ဘာအၚ်၊ မေ ၉
ဟိုတ်နူပရေၚ်ပၞာန် နူဒပ်ပံၚ်ကောံပၠန်ဂတး သၟဝ်သ္ကိုပ်သ္က KNLA တံဂှ်တုဲ ဒပ်ကံၚ်ဇြဳပၞာန် မဒးဂိဒၟံၚ်ဂှ်ဝွံ လ္တူဍုၚ်ကြုၚ်ဒဵုသၟးဟွံက ပ္ဍဲကဵုဒၞါဲ ဗ္ဒါဲဍုၚ်ဘာအၚ်တံဂှ်လေဝ် ပလေဝ်ဒၟံၚ်ပၞာန်ဒုၚ်တုဲ ချဳဒရာၚ်ကၠုၚ်ဒၟံၚ်ပရေၚ်ပၞာန်ရောၚ် ဂွံတီကေတ် အတိုၚ်ဂလာန် တမ်ရိုဟ်ပရိုၚ်ဒေသတံရ။
ဗ္ဒိုပ်ဒပ်ကံၚ်ဇြဳပၞာန် ပါလုပ်သီုကဵုကရောၚ်ပၞာန်အံၚ်ဇေယျ နွံဗ္ဒါဲဍုၚ်ကအ်ကြိက် ကဵု ဍုၚ်ကြုၚ်ဒဵု တွဵုရးကရေၚ်တံဂှ် စနူဂိတုဨပရဴ ၁၄ တုဲကၠုၚ်တေံတုဲ ဒပ်ပံၚ်ကောံပၠန်ဂတးမဟာမိတ် သၟဝ်သ္ကိုပ်သ္က ဒပ်ပၞာန်ဗၠးၜးကောန်ဂကူကရေၚ် KNLA တံ လုပ်စိုပ်ဗ္တိုက်လဝ်တုဲ ပေါဲဗ္တိုက်ၜါလ္ပာ် က္တဵုဒှ်လဝ် ဗွဲမသ္ကာတ်မြဟ်ရ။
အပ္ဍဲပေါဲဗ္တိုက်ဂှ် ဒပ်ပံၚ်ကောံပၠန်ဂတးမဟာမိတ် သၟဝ်သ္ကိုပ်သ္က KNLA တံ ဗ္တိုက်သီဂွံလဝ် ဗ္ဒိုပ်သၞေဟ်ကၚ်ကံၚ်ဇြဳပၞာန် ကေုာံ ဗ္ဒိုပ်ကၚ်စဵုဒၞါလ္ၚဵုတံတုဲ ကၟာတ်လဒဵုဗ္တိုက်ဒၟံၚ် ဌာန်ဂအုပ်တမ်ဒပ်ကံၚ်ဇြဳပၞာန် မဖျေံလဝ်သ္ဇိုၚ် ပ္ဍဲဍုၚ်ကြုၚ်ဒဵုကဵု ဍုၚ်ကအ်ကြိက်တံဂှ်ရ။
ဒပ်ကံၚ်ဇြဳပၞာန်ဂှ်တှ်ေ ညံၚ်ဂွိုအ်ဒးဒုၚ်သီဍုၚ်ကြုၚ်ဒဵုကီု၊ ညံၚ်ဂွံကလေၚ်သီကေတ် ဗ္ဒိုပ်သၞေဟ်ကၚ် နွံပ္ဍဲသ္ကုတ်ဂၠံၚ်ကွဳစက် ကြုၚ်ဒဵု−ကအ်ကြိက်တံမာန်ကီု၊ သွက်ဂွံကလေၚ်အုပ်ဓလီုတိဍာ်တံမာန်ဂှ် စနူဂိတုဨပရဴကြပ်အိုတ်တုဲကၠုၚ်တေံတုဲ ဗလးလဝ်ကရောၚ်ပၞာန် သၟဝ်သ္ကိုပ်သ္က ၝောံဒပ် ၂၂ တုဲ လ္ပာ်ဒပ်ပံၚ်ကောံပၠန်ဂတး KNLA တံ ကၟာတ်လဒဵုဗ္တိုက်ကၠုၚ်မာန်လဝ်ရ။
