သေန်ကာပေါဝ်၊ မေ ၉
သွက်ပရေၚ်အိန္ဒိယ မပၞောတ်စိုတ်မဗ္တိုက်ကၠုၚ်တံဂှ် ကလေၚ်တပ်အာဒဏ်ဏောၚ် သ္ကိုပ်ဝန်ဇၞော်ပါကေဿတာန် ယှာဗာတ် ယှရေတ် ဟီုကၠုၚ် ပ္ဍဲဂိတုမေ ၈ တေံရ။
ပ္ဍဲဂိတုမေ ၇ ဂှ် ပ္ဍဲဒေသကာတ်ယှမဳယျာဂှ် အိန္ဒိယ ကေုာံ ပါကေဿတာန်တံ ဒှ်ပေါဲဗ္တိုက်တုဲ မၞိဟ်ဟွံအောန်နူ ၃၈ တၠ ချိုတ်အာလဝ်ရ။
ကြဴနူအိန္ဒိယ စဗ္တိုက်ကၠုၚ် ပါကေဿတာန် နကဵုကမ်လှောဝ်ဂမၠိုၚ်တုဲဂှ် မွဲဒမြိပ်ပယျဵုသ္ကုတ်သၟဝ်ကျာ မဒှ်ဒၟံၚ်ပရေၚ်ကယျာန်ဓဝါတ်ဂှ် သီုၜါလ္ပာ် က္တဵုဒှ်လဝ်ပရေၚ်ပန်ပှော်ကဵုလွဟ်ဇၞော်ရ။
ပရေၚ်ဗ္တိုက်ညးမၞုံပၟိက်ပၞာန် မၞိဟ် ၂၆ တၠ မဒးပဏာကာဂစိုတ် ပ္ဍဲဒေသကာတ်ယှမဳယျာ လ္ပာ်အိန္ဒိယအုပ်ဓုပ်ဂှ် ပါကေဿတာန် ရီုဗၚ်ကဵုလဝ်ရောၚ် ကြဴနူအိန္ဒိယ စောတ်စောဲတုဲဂှ် အကြာသ္ၚိဇိုၚ်ဝုတ်ဒိုဟ် မပိုၚ်ပြဳလဝ် လွဟ်နျူကလဳယျာဂမၠိုၚ် အပ္ဍဲပွိုၚ်ၜါစှော်သၞာံပြၚ်ဏံ ပဋိပက္ခပရေံအိုတ်မွဲ ဒှ်ကၠုၚ်လဝ်ရ။
ပရေၚ်အိန္ဒိယ စောတ်စောဲလဝ်ဂှ် ပါကေဿတာန် တးပါဲလဝ်တုဲ သွက်ဂွံဂၠိုက်ဂၠါဲစၟဳတ် ပရေၚ်ဗ္တိုက်ဂစိုတ်ဂယိုၚ်တံဏံ ဗွဲမဗၠးၜးဂှ်လေဝ် ဖ္တိုက်ဖ္အောဝ်လဝ်ရ။
သ္ကိုပ်ဝန်ဇၞော် ယှရေတ် သ္ကိုပ်သ္ကတုဲ ကၠောန်ဗဒှ်လဝ် ကောံဓရီုကာတၟေၚ် ကံၚ်ဇြဳဂီုကၠီုကောန်ဂကူမွဲတုဲ ဝန်ဇၞော်ကာစဵုဒၞါလေဝ် တိုန်စိုပ်လဝ်ရ။
ကြဴနူကောံဓရီုတုဲ ပ္ဍဲကဵုတၚ်လလောၚ်တြး မပ္တိတ်ကၠုၚ်ဂှ် ဖ္တိုက်ဖ္အောဝ်လဝ် ဍုၚ်သ္အာၚ်ဂမၠိုၚ် သွက်ဂွံကဵုအိန္ဒိယ ကေတ်တာလျိုၚ်ရ။
အိန္ဒိယ ဗဂဵုလဝ်ပၟတ် အပ္ဍဲဒေသ မဒှ်တုဲ နကဵုပါကေဿတာန် သွက်ဂွံစဵုဒၞါ ဘဲအန္တရာယ်လမျီု ညးဍုၚ်ကွာန်ဟၟဲကဵုဒုဟ်ဒဏ်တံဂှ်တုဲ ကလေၚ်ဗ္တိုက်အာဏောၚ် ထ္မံက်ထ္ၜးလဝ် ပ္ဍဲတၚ်လလောၚ်တြး ရုၚ်သ္ကိုပ်ဝန်ဇၞော်ရ။
ပ္ဍဲကဵုတွဵုဒၞက်ပါကေဿတာန်ဂှ် ဗ္ဒိုပ်ဒပ်သၟာပကီုပရာပ်ဂမၠိုၚ် နွံဒၟံၚ်ရောၚ် နူကဵုအိန္ဒိယ မစောတ်စောဲကၠုၚ်သာ်ဏံဂှ် လ္ပာ်ပါကေဿတာန် တးပါဲလဝ်ရ။
သ္ကိုပ်ဝန်ဇၞော်အိန္ဒိယ နာရာန်ဒရာမိုဝ်ဒဳဝွံ ညံၚ်အပ္ဍဲဍုၚ် မၞိဟ်ဒးစိုတ်ညးဂွံဂၠိုၚ်ကၠုၚ်တုဲ ဗ္တိုက်လဝ်ပါကေဿတာန်ရောၚ် ဝန်ဇၞော်ကာစဵုဒၞါပါကေဿတာန် ဟီုလဝ်တုဲ ညးတံလေဝ် ကလေၚ်ဗ္တိုက်လဝ်ရောၚ် ဟီုရ။
ဝန်ဇၞော်ကာစဵုဒၞါပါကေဿတာန် ခါဝါဂျာ မူဟာမက် အသေတ်ဂှ်တှ်ေ ဟီုကၠုၚ်လဝ် “ပရေၚ်ပလန်တဲဂှ် စအာတုဲယျ။ ပိုယ်တံ ဟွံမၚ်လအ်ပုဟ်” သာ်ဝွံ မဒှ်ရ။
Ref: Agencies