တှ်ေ ၜိုန်ကြပ်တုပ်ဒၟံၚ်ကဵု တၚ်မသုန်သာ်ဏံကီုလေဝ် မလဵုကၠောန်ကၠာရောဟီုဂှ် ဗီုပြၚ်ချပ်ညးသ္ကအ်တံဂှ်လေဝ် ဟွံတုပ်ပုဟ်ဂှ် အဲဂွံညာတ်ကေတ်ဒၟံၚ်ညိညရ” သာ်ဝွံ သ္ဂးရ။
ပ္ဍဲကဵုလၟေၚ်ကမၠောန် မပ္တံကဵုပရေၚ်ကယျာန်ဓဝါတ်စပ်ကဵုတိဍာ်၊ ပရေၚ်မဆက်စပ်ကဵုဒတုဲဖဵု ကေုာံ ပါလုပ်သီုကဵုကိစ္စမသ္ပသ္ဇိုၚ်ကဵုပရေၚ်ဂကူတံဂှ် ပ္ဍဲမွဲမွဲပရေၚ်ဂှ် ညးမဆေၚ်စပ်ဂမၠိုၚ် ပါလုပ်ဒၟံၚ် ဒဵုဗၞတ်ၜိုတ်လဵုတုဲ သဳကၠဳပ္ညဳအာ ဗွဲမကၠးဖ္ဍးမာန်ဟာဟီုဂှ် ပၟိက်ဇၞော်ရောၚ် ညးထံက်ထ္ၜးလဝ််ရ။
ဟိုတ်ဂှ်ရ ကုအစဳဇန်ပြံၚ်လှာဲလွေဟ် ဖေဝ်ဒရာဒဳမဝ်ကရေဇြဳ မွဲတုဲမွဲဂှ် နကဵုအစာံသၞောဝ်သၞောတ်ဗီုပြၚ်သာ်လဵု ပ္ညဳအာရောဟီုဂှ် ဒးသဳကၠဳလှဲလှဲလးလးဏောၚ်ဂှ် ဒံက်တာသာၚ်ကျဳဇြေန်သဵု ဟီုလဝ်ရ။
ပ္ဍဲကဵုဂကောံမဟာမိတ်ဒေါအ်ပန်ပှော် ၇ ဂကောံဂှ် ကံၚ်ဇြဳကလေၚ်ဒက်ပ္တန်ဍုၚ်သေံ RCSS ၊ ဗော်ဍုၚ်မန်တၟိ NMSP ၊ ဗော်ဗၠးၜးဍုၚ်ရခေၚ် ALP ၊ ဒပ်ပၞာန်ဒတုဲဖဵုဒဳမဝ်ကရေဇြဳကရေၚ် DKBA ၊ ကံၚ်ဇြဳပရေၚ်ၜိုဟ်လလမ်ကရေၚ် KNU/KNLA-PC ၊ ဗော်သွးဒဳမဝ်ကရေတ်တေတ်လာဟူ LDU ကဵု ဂအုပ်ဂကောံဗၠးၜးကောန်ဂကူပအိုဝ် PNLO-NCA/S တံ ပါလုပ်ရ။
ပရိုၚ်−သြၚ်လောန်တိုၚ်(မ်)
ဗီု−7EAOs