ယှိုဲကျေန်၊ မေ ၉
ပ္ဍဲတမ်ဒပ်ကံၚ်ဇြဳပၞာန် ခမရ ၅၉၈ နွံပ္ဍဲကွာန်(ကွမ်းဆိပ်) ပွိုၚ်ဍုၚ်ယှိုဲကျေန် ပယျဵုတွဵုရးမန်ကဵုဗဂေါဂှ် ပေါဲဗ္တိုက်ၜါလ္ပာ် သ္ကာတ်မြဟ်ဒၟံၚ်တုဲ ညံၚ်တမ်ဒပ်ဟွံဂွံစှ်ေအာဂှ် လ္ပာ်ကံၚ်ဇြဳပၞာန် ကလေၚ်တဝ်စၞေဟ်ဒၟံၚ် နကဵုပၞာန်ကျာ ဗွဲမသ္ကာတ်မြဟ်ရောၚ် ဒပ်ပၠန်ဂတးဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဌာန်ဂအုပ်တမ်ဒပ်ကံၚ်ဇြဳပၞာန် ခမရ ၅၉၈ ဂှ် စနူဂိတုဨပရဴမံက်တုဲကၠုၚ်တေံတုဲ ဒပ်ပၠန်ဂတး သၟဝ်က္ဍိုက်ပ် ဒပ်ပၞာန်ဗၠးၜးကောန်ဂကူကရေၚ် KNLA တံ ဗိုၚ်ကၟာတ်လဒဵုလဝ်တုဲ စနူဂိတုမေ ၈ တုဲ ဝေၚ်ဒၟံၚ်ပေါဲဗ္တိုက်သီတမ်ဒပ်ရ။
အပ္ဍဲပေါဲဗ္တိုက်ဂှ် ညံၚ်ဌာန်ဂအုပ်တမ်ဒပ်ဟွံဂွံစှ်ေအာဂှ် လ္ပာ်ဒပ်ကံၚ်ဇြဳပၞာန် ဗ္တိုက်လဝ်ပၞာန်ကျာ ဟွံအောန်နူ ၃၀ ဝါတုဲ နူဗ္ဒိုပ်ဒပ် ပွဳပွူဗ္ဒါဲတံဂှ်လေဝ် ဘိုၚ်ပန်ကဵုဒၟံၚ်လွဟ်ဇၞော် ဟွံပိုတ်သ္ကုတ်ရ။
ပ္ဍဲပွိုၚ်ဍုၚ်ယှိုဲကျေန်ဂှ် တမ်ဒပ်ကံၚ်ဇြဳပၞာန် ခမရ ၅၉၈၊ ၅၈၉ ကေုာံ ၄၄၀ တံ နွံတုဲ လ္ပာ်ကံၚ်ဇြဳပၞာန်ဂှ်တှ်ေ ညံၚ်တမ်ဒပ်ခမရ ၅၉၈ ဟွံဂွံစှ်ေအာဂှ် ဂ္စါန်တဝ်စၞေဟ်ဒၟံၚ်ရ။
ဟိုတ်နူပေါဲဗ္တိုက် ခမရ ၅၉၈ တုဲ ညးဍုၚ်ကွာန်ဒေသ နူကဵုကွာန် (ကွမ်းဆိပ်၊ သူရဲသမိန်၊ ညောင်ခြေထောက်) တံမပါလုပ် ဟွံအောန်နူ ၅ ကွာန်ဂှ် ထောံလသာဌာန်ဒၟံၚ် ဒးဂြိပ်ဒဴပါဲဒလေတ်ဒၟံၚ်ရောၚ် ဂွံတီကေတ် ဇရေၚ်ညးမရီုဗၚ်ကဵုဒၟံၚ်ပရေၚ်ပါဲဒဴဘဲပၞာန်တံရ။
တုဲကၠုၚ်ဂိတုဨပရဴ ၂၃ တေံဂှ်လေဝ် ဒပ်ပံၚ်ကောံ KNLA တံ ဗ္တိုက်သီဂွံလဝ် ဗ္ဒိုပ်ဗၠာဲသၟိၚ်တိဍာ် ကံၚ်ဇြဳပၞာန် နွံပ္ဍဲကွာန်(ကွမ်းဆိပ်) ဂှ်တုဲ သီဂွံလဝ် မကမ်လွဟ်လက်နက် ဗွဲမဂၠိုၚ်ဂၠေၚ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်− KHRG