ထဝါဲ၊ မေ ၁၀
နူဗော်သွးကောန်ဂကူကရေၚ် KNU ဗဟဵု သ္ပဒတန်လလောၚ်တြးကၠုၚ် ဗွဲမလုပ်သၞောဝ် ပ္ဍဲဂိတုမေ ၉ တေံ ဒဒှ်ရကလေၚ်သီဂွံ အလုံဒေသထဳခဳ မၞုံပ္ဍဲပွိုၚ်ဍုၚ်ထဝါဲ ခရိုၚ်ထဝါဲ ရးတၞၚ်သဳ ပယျဵုသေံ−ဗၟာဂှ်ရ။
ဒပ်ပံၚ်ကောံပၠန်ဂတး သၟဝ်သ္ကိုပ်သ္က ဒပ်စဵုဒၞါကောန်ဂကူကရေၚ် KNDO ၊ ဒပ်ပၞာန်ဗၠးၜးကောန်ဂကူကရေၚ် KNLA တံ သီဂွံလဝ် ဗ္ဒိုပ်ဗျူဟာထဳထဂှ် ပ္ဍဲဂိတုဨပရဴ ၁၉၊ ဗ္ဒိုပ်ဗျူဟာထဳခဳဂှ် ပ္ဍဲဂိတုမေ ၉ မဒှ်ဗ္ဒိုပ်ကံၚ်ဇြဳပၞာန် မၞုံအပ္ဍဲဒေသထဳခဳတံဂှ်ရ။
ဒေသထဳခဳဝွံ နူသၞာံ ၁၉၇၄ တေံ စစဳဇန်လဝ် သွက်ဂွံသိုၚ်ခၞံ ဌာန်ဂအုပ်ဒပ်မဟာ ကေုာံ ဌာန်ဂအုပ်ခရိုၚ် ခရိုၚ်ဗိက်−ထဝါဲဂှ်တုဲ စနူသၞာံ ၁၉၇၅ တုဲ ကောန်ဇာတ်ဂြောဝ်ဂတာ ကောန်ဂကောံရုၚ် မယိုက်ဂၠေၚ်ဒၟံၚ်တာလျိုၚ် ပ္ဍဲဌာန်ဂအုပ်ဒပ်မဟာ ကေုာံ ဌာန်ဂအုပ်ခရိုၚ်တံ မံၚ်တန်တဴကၠုၚ်လဝ်ရောၚ် KNU သ္ဂးရ။
စိုပ်သၞာံ ၁၉၉၇ နူကဵုတမ်ဒပ်ကံၚ်ဇြဳပၞာန် ၜိုတ် ၂၀ သၟဝ်သ္ကိုပ်သ္က ၝောံဒပ်ကံၚ်ဇြဳပၞာန် ၝောံဒပ် (၅၅) ကဵု ၝောံဒပ် (၆၆) တံဂှ် စဝေၚ်ကၠုၚ်ပၞာန်ထ္ပက် အပ္ဍဲဒေသထဳခဳ နကဵုမေဂျာအဝ်ပရေယှေန်တုဲ ဒးဗလးလဝ်တဲ ဒေသထဳခဳဂှ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြး KNU ရ။
ဆ္ဂး ကလေၚ်သီကေတ်လဝ် ဒေသထဳခဳ မဒးဗလးလဝ်တဲ ပွိုၚ် ၂၈ သၞာံဂှ်တုဲ သွက်ဂွံစဵုဒၞါလမျီုသ္ၚိဌာန် ညးဍုၚ်ကွာန် အပ္ဍဲဒေသတံဂှ် ဆက်ကၠောန်ၜိုတ်အာဏောၚ် KNU ကဵုသမ္တီ လလောၚ်တြးလဝ်ရ။
စပ်ကဵုအကာဲအရာ ဗော်သွးကောန်ဂကူကရေၚ် KNU ကလေၚ်သီဂွံလဝ် အလုံဒေသထဳခဳ ပယျဵုသေံ−ဗၟာဂှ်တုဲ ဒဵုကဵုအခိၚ်လၟုဟ် လ္ပာ်ကံၚ်ဇြဳပၞာန် လလောၚ်ပ္တိတ်လဝ်ပရိုၚ် မမိက်ကဵုမွဲမွဲဂှ် ဟွံဂွံဆဵုကေတ်ဏီရ။
ပရိုၚ်−သြၚ်လောန်တိုၚ်(မ်)
ဗီုရုပ်− KNU/KNLA