ကုဒပ်ကံၚ်ဇြဳပၞာန် မထ္ပက်ကရောၚ်ပၞာန်လုပ်စိုပ်ကၠုၚ်ဂှ် ဒပ်ပံၚ်ကောံပၠန်ဂတး KNLA တံ ဗ္တိုက်လဝ် လ္ပာ်ကွာန်(နွားခြံကုန်း) ဗ္ဒါဲဍုၚ်ကြုၚ်ဒဵုတုဲ လ္ပာ်ဒပ်ကံၚ်ဇြဳပၞာန်ဂှ် ဒုသ္ကိုပ်တမ်ဒပ်မွဲတၠ မပါလုပ် ကဆံၚ်ဗိုလ်ကေုာံ ကဆံၚ်ကောန်ဒပ် ဟွံအောန်နူ ၃၀ တၠ ချိုတ်အာလဝ်ရောၚ် တမ်ရိုဟ်ပရိုၚ်ပၠန်ဂတးဂမၠိုၚ် သ္ဂးရ။
ကရောၚ်ပၞာန်ဒပ်ကံၚ်ဇြဳပၞာန် ဒးဒုၚ်ဗ္တိုက်လဝ်ဂှ်ဝွံ ဒှ်အာလဝ် စဵုကဵုဗီုပြၚ်ကရောၚ်ပၞာန်လီုတုဲ ဒးကလေၚ်ဂတးလဝ်က္ဍိုပ်ရောၚ် တမ်ရိုဟ်ပရိုၚ်ပၠန်ဂတးဂမၠိုၚ် ကဵုလဝ်သမ္တီရ။
အခိၚ်လၟုဟ် ဒပ်ကံၚ်ဇြဳပၞာန်ဝွံ ဖျေံလဝ်ဒပ် အပ္ဍဲဒေသဂြာၚ် ပွိုၚ်ဍုၚ်ဘာအၚ် သြၚ်ဍုၚ်ကြုၚ်ဒဵု လ္ပာ်တေံဂှ်တုဲ ပ္ဍဲကဵုဘာလကျာ် ဗ္ဒါဲ(မီးပုံကွၚ်း) ၊ ဘာဗ္တောန်လိက်၊ ဗ္ဒိုပ်ဗျူဟာ လ္တူဍုၚ်ကြုၚ်ဒဵုဂှ်လေဝ် ဖျေံလဝ်ဒပ် ဗွဲမခိုၚ်ဗိုန်တုဲ ပလေဝ်လဝ်ပၞာန်ဒုၚ်ရောၚ် တမ်ရိုဟ်ပရိုၚ်ဒေသဂမၠိုၚ် ဟီုရ။
သ္အာၚ်နူဂှ်ပၠန် မွဲဒမြိပ်ဂၠံၚ်ကွဳစက် ဘာအၚ်−သာမည−ကျားကလေး−ဂျိုၚ်းတံဂှ်လေဝ် ဒပ်ကံၚ်ဇြဳပၞာန် ချဳဒရာၚ်အာကၠုၚ်ဒၟံၚ် ကဵုရေၚ်ယာန်ကွဳစက်တံသၟးဟွံက သီုကဵုမၚ်ဂီုကၠီု မၚ်တောပ်ဗ္တိုက်တုဲ ပ္ဍဲၜဳသၚ်လောန် ဗ္ဒါဲဍုၚ်ဘာအၚ်ဂှ်လေဝ် ကေတ်လဝ်ဂီုကၠီု ဟွံအောန်နူကဵုက္ၜၚ်ပၞာန်ၜါဖ္ဍိုက်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်− KHRG