မတ်မလီု၊ မေ ၄
အပ္ဍဲကာလကံၚ်ဇြဳပၞာန်သီလဝ်အဝဵု ပွိုၚ် ၄ သၞာံဏံ အကာဲအရာအခေါၚ်ဗၠးၜး ပရိုၚ်မဳဒဳယျာဍုၚ်ဗၟာဝွံ ပရေံစှ်ေဒၟံၚ် ဗွဲမလောန်ရောၚ် UK in Myanmar လလောၚ်ပ္တိတ်လဝ် ပ္ဍဲတ္ၚဲအခေါၚ်ဗၠးၜးပရိုၚ်ဂၠးကဝ် ပ္ဍဲဂိတုမေ ၃ ဂှ်ရ။
ဍုၚ်ဗမာလၟုဟ်ဝွံ လ္တူဂၠးတိဏံ ဒှ်ဒၟံၚ်ဍုၚ် ရပ်ထိၚ်လဝ် သၟာပရိုၚ် မရနုက်ကဵုဒုတိယဂၠိုၚ်အိုတ်တုဲ အတိုၚ်ဗ္ၜတ်အခေါၚ်အရာဗၠးၜးပရိုၚ်ဂၠးကဝ် သၞာံ ၂၀၂၅ နူကဵုဂကောံသၟာပရိုၚ်ဟွံပိုၚ်ခြာပယျဵုဒၞက် မလလောၚ်ပ္တိတ်လဝ်ဂှ်မ္ဂး ပ္ဍဲကဵုဍုၚ်မၞုံ ၁၈၀ ဂှ် ဍုၚ်ဗၟာဝွံ စိုပ်ဒၟံၚ်ကဆံၚ် ၁၆၉ ရောၚ် သ္ဂးရ။
သ္အာၚ်နူဂှ်ပၠန် ပွမဆက်ကၟာတ်လဒဵုလဝ် အေန်တာနိတ်ဂှ်ဝွံ ပ္ဍဲအရာပကောံပကေဝ်တၚ်နၚ် သွက်ဂွံဒှ်အထံက်အပၚ် ပရေၚ်ဗ္စာရဏာမၞိဟ်ဂှ် က္တဵုဗဒှ်ကဵု ပရေၚ်လဇုဲလဇတုဲ ဒၞါဲရေၚ်တၠုၚ် ဂွံခၠေဝ်ကၠုၚ်လ္တူဘဲတိချဳ မွဲဒမြိပ်အခိၚ်ဂှ်လေဝ် ဒှ်တဴတၚ်ဆိုအ်ဗရောၚ် UK in Myanmar လလောၚ်ပ္တိတ်လဝ်ရ။
နကဵုကဏ္ဍမဳဒဳယျာဂမၠိုၚ် ဒးနွံကဵုအခေါၚ်ထ္မံက်ပ္တိတ်ပရိုၚ် ဗွဲမဗၠးၜးဏောၚ်တုဲ နကဵုအလဵုအသဳယူကေ စပ်ကဵုညးဍုၚ်ကွာန်ဂမၠိုၚ် က္ဍပရိုၚ်ဟွံစိုပ်ဂှ်တုဲ ဟီုဗျိပၠုတ်လဝ် ပရေၚ်ဒပ်ပၞာန်ဗၟာ မဍဵုဍိုက်ဒၟံၚ်တံဂှ်တုဲ အာတ်မိက်လဝ် သွက်ဂွံကလေၚ်ဗလးကဵု သၟာပရိုၚ်မဒးရပ်ထိၚ်လဝ်သီုဖအိုတ်ရ။
