လိုၚ်ဗၠဲ၊ မေ ၁၅
ဗ္ဒိုပ်ဗျူဟာကံၚ်ဇြဳပၞာန် မဖျေံလဝ်သ္ဇိုၚ် ပ္ဍဲကွာန်(တာလယ်) ပွိုၚ်ဍုၚ်လိုၚ်ဗၠဲ တွဵုရးကရေၚ် ဗ္ဒါဲပယျဵုသေံ−ဗၟာဂှ် ဒပ်ပၠန်ဂတးသၟဝ်သ္ကိုပ်သ္က ဒပ်ပၞာန်ဗၠးၜးကောန်ဂကူကရေၚ် KNLA သီဂွံလဝ်ရောၚ် တမ်ရိုဟ်ပရိုၚ်ပယျဵုဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အကြာပရေၚ်ပန်ပှော်နူကဵုပၞာန်ကျာဂှ် ပ္ဍဲဂိတုမေ ၁၃ အခိၚ်ဗ္တံ ၜိုတ် ၆ နာဍဳဝိုက်ဂှ် ဒပ်ပံၚ်ကောံ သၟဝ်သ္ကိုပ်သ္က ဒပ်မဟာ ၇ KNLA တံ သီဂွံလဝ် ဗ္ဒိုပ်ဗျူဟာ ဒပ်ကံၚ်ဇြဳပၞာန် မဖျေံလဝ်ဒပ် ပ္ဍဲကွာန်(တာလယ်) ဗ္ဒါဲပယျဵုသေံ−ဗၟာ တိဍာ်ထိၚ်ဒဝ် ဒပ်မဟာ ၇ KNU ဂှ်ရ။
ပ္ဍဲပေါဲဗ္တိုက်သီဗ္ဒိုပ်ဗျူဟာ(တာလယ်) ဂှ် ဒပ်ပံၚ်ကောံ သၟဝ်သ္ကိုပ်သ္ကဒပ်မဟာ ၇ KNLA သီဂွံလဝ် ကပေါတ်လွဟ်လက်နက်မကမ် လ္ပာ်ဒပ်ကံၚ်ဇြဳပၞာန်တံ ဗွဲမဂၠိုၚ်ဂၠေၚ်တုဲ ကောန်ဒပ်ကံၚ်ဇြဳပၞာန် ဗွဲမဂၠိုၚ် ဂြိပ်တိတ်အာလဝ်ရောၚ် သ္ဂးရ။
တ္ၚဲဏံ ပ္ဍဲဂိတုမေ ၁၄ အခိၚ်နူဂယးဂှ် က္ၜၚ်ကျာဒပ်ကံၚ်ဇြဳပၞာန် ကၠုၚ်စိုပ်ပဝ်ယာန်ဒၟံၚ် မွဲဒမြိပ်ပွဳပွူကွာန်(တာလယ်) ဂှ်တုဲ နူကဵုက္ၜၚ်ကျာဂှ် ထောံဂြာတ်ဏာလဝ်မခတိုဟ် ဗ္ဒါဲ ၂၀ မရောၚ် ညးဒေသမွဲတၠ ကဵုလဝ်သမ္တီရ။
အပ္ဍဲပေါဲဗ္တိုက်သီဗ္ဒိုပ်(တာလယ်) ဂှ် ဒပ်ကံၚ်ဇြဳပၞာန် ထောံဂြာတ်လဝ်မခတိုဟ် နကဵုက္ၜၚ်ကျာ အရိုဟ်တ္ၚဲတုဲ နူကဵုကွာန်(တာလယ်) ဂှ် သ္ၚိဒၟံၚ်ဗွဲမဂၠိုၚ်ဂၠေၚ် ဇီုကပိုက်လီုလာ်အာလဝ်တုဲ ညးဒေသဂမၠိုၚ်လေဝ် ဒးဂြိပ်အာလဝ် လ္ပာ်ဍုၚ်သေံ နကဵုလၟိဟ်ဗွဲမဂၠိုၚ်ဂၠေၚ်ရ။
ဟိုတ်နူပေါဲဗ္တိုက်ဗ္ဒိုပ်ဗျူဟာတာလယ် မက္တဵုဒှ်ဒၟံၚ် ဗ္ဒါဲပယျဵုသေံ−ဗၟာဂှ်တုဲ ဒးမၚ်ရံၚ်လဝ်ဂီုကၠီုပယျဵု ပွိုၚ် ၂၄ နာဍဳတုဲ မွဲဒမြိပ်ပယျဵုဂှ်လေဝ် ဖျေံလဝ်ဒပ်ပၞာန်သေံတုဲ ပတေၚ်ဂြတ်ဒၟံၚ်ပရေၚ်ဂီုကၠီုရောၚ် တမ်ရိုဟ်ပရိုၚ်ဒပ်ပၞာန်သေံ ကဵုလဝ်သမ္တီရ။
ဗ္ဒိုပ်ဗျူဟာ ဒပ်ကံၚ်ဇြဳပၞာန် မဖျေံလဝ်ဒပ် ပ္ဍဲကွာန်(တာလယ်) ပွိုၚ်ဍုၚ်လိုၚ်ဗၠဲ တွဵုရးကရေၚ် တိဍာ်ဒပ်မဟာ ၇ KNU ဂှ် ဒပ်ပံၚ်ကောံ KNLA KNDO တံ စဗ္တိုက်လဝ် ပ္ဍဲဂိတုမေ ၉ တေံဂှ်တုဲ ဂွံပွိုၚ်ပန်တ္ၚဲဂှ် သီဂွံလဝ်အလုံဗ္ဒိုပ်မွဲရ။
ကုန်ဗ္ဒိုပ်(တခေါဘီခီး) နူပွိုၚ်ဍုၚ်(ပိုၚ်ကျုံ) တိဍာ်ဒပ်မဟာ ၇ KNU ဂှ် ဒပ်ပံၚ်ကောံ KNLA KNDO တံ ဗ္တိုက်သီဂွံလဝ် ပ္ဍဲဂိတုမေ ၉ တေံတုဲ ဂိတုတုဲကၠုၚ်တေံဂှ်လေဝ် သီဂွံလဝ် ဗ္ဒိုပ်(မော်ဖားသူး၊ ပူးလူးတူ၊ ခလယ့်ဒေး) မၞုံပယျဵုသေံဂှ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−KNLA/PDF