ဒူဗိုၚ်၊ မေ ၁၃
တင်ရန်တၟံအမေရိကာန်ဝွံ ၜိုတ်သွက်ဂွံကၠောန် ညံၚ်အခေါၚ်အရာနျူကလဳယျာအဳရာန် ဂွံကၠေံရဏောၚ်ဟီုမ္ဂး နကဵုတဳဟဳရာန် ဗလးအာတဲ အခေါၚ်အရာတံဏံ ဟွံသေၚ်ပုဟ်ဂှ် ဝန်ဇၞော်ကာဍုၚ်သ္အာၚ် အဗာတ်သ် အာရာချဳ ဟီုလဝ်ရ။
ကၠာဟွံဂွံကၠောန်ဗဒှ်ပေါဲသဳကၠဳနျူကလဳယျာ အကြာအဳရာန်ကဵုအမေရိကာန် မွဲတဲပၠန် ပ္ဍဲအိုဝ်မာန်ဂှ် ဝန်ဇၞော်အာရက်ချဳ ဟီုလဝ် ပ္ဍဲဍုၚ်ဒိုဝ်ဟာ သာ်ဏံရ။
ပ္ဍဲဂိတုမေ ၁၁ ဂှ် အကြာတဳဟဳရာန်ကဵုဝါယှေန်တာန် ထပ်သဳကၠဳလဝ် ပ္ဍဲအိုဝ်မာန်ရ။
တၚ်ရန်တၟံ ပရေၚ်ပ္ညဳပ္ညပ်တံဏံဂှ် ဆၜိုတ်သ္ဂောံကၠောန် ညံၚ်အခေါၚ်အရာနျူကလဳယျာအဳရာန် ဂွံအိုတ်အးအာရမ္ဂး နကဵုညးတံ ဗလးထောံအခေါၚ်အရာညးတံ ဟွံသေၚ်လးလးပုဟ်ဂှ် ဒဒှ်ရမိက်ဂွံသောၚ်ကလးလဴထ္ၜးဂှ် ဝန်ဇၞော်အာရက်ချဳ ဟီုရ။
ပရေၚ်သ္အးဇ္ၚး ယူရေနဳယာန်ဂှ်ဝွံ ဒှ်အခေါၚ်အရာအဳရာန်တုဲ သီုကဵုဒှ်အခေါၚ်အရာ မ္ဒးပ္ညဳပ္ညပ်ကေတ်ဂွံမွဲဟွံသေၚ်ပုဟ်ဂှ် အဳရာန် ဟီုဂးလဝ် ဂၠိုၚ်ၚ်ကဵုဝါတုဲ တးပါဲလဝ် အရာသၞာဲဒဴအမေရိကာန်လ္ၚဵုတံ မအာတ်မိက်ကၠုၚ် သွက်သ္ဂောံဗဒေါအ်ကၠေံ ပရေၚ်သ္အးဇ္ၚးတံဂှ်ရ။
ယဝ်ရကေတ်လဝ်တၚ်တုပ်စိုတ် ကုအမေရိကာန် မွဲမွဲသာ်မ္ဂး ဒဒှ်ရ ဒးပလီုကၠေံ ရုၚ်စက်သ္အးဇ္ၚးယူရေနဳယာန်အဳရာန်ဏောၚ်ဂှ် သတိပ်ဝေသ်ကပ် မဒှ် ညးစၞးတၟေၚ် သမ္မတအမေရိကာန် ဒဝ်နေဝ်ထြာမ်ဂှ် ဟီုကၠုၚ်လဝ် အပ္ဍဲအေန်တာဗျူ မကၠောန်ဗဒှ်လဝ် ပ္ဍဲဂိတုမေ ၉ တေံရ။
ထြာမ် မနုက်ပ္တိတ်လဝ်အမေရိကာန် နူကဵုတၚ်တုပ်စိုတ်နျူကလဳယျာ ၂၀၁၅ မထ္ပက်လဝ်စၟတ်တဲ အကြာဍုၚ်ဇြဟတ်ဇၞော်ဂမၠိုၚ်ကဵု တဳဟဳရာန် သွက်ဂွံတာဒၞါ ပရေၚ်ချဳဒရာၚ်နျူကလဳယျာ အဳရာန်ဂှ်ဝွံ သွက်ဂွံသောၚ်ကလး ပရေၚ်ကယျာန်ဓဝါန် မဂၠိၚ်သ္ၚောဲကၠုၚ်ဒၟံၚ်ဂှ်တုဲ ယဝ်ဟွံကေတ်တၚ်တုပ်စိုတ်တၟိမွဲမ္ဂး ထောံဂြာတ်ဏာမခတိုဟ် ကုအဳရာန်ဏောၚ် ဘပဠလဝ်ရ။
ကြဴနူအမေရိကာန် နုက်တိတ်အာ နူကဵုတၚ်တုပ်စိုတ် ၂၀၁၅ တုဲဂှ် ကိုန်စဳမာန်နျူကလဳယျာ အဳရာန်မသၠုၚ်ပ္တိုန်လဝ်အသိၚ်ဂှ်ဝွံ ရန်တၟံလဝ် သွက်ဂွံပ္တိတ်လွဟ်ရောၚ် ဍုၚ်ပလိုတ်ဂမၠိုၚ် ဟီုကီုလေဝ် တဳဟဳရာန်ဂှ်တှ်ေ ဒှ်သွက်လ္ပာ်အရာပ်ရောၚ် ခၠေဝ်ပလန်ကၠုၚ်လဝ်ရ။
နကဵုညးတံ အခေါၚ်ဂွံစကာဇြဟတ်ဓာတ်နျူကလဳယျာ ဗွဲမၜိုဟ်လလမ်နွံတုဲ သွက်ဂွံကၠောန်ပ္တိတ်လွဟ် ဟွံသေၚ်ဂှ် ဟီုကၠုၚ်လဝ် ဗွဲမကၠးဖ္ဍး အပ္ဍဲပရေၚ်သဳကၠဳကုအမေရိကာန် တိုက်ရိုက်ဟွံသေၚ်တံဂှ်တုဲယျဂှ် ဝန်ဇၞော် အာရက်ချဳ ဟီုရ။
အဳရာန်ဂှ်တှ်ေ ဆက်သဳကၠဳဒၟံၚ် နကဵုဓဝ်ပတှ်ေနွံနွံတုဲ တၚ်ရန်တၟံပရေၚ်သဳကၠဳဏံဝွံ ယဝ်ဒှ် ညံၚ်ဟွံဂွံကလိဂွံလွဟ်လက်နက်နျူကလဳယျာမ္ဂး ကလိဂွံတၚ်တုပ်စိုတ်မာန်ဏောၚ်ဂှ် အာရက်ချဳ ဟီုလဝ်ရ။
Ref: Reuters