ဥူတိုဝ်ဇြဝ်လာတ် ညးအုပ်ကာကံၚ်ဇြဳပရိုၚ်မဳဒဳယျာဗၠးၜး ဍုၚ်ဗၟာ IPCM ဂှ်တှ်ေ ဗ္ၜတ်အခေါၚ်ဗၠးၜးမဳဒဳယျာတံဂှ်ဝွံ ကြဴနူသီအဝဵုတုဲဂှ် စှ်ေကၠုၚ်တုဲ ဒၞါဲကေတ်ပရိုၚ်တံဂှ်လေဝ် မ္ၚးနူကံၚ်ဇြဳပၞာန်ဂှ် ဒၞါဲပဋိပက္ခဒှ်တံဂှ်လေဝ် ဒးဒုၚ်ကၟာတ်လဒဵုလဝ် အခေါၚ်ကေတ်ပရိုၚ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ ကၠာဟွံဂွံသီအဝဵု သၞာံ ၂၀၂၁ ဏံဂှ် ဗ္ၜတ်အခေါၚ်ဗၠးၜးပရိုၚ်မဳဒဳယျာဍုၚ်ဗမာဂှ် နွံ ၁၃၉ ၊ ပိုယ်တံ နွံကၠုၚ်လဝ် စၟတ် (၃၀) ပြၚ်ရ။ နူအကာဲအရာဏံဂှ် အပ္ဍဲပွိုၚ်မသုန်သၞာံ အခေါၚ်ဗၠးၜးပရိုၚ်မဳဒဳယျာတံဂှ်ဝွံ ဒှ်အာကဆံၚ်ပရေံပရေံရ။ ပိုယ်တံ ကေတ်ပရိုၚ် ဗၠးဗၠးၜးး ဟွံဂွံပုဟ်။ သၟဝ်ကံၚ်ဇြဳပၞာန်သၟးဟွံသေၚ်ပုဟ်၊ ဒၞါဲလ္ၚဵု ဗွဲတၟေၚ် ပ္ဍဲဒၞါဲဒှ်ဒၟံၚ်ပဋိပက္ခတံဂှ်လေဝ် ကဵုက္ဍိုပ်ကဵုပရေၚ်ဂီုကၠီုလ္ပာ်ပၞာန်တုဲ ဒးဂဗဒၟံၚ်ကဵု အကာဲအရာ မကၟာတ်လဒဵုလဝ် အခေါၚ်ကေတ်ပရိုၚ်တံဂှ်ရ။ ပါလုပ်ဒၟံၚ် ပ္ဍဲကဵုဍုၚ် ဒးဒုၚ်ဖံက်ပ္ကဝ်အခေါၚ်အရာမဳဒဳယျာ မဒးမၚ်ရံၚ်တံဂှ်ရ” သာ်ဝွံ သ္ဂးရ။
သ္အာၚ်နူဂှ်ပၠန် အခိၚ်လၟုဟ် မ္ၚးနူအခေါၚ်ပရိုၚ်ဗၠးၜးဟွံမွဲဂှ် သီုကဵုဒးဒုၚ်ကၟာတ်လဒဵုလဝ် ပရေၚ်ပရိုၚ်မဂေတ်ဂြိပ်တံဂှ်တုဲ နကဵုညးဍုၚ်ကွာန်ဂမၠိုၚ် အခိၚ်ဒှ်ဘဲအန္တရာယ် ညံၚ်ရဴဘဲသဘာဝတံဂှ် ဟိုတ်နူကလေၚ်ခၠေဝ်ပလန်ကၠုၚ်လွာဲဂှ်ဟွံမွဲတုဲလေဝ် ပရေၚ်ဒးဂိဒၟံၚ်တံ နွံဒၟံၚ်ရောၚ် ဥူတိုဝ်ဇြဝ်လာတ် ဆက်ဟီုရ။
သၟာပရိုၚ်မွဲတၠဂှ်တှ်ေ ကြဴနူကံၚ်ဇြဳပၞာန်သီအဝဵုတုဲ ဒၞါဲကေတ်ပရိုၚ်တံဂှ် ဂွံအာကေတ်ပရိုၚ် စဵုကဵုဗလးတိဂှ် အခက်အခုဲနွံကၠုၚ်တုဲ ဒၞါဲကေတ်ပရိုၚ်တံဂှ်လေဝ် ဟိုတ်နူကံၚ်ဇြဳပၞာန် စၟဳတ်ဒၟံၚ်တံ နွံတုဲ ဟွံဒးကဵုအခိုက်မ္ဂး ဒးဒုၚ်ရပ်မာန်ရောၚ် ဟီုရ။
