တံၚ်ဥူ၊ မေ ၁၀
ပ္ဍဲပယျဵုတွဵုရးကရေၚ်ကဵု ရးဗဂေါ ပ္ဍဲသ္ကုတ်ဂၠံၚ် တံၚ်ဥူ−သံတောၚ်ကြီးဂှ် ပေါဲဗ္တိုက်ၜါလ္ပာ် ဒှ်ဒၟံၚ်တုဲ ဟိုတ်နူဒပ်ကံၚ်ဇြဳပၞာန် ထောံမခတိုဟ်ဗ္တိုက်ကၠုၚ်ကဵုပၞာန်ကျာတုဲ ကောန်အရာပ်မွဲတၠ ချိုတ်အာလဝ်ရောၚ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဟိုတ်နူဒပ်ကံၚ်ဇြဳပၞာန် ချဳဒရာၚ်အာကၠုၚ်ဒၟံၚ်တုဲ စနူဂိတုမေ ၁ တုဲ ညံၚ်ကွဳစက်ဂမၠိုၚ် ဟွံဂွံအာကၠုၚ်တတ်ကၠောံ ဍုၚ်တံၚ်ဥူဂှ် ဌာန်ဂအုပ်တမ်ဒပ် ၅ ဒပ်ပၞာန်ဗၠးၜးကောန်ဂကူကရေၚ် KNLA သၟဝ်တဲဒပ်မဟာ ၂ KNU လလောၚ်ပ္တိတ်လဝ်ရ။
စနူဂိတုမေ ၁ နူကဵုလ္ပာ် KNU မကၟာတ်လဝ်ဂၠံၚ်အာဍုၚ်တံၚ်ဥူ စဵုကဵုဂိတုမေ ၈ ဂှ် ပ္ဍဲကဵုဒၞါဲဗ္ဒိုပ်ဒပ်ကံၚ်ဇြဳပၞာန်နွံ လ္တူဂၠံၚ်တံၚ်ဥူ−သံတောၚ်(၁၃) မိုၚ်−သံတောၚ်ကြီး ပ္ဍဲကဵု ၅ မိုၚ်၊ ယှိုဲညံၚ်ပေန် ကေုာံ မိုၚ် ၂၀ တံဂှ် ဒှ်ဒၟံၚ်ပေါဲဗ္တိုက်ၜါလ္ပာ်ရ။
အပ္ဍဲပေါဲဗ္တိုက်ဂှ် ဒပ်ကံၚ်ဇြဳပၞာန် ပန်ပှော်လဝ်ကဵုလွဟ်ဇၞော် ကေုာံ ပၞာန်ကျာတံဂှ်တုဲ ညးဗြဴဒေသ နူကဵု ၅ မိုၚ်မွဲတၠ ဒးလွဟ်ဇၞော်ချိုတ်အာလဝ်ဂှ်လေဝ် ညးဒေသမွဲတၠ ဟီုရ။
ဂၠံၚ်အာဍုၚ်တံၚ်ဥူသီုဖအိုတ်ဂှ် ကၟာတ်ထောံလဝ်တုဲ ညးဍုၚ်ကွာန်ဒေသ နွံဒၟံၚ်အပ္ဍဲဒေသတံဝွံ ပြဟ်ဟ်ဏံ ဒးဆေၚ်ဒၟံၚ်မုက်ကဵု အခက်အခုဲဇွောံမစၞစ၊ ကၠေၚ်စက်တံဂှ်တုဲ အခိၚ်ကၟာတ်ဂၠံၚ်လအ်ကၠုၚ်မ္ဂးလေဝ် ဇွောံမစၞစဂမၠိုၚ် ပိုတ်သ္ကုတ်အာမာန်ရောၚ် ညးဒေသဂမၠိုၚ် သ္ဂးအိုတ်ရ။
ပ္ဍဲခရိုၚ်တံၚ်ဥူ ဒပ်မဟာ ၂ KNU ဂှ် အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတး ဒပ်မဟာ ၂ တံ ဒှ်ဒၟံၚ်ပေါဲဗ္တိုက်ၜါလ္ပာ် မွဲဏှမွဲဏှရ။
သ္အာၚ်နူဂှ်ပၠန် ကုဒပ်ကံၚ်ဇြဳပၞာန် မအာကၠုၚ်ချဳဒရာၚ်ဒၟံၚ် ပ္ဍဲသ္ကုတ်ဂၠံၚ် တံၚ်ဥူ−သံတောၚ်(၁၃) မိုၚ်−သံတောၚ်ကြီးဂှ်ကဵု ဗ္ဒိုပ်သၞေဟ်ကၚ်တံဂှ် ဒပ်ပံၚ်ကောံ ဒပ်မဟာ ၂ KNU လုပ်စိုပ်ဗ္တိုက်ဒၟံၚ် မွဲဏှမွဲဏှရ။
ပရိုၚ်−သြၚ်လောန်တိုၚ်(မ်)
ဗီုရုပ်−KNU