မတ်မလီု၊ မေ ၁၃
ကံၚ်ဇြဳပၞာန် မဒးဆက်ဆေၚ်ဒၟံၚ်မုက် ကုဇြဟတ်လေၚ်ဒိုက် ပ္ဍဲပေါဲဗ္တိုက်ဗလးတိတံဂှ်ဝွံ ပ္ဍဲတွဵုရးဍုၚ်မန်ဂှ် ရပ်ဒက်သၟတ်တံ ဗွဲအဓမ္မတုဲ ပကောံကၠုၚ်ဒၟံၚ်ကောန်ပၞာန် သွက်တန်ဗ္တောန်ကွတ်ပၞာန် လၟေၚ် ၁၃ ဂှ် ဂၠိုၚ်ကၠုၚ်ဒၟံၚ်ရောၚ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကံၚ်ဇြဳပၞာန်တွဵုရးဝွံ ရပ်ဒက်ဒၟံၚ် သၟတ်တိတ်မ္ၚးအခိၚ်ဗ္တံ ဗွဲအဓမ္မကီု၊ ရပ်ဒက်ဒၟံၚ် သၟတ်သုၚ်စောဲဂဥုဲၜူမာဲတံဂှ်ကီု၊ ကုညးမဖံက်ပလီု သၞောဝ်ဒေသန္တရ ပ္ဍဲကဵုဒေသ မဖျေံစၟတ်လဝ် မၞိဟ်တြုံၜါတၠ ဍိုက်ကွဳလိုန်ဓာတ်ဟွံဂွံတံဂှ် ရပ်ဒက်တုဲ ပကောံကၠုၚ်ဒၟံၚ်ကောန်ပၞာန်တၟိတၟိတံရ။
သ္အာၚ်နူဂှ်ပၠန် ဂကောံအုပ်ဓုပ်ကွာန်အရာပ် ကံၚ်ဇြဳပၞာန်တံ သွက်ဂွံလိၚ်စုတ်မၞိဟ်စၞးတုဲ မၞိဟ်ဟွံကဵုလှုဲတံဂှ် ကော်တုဲပကောံကၠုၚ်ကောန်ဒပ်တၟိတၟိသၟးဟွံက ကုညးမကလိလောန် ပရေၚ်ကၠတ်ဂၠံက်ပၠံၚ်ၜးတံဂှ်လေဝ် ဘပဠတုဲ ပကောံဒၟံၚ်ကောန်ဒပ်တၟိတၟိရ။
ညးဒေသၜဳကလေၚ်မွဲတၠဂှ်တှ်ေ ပ္ဍဲဒၞါဲပကောံကောန်ဒပ်တၟိတၟိတံဂှ် ညးသုၚ်စောဲဂဥုဲၜူမာဲ၊ ညးစိုပ်အာအချုက် ဟိုတ်နူဒုဟ်ဒဏ်တၞဟ်ဟ်တံသၟးဟွံက ကုညးမတိတ်မ္ၚးအာကၠုၚ်တံဂှ်လေဝ် ရပ်ဒက်တုဲ ပကောံဒၟံၚ်ကောန်ပၞာန်ရောၚ် ဟီုရ။
“ ရဲသုၚ်စောဲဂဥုဲတံ ဒှ်သၞတှ်ေ စိုပ်အချုက်။ နူကဵုအချုက်ဂှ် စုတ်ဏာဂွံလုပ်ယိုက်လျိုၚ်ပၞာန်။ ယဝ်ရပ်ဂွံပ္ဍဲဝိုၚ်ဝေၚ်မ္ဂးလေဝ် စုတ်ဏာပ္ဍဲပၞာန်ပၠန်။ အခိၚ်ဗ္တံ ဂေတ်ကၚ်တုဲ ယဝ်ဂွံဆဵုကေတ် ပ္ဍဲဂၠံၚ်မ္ဂးလေဝ် ရပ်တုဲ စုတ်ဏာ ပ္ဍဲပၞာန်ပၠန်ရ” သာ်ဝွံ သ္ဂးရ။
အပ္ဍဲဒေသဂှ် ယဝ်ရရပ်ဂွံညးကၠတ်ဂၠံက်ပၠံၚ်ၜးတံဂှ်မ္ဂး တိုန်တန်ဗ္တောန်ကွတ်ပၞာန်မ္ဂး ဂွံအခေါၚ်ဗၠးနူဒုဟ်ဒဏ်ဏောၚ်ဂးတုဲ ပကောံဒၟံၚ်ကောန်ပၞာန် သာ်ဏံလေဝ် နွံတုဲ လ္ၚဵုတံဂှ်တှ်ေ ပလံၚ်ဗစိုပ်ဏာတန်ဗ္တောန်ကွတ်ပၞာန်တံ မွဲတဲဓဝ်ရ။
ညးဒေသကျာ်ထဝ်မွဲတၠဂှ်လေဝ် ဗွဲကြဴဏံ ကံၚ်ဇြဳပၞာန် ပကောံကၠုၚ်ကောန်ပၞာန်တံဂှ်ဝွံ ဂၠါဲဒုဟ်ညးသၟတ်တံတုဲ ပလံၚ်ဗစိုပ်ဒၟံၚ် ဇရေၚ်တန်ဗ္တောန်ကွတ်ပၞာန်တံ ဂၠိုၚ်အိုတ်ဂှ် ဂွံဆဵုကၠုၚ်ရောၚ် ဟီုရ။