“ကြဴနူသီအဝဵုတုဲဏံ သၟာပရိုၚ်ဗွဲမဂၠိုၚ်ဂှ်တှ်ေ ဒှ်ဒၟံၚ်အခက်အခုဲအိုတ်ရ။ အဓိကဂှ်တှ်ေ ဂွံအာစိုပ် စဵုကဵုဗလးတိ စဵုကဵုတမ်ရိုဟ်ပရိုၚ်တံဂှ် အခက်အခုဲနွံဒၟံၚ်ဏောၚ်။ ယဝ်ပိုယ်တံအာ ဒၞါဲလ္ၚဵုတံဂှ်မ္ဂး ကံၚ်ဇြဳပၞာန် စၟဳတ်ဒၟံၚ်နွံဏောၚ်။ ဟွံဒးကဵုအခိုက်မ္ဂး ပိုယ်တံ ဒးဒုၚ်ရပ်မာန်ဏောၚ်။ ဂွံဂွံပရိုၚ်မဍာံပြဂှ် ပိုယ်တံ ဒးဂဗဒၟံၚ်ကဵုအကာဲအရာ မခက်ခုဲတံ တၟာဂလိုၚ်ရ” သာ်ဝွံ သ္ဂးရ။
ဒၞါဲကေတ်ပရိုၚ်ဗလးတိလၟုဟ်ဂှ် ၜိုတ်သၟာပရိုၚ် တြးကဵုဝါဒ သွက်ကံၚ်ဇြဳပၞာန်တံသၟးရ ကေတ်ပရိုၚ်ဂွံတုဲ ညးဍုၚ်ကွာန်ဂမၠိုၚ် ဟွံဂွံပရိုၚ်ဍာံစၟတ်တံဂှ်တုဲ ဟိုတ်နူရပ်ဒက်ဒၟံၚ် သၟာပရိုၚ် မချူဇန်ပရိုၚ်ဍာံတံဂှ်တုဲလေဝ် ဟွံဂွံပရိုၚ်ဗၠးၜးတံရပုဟ်ဂှ် ညးဆက်ဟီုရ။
ကံၚ်ဇြဳပရိုၚ်မဳဒဳယျာဗၠးၜးဍုၚ်ဗၟာ IPCM ဂှ်တှ်ေ ကြဴနူသီအဝဵုတုဲ ကံၚ်ဇြဳပၞာန် ရပ်ဖျေံကၠုၚ်ထံၚ် အ္စာပရိုၚ်ဂမၠိုၚ် ဟွံဗဗွဲကဵုသၞောဝ်ဂှ်ကီု၊ ဂစိုတ်ဂယိုၚ်ကၠုၚ်ကီု အ္စာပရိုၚ်လ္ၚဵုတံဝွံ ဒဵုကဵုအခိၚ်လၟုဟ် ဒးဒၟံၚ်ထံၚ် ပ္ဍဲကဵုထံၚ်နာနာတံဖိုဟ်ဂှ် လလောၚ်ပ္တိတ်လဝ်ပရိုၚ်ရ။
သ္အာၚ်နူဂှ်ပၠန် နူစကံၚ်ဇြဳပၞာန်သီအဝဵု သၞာံ ၂၀၂၁ ဂိတုဖေဖဝ်ဝါရဳ ၁ စဵုကဵုသၞာံ ၂၀၂၅ ဂိတုမေ ၃ ဂှ် ဒးဒုၚ်ရပ်ဒက်ကၠုၚ် ဟွံဗဗွဲကဵုသၞောဝ်တုဲ သၟာပရိုၚ်မဳဒဳယျာ ဒးဒၟံၚ်ထံၚ်လၟုဟ်ဂှ် နွံ ၄၀ တၠတုဲ အပ္ဍဲကာလသီအဝဵုဏံ ညးမဒးချိုတ်အာ အပ္ဍဲကမၠောန်ပရိုၚ်မဳဒဳယျာတံဂှ် စဵုကဵု ၇ တၠ နွံရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media