ကျာ်ထဝ်၊ မေ ၁၃
ပ္ဍဲပွိုၚ်ဍုၚ်ကျာ်ထဝ်ကဵုပွိုၚ်ဍုၚ်ၜဳကလေၚ် တွဵုရးဍုၚ်မန်ဂှ် ဟိုတ်နူကံၚ်ဇြဳပၞာန် ဗ္တိုက်ကဵုလွဟ်ဇၞော်ကေုာံပၞာန်ကျာတံဂှ်တုဲ ညးဍုၚ်ကွာန်ကောန်အရာပ် မွဲတၠ ချိုတ်တုဲ တြဴတၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် အတိုၚ်တၚ်လလောၚ်တြး KNU ဗဟဵုရ။
တုဲကၠုၚ်ဂိတုမေ ၁၀ တေံ နူကဵုဌာန်ဂအုပ်ၝောံဒပ် စၟတ် ၄၄ ဖျေံသ္ဇိုၚ်ကျာ်ထဝ်ဂှ် ပန်ခ္ဍာၚ်နၚ် လွဟ်ဇၞော် ၁၂၀ ၜါမ ပ္ဍဲကဵုပွိုၚ်ဍုၚ်ကျာ်ထဝ် ကွာန်ဝန်ကာန်ကဵု ပွိုၚ်ဍုၚ်ၜဳကလေၚ် ကွာန်(ကရဝေးဆိပ်)ရ။
ဟိုတ်နူလွဟ်ဇၞော် ဒတုံဗ္တိုဟ်ထ္ကးအာလဝ်တုဲ ဒဝ်ခေန်အေ အာယုက် ၆၆ သၞာံ ဒၟံၚ်ကွာန်(ကရဝေးဆိပ်)ဂှ် လမျီုဒးအိုတ်အာတုဲ ညးဍုၚ်ကွာန်ဒေသၜါတၠ ကလိဂွံလဝ်ဝပ်ရ။
ပ္ဍဲကဵုတ္ၚဲဂှ်ရ ဒပ်ကံၚ်ဇြဳပၞာန် ထောံဂြာတ်ကၠုၚ်မခတိုဟ် နကဵုပၞာန်ကျာ ပ္ဍဲကဵုကွာန်ဝေန်ကာန် ပွိုၚ်ဍုၚ်ကျာ်ထဝ်ဂှ်တုဲ ညးဒေသ သဝ်ဖိုဝ်လေန်န်ကဵု သဝ်နေတိုဝ်တံ ဇီုကပိုက်ကလိဂွံလဝ်ဝပ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
သ္အာၚ်နူဂှ်ပၠန် ပ္ဍဲဂိတုမေ ၁၁ တေံဂှ်လေဝ် ကွာန်ဝေန်ကာန် ပွိုၚ်ဍုၚ်ကျာ်ထဝ် ဒးဒုၚ်ထောံဏာလဝ်မခတိုဟ်ဂှ်တုဲ ဥူမံၚ်နာၚ် အာယုက် ၅၃ သၞာံ၊ မာၚ်မျေတ်မျာတ်ထိုဲ အာယုက် ၁၃ သၞာံတံ ဇီုကပိုက်ကလိဂွံလဝ်ဝပ်ရ။
ပ္ဍဲကဵုပွိုၚ်ဍုၚ်ကျာ်ထဝ်ကဵုပွိုၚ်ဍုၚ်ၜဳကလေၚ်ဂှ် အပ္ဍဲပွိုၚ်ၜါတ္ၚဲဏံ ဟိုတ်နူကံၚ်ဇြဳပၞာန် ဗ္တိုက်ကဵုလွဟ်ဇၞော် ကေုာံ ဗ္တိုက်ကဵုပၞာန်ကျာတံဂှ်တုဲ သ္ၚိ ၂၅ မ ပၟတ်တူလီုလာ်အာလဝ်တုဲ ညးဒေသဗွဲမဂၠိုၚ်ဂၠေၚ် ဒးဂြိပ်ဒဴပါဲဒလေတ်ဒၟံၚ်ရောၚ် ဂွံတီကေတ် ဇရေၚ် KNU ဗဟဵုရ။
အတိုၚ်တၚ်နၚ် ဗော်သွးကောန်ဂကူကရေၚ် KNU ဗဟဵုဂှ်မ္ဂး ပ္ဍဲတိဍာ်ခရိုၚ်သဓီု KNU ဂှ် စနူဂိတုဨပရဴ သတ္တာဟတုဲကၠုၚ်တေံတုဲ ဟိုတ်နူအကာဲအရာပရေၚ်ပၞာန်ၜါလ္ပာ် မသ္ကာတ်မြဟ်ကၠုၚ်ဂှ်တုဲ ညးဒေသမွဲဠက်ပြၚ် ဒးပါဲဒလေတ်ဒၟံၚ်တုဲ နွံပၟိက်ဒၟံၚ်ကဵု အရီုဗၚ်ပရေၚ်ဗ္စာရဏာမၞိဟ်တံလေဝ် ဂၠိုၚ်တိုန်ကၠုၚ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်− KHRG