လိုၚ်ဗၠဲ၊ မေ ၉
ဟိုတ်နူပေါဲဗ္တိုက်ၜါလ္ပာ် အကြာဒပ်ပၠန်ဂတးတံကဵု ဒပ်ကံၚ်ဇြဳပၞာန် မက္တဵုဒှ်ဒၟံၚ် ပ္ဍဲပွိုၚ်ဍုၚ်လိုၚ်ဗၠဲ၊ တွဵုရးကရေၚ် ပယျဵုသေံ−ဗၟာဂှ်တုဲ ညးဍုၚ်ကွာန်ဒေသ ပွဳပွူ ၂၀၀ ဒးပါဲဒလေတ်ကၠုၚ် လ္ပာ်ဍုၚ်သေံရောၚ် တမ်ရိုဟ်ပရိုၚ်ပယျဵုဂမၠိုၚ် ဟီုရ။
ပ္ဍဲဂိတုမေ ၇ အခိၚ်နူဂယးဂှ် ဒပ်ပံၚ်ကောံပၠန်ဂတး KNLA KNDO တအ် စဗ္တိုက်ကၠုၚ်လဝ် ဗ္ဒိုပ်ဒပ်ကံၚ်ဇြဳပၞာန် မၞုံပ္ဍဲဒေသမေဝ်လေဝ် ပွိုၚ်ဍုၚ်လိုၚ်ဗၠဲ နကဵုဒရုၚ်တုဲ ပေါဲဗ္တိုက်ၜါလ္ပာ် ဒှ်လဝ်တုဲ ညးဍုၚ်ကွာန်ဒေသ ၂၀၀ နူပွဳပွူဗ္ဒါဲဂှ်ဂမၠိုၚ် ဒးပါဲလဝ်ဘဲပၞာန်ရ။
ဗ္ဒိုပ်ဒပ်ပၞာန်တံဏံဝွံ ဖျေံလဝ်သ္ဇိုၚ် လ္တူကုန်ဒဵုမွဲ မၞုံဗ္ဒါဲပယျဵု ကွာန်မေဝ်လ ပွိုၚ်ဍုၚ်ထသံက်ယာန် ခရိုၚ်တက် ဍုၚ်သေံဂှ်တုဲ ဟိုတ်နူပေါဲဗ္တိုက်တုဲ ညးဍုၚ်ကွာန်ကရေၚ် မ္ဒးဂြိပ်ဒဴပါဲဒလေတ်ကၠုၚ်တံဂှ် မၚ်မွဲရီုဗၚ်ကဵုလဝ်တုဲ ပရေၚ်ဂီုကၠီုပယျဵုတံဂှ်လေဝ် မၚ်ရံၚ်ဒၟံၚ် ၂၄ နာဍဳရောၚ် သၟိၚ်တၠအဝဵုသေံဂမၠိုၚ် သ္ဂးလဝ်ရ။
ဒပ်ပံၚ်ကောံပၠန်ဂတး KNLA KNDO တံဝွံ စနူသၞာံဏံတုဲ ထ္ပက်ပၞာန်သီဂွံလဝ် ဗ္ဒိုပ်ဒပ် (မော်ဖားသူး၊ ခလယ်ဒေး၊ ပူးလူးတူ) မဒှ်ဗ္ဒိုပ်ဒပ်ကံၚ်ဇြဳပၞာန် နွံမွဲဒမြိပ်ပယျဵု တိဍာ်ဒပ်မဟာ ၇ ခရိုၚ်ဘာအၚ် KNU တုဲ ဗ္ဒိုပ်သှ်ေဒၟံၚ်တံဂှ် ဆက်ထ္ပက်ဒၟံၚ်ပၞာန်ရ။
အတိုၚ်ပရေၚ်အုပ်ဓုပ် KNU မဖျေံစၟတ်လဝ်ဂှ်မ္ဂး ဗ္ဒိုပ်ဒပ်ကံၚ်ဇြဳပၞာန် မထ္ပက်ဒၟံၚ်ပၞာန်လၟုဟ်ဝွံ နွံဒၟံၚ်ပ္ဍဲပွိုၚ်ဍုၚ်(ပိုၚ်ကျုံ) ၊ ခရိုၚ်ဘာအၚ် တိဍာ်ဒပ်မဟာ ၇ တုဲ ပ္ဍဲဒေသဏံဂှ် ဗ္ဒိုပ်ဒပ်ကံၚ်ဇြဳပၞာန်ဂမၠိုၚ် မပ္တံကဵု ဗ္ဒိုပ်ဗျူဟာတာလေ၊ ဗ္ဒိုပ်မေဝ်လ၊ ဗ္ဒိုပ်မဝ်ဖိုဝ်ကေ၊ ဗ္ဒိုပ်က္ဍဟ်ဒဵုနဝ်တရာ တံ သှ်ေဒၟံၚ်ဏီရ။
အခိၚ်ဒပ်ပံၚ်ကောံပၠန်ဂတး KNLA KNDO တံ ဝေၚ်ဒၟံၚ်ပေါဲဗ္တိုက်သီဗ္ဒိုပ် ကုဗ္ဒိုပ်(မော်ဖားသူး၊ ခလယ်ဒေး၊ ပူးလူးတူ) တံဂှ်လေဝ် ဒပ်ကံၚ်ဇြဳပၞာန် ပလံၚ်ကဵုပၞာန်ရီု နူဗလးတိဏံ ဟွံမာန်တုဲ စကာလဝ်ပၞာန်ကျာသၟးတုဲ ဗ္တိုက်လဝ်ကီုလေဝ် ဒးဆောံလေၚ်လဝ်ဗ္ဒိုပ်ဂမၠိုၚ် မွဲတုဲမွဲရ။
ပ္ဍဲသၞာံ ၂၀၂၄ ကြပ်အိုတ်တေံဂှ်လေဝ် ဒၞါဲဌာန်ဂအုပ်ဗဟဵုတြေံ KNU ပ္ဍဲဒေသမာနေဝ်ပဠဝ် ဒပ်မဟာ ၇ ဂှ် ဒပ်ပံၚ်ကောံပၠန်ဂတး KNLA KNDO တံ ဗ္တိုက်သီဂွံလဝ် အိုဿီုကဵုဗ္ဒိုပ်ဒပ်ကံၚ်ဇြဳပၞာန် မၞုံပ္ဍဲဒေသမာနေဝ်ပဠဝ်ဂှ်တုဲ ပ္ဍဲဒေသမာနေဝ်ပဠဝ်ဂှ်တှ်ေ ဒပ်ကံၚ်ဇြဳပၞာန် အိုတ်အးအာဣရ။
ပရိုၚ်−သြၚ်လောန်တိုၚ်(မ်)
ဗီု− CJ