“ကံက်ဒၟံၚ်သ္ၚိတ်တ်ဂှ်နွံ။ မွဲပၠန်ဂှ် ရဲကၠတ်ဂၠံၚ်တံ ရဲဝေၚ်ၛၚ် ဝေၚ်ချေဝ်တံ ဗီုပြၚ်တံဏံဂှ် ဂၠါဲဒုဟ်တုဲ ရပ်ဒက်။ ရပ်တုဲ စုတ်ဏာပ္ဍဲအချုက်။ တုဲတှ်ေ ကလေံထောံဂဗုတ်ဏံ။ စုတ်ဏာပ္ဍဲကဵုပၞာန်ရ” သာ်ဝွံ သ္ဂးရ။
ကံၚ်ဇြဳပၞာန် ဟိုတ်နူပကောံဒၟံၚ်ညးသၟတ်ဂမၠိုၚ် ဗွဲအဓမ္မ သွက်တန်ဗ္တောန်ကွတ်ပၞာန်တံဂှ်တုဲ အခိၚ်ဗ္တံမ္ဂး ဟွံဂံၚ်တိတ်မ္ၚးအိုတ်တုဲ သၟတ်လ္ၚဵုတံဂှ်တှ်ေ ထောံလသာဌာန်ဒၟံၚ်တုဲ တိတ်ကၠောန်စလ္ပာ်ဍုၚ်မ္ၚး ဂၠိုၚ်ကၠုၚ်ဂှ် ညးဆက်ဟီုရ။
နာဲအဲမန် ပရိုဝ်ဂရာမ်ဒါရိုက်တာ ဌာန်သ္ဇိုၚ်အခေါၚ်အရာမၞိဟ်ဍုၚ်မန်ဂှ်တှ်ေ စကာဒၟံၚ်ညးသၟတ်ဂမၠိုၚ် ကဵုလုပ်ပၞာန် ဗွဲအဓမ္မဂှ်ဝွံ ဖံက်ပ္ကဝ်ဒၟံၚ် အခေါၚ်အရာမၞိဟ်တုဲ ပလံၚ်ဗစိုပ်ဒၟံၚ်သၟတ်တံ အပ္ဍဲဒၞါဲဂစိုတ်မၞိဟ်ဂှ်ဝွံ ကလိလောန်ဒၟံၚ် အမှုရာဇဝတ် လ္တူဂကူမၞိဟ်တံရောၚ် ဟီုရ။
“ ဂကောံပၞာန်ဏံ ကဵုလုပ်ဒၟံၚ်ပၞာန် ဗွဲအဓမ္မဂှ်ဝွံ ကလိလောန်ဒၟံၚ် ပရေၚ်စကာကလောန် ဗွဲအဓမ္မ၊ ကလိလောန်ဖံက်ပ္ကဝ်ဒၟံၚ် အခေါၚ်အရာမၞိဟ် တၞဟ်ဟ်တံတုဲ ကုသၟတ်ဟွံဍုက်ကေဝ်ကဵု ကွတ်ပညာပရေၚ်စဵုဒၞါ၊ ပရေၚ်ပၞာန်တံဂှ် ပလံၚ်စိုပ်ဒၟံၚ် ပ္ဍဲဒၞါဲဂစိုတ်မၞိဟ် ညံၚ်ရဴဇွောံစဵုဒၞါပၞာန်တံဂှ်တုဲ ဒှ်အရာကလိလောန်အမှုရာဇဝတ် လ္တူဂကူမၞိဟ်တံဏောၚ်ဂှ် ပိုယ်တံ ဟီုဒၟံၚ်လၟိုန်ရ။ ညအ်ဂှ် ဒှ်ဒၟံၚ်ဍာံဍာံရ” သာ်ဝွံ ဟီုလဝ်ရ။
မွဲလ္ပာ်ဂှ်ပၠန် ကံၚ်ဇြဳပၞာန်ဝွံ အကြာပေါဲဗ္တိုက်အလုံဍုၚ်မွဲဂှ် ကောန်ဒပ်သၟဝ်တဲညးတံ ဇီုကပိုက်ချိုတ် ဂၠိုၚ်တိုန်ကၠုၚ်တုဲ ကြဴနူကလေၚ်ပၠောပ်လမျီု ကုသၞာဝ်ယိုက်လျိုၚ်ပၞာန်တုဲဂှ် ပ္ဍဲတွဵုရးဍုၚ်မန်ဂှ် ပံက်ဒၟံၚ်တန်ဗ္တောန်ကွတ်ပၞာန် လၟေၚ်ဂိတုရ။
ကံၚ်ဇြဳပၞာန်ဂှ်တှ်ေ သွက်ဂွံလုပ်ပၞာန်ဂှ် ၜိုန်ဟီုဒၟံၚ် လ္ပကော်ညးအာယုက်ဟွံပေၚ်ဏီတအ်ကီုလေဝ် အပ္ဍဲဒေသဂှ်တှ်ေ မ္ၚးနူသၟတ်အာယုက်ဟွံပေၚ်တံဂှ် သၟတ်ပရေၚ်ထတ်ယုက်ဟွံခိုဟ်တံဂှ်လေဝ် ပကောံဒၟံၚ်ကောန်ဒပ်တ်ၟိတၟိတံ နွံဒၟံၚ်ရ။
အတိုၚ်တၚ်နၚ် နူကဵုသြၚ်လောန်တိုၚ်(မ်) ပကောံပကေဝ်လဝ်ဂှ်မ္ဂး ပ္ဍဲတွဵုရးဍုၚ်မန် နူကဵုတန်ဗ္တောန်ကွတ်ပၞာန်လၟေၚ် ၁ စဵုကဵု လၟေၚ် ၁၂ ဂှ် သၟတ်အပ္ဍဲဒေသ ဟွံအောန်နူ ၂၁၀၀ တၠ ဒးဒုၚ်ပကောံပလဝ်ကောန်ပၞာန်ရ။
ပရိုၚ်−သြၚ်လောန်တိုၚ်(မ်)
ဗီုရုပ်− SAC Telegram