ရေဝ်၊ မေ ၁၅
ပ္ဍဲတွဵုရးဍုၚ်မန် ဒေသရေဝ် ဒၞါဲဂကောံဒပ်ပၠန်ဂတးတံ ချဳဒရာၚ်ဇြဟတ်ခိုဟ်ဒၟံၚ်ဂှ် လ္ပာ်ကံၚ်ဇြဳပၞာန် ဆက်ဗပေၚ်ဒၟံၚ်ဇြဟတ်ဒပ် နူကဵုဂၠံၚ်ဍာ်မွဲကဆံၚ်ရောၚ် ဂွံတီကေတ် ဇရေၚ်ညးဒေသတံရ။
ဒပ်ကံၚ်ဇြဳပၞာန်ဝွံ စနူဂိတုဨပရဴတုဲကၠုၚ်တေံတုဲ မွဲဂိတုမ္ဂး ၜိုတ်ပိဝါ ဗပေၚ်ဒၟံၚ်ဇြဟတ်ဒပ်အဆက်က် ပ္ဍဲကဵုတမ်ဒပ်ဖျေံသ္ဇိုၚ်ဂမၠိုၚ် နူကဵုဂၠံၚ်ဍာ်မွဲကဆံၚ်ရ။
ကံၚ်ဇြဳပၞာန်ဝွံ ပ္ဍဲအရာဗပေၚ်ဇြဟတ်ဒပ်၊ ပလံၚ်ဗစိုပ်လွဟ်လက်နက်မကမ်တံဂှ် ရပ်စပ်ဒၟံၚ်သၞေဟ်ပါန်ဒါ မၞုံပ္ဍဲကွာန်ပါၚ်ၜဳဂှ် ဂၠိုၚ်အိုတ်ရောၚ် ညးဒေသဂမၠိုၚ် သ္ဂးအိုတ်ရ။
ဇြဟတ်ဒပ်စိုပ်ကၠုၚ်တံဂှ် ပလံၚ်ဗစိုပ် ဇရေၚ်ဌာန်ဂအုပ်ကောပ်ကာဲပရေၚ်ပၞာန် စၟတ် ၁၉ ဖျေံသ္ဇိုၚ်ရေဝ်တုဲမှ ကလေၚ်တြးဒၟံၚ် ဇရေၚ်တမ်ဒပ်ဖျေံသ္ဇိုၚ်ဂမၠိုၚ်ရ။
အတိုၚ်ဂလာန်ညးဒေသတံဂှ်မ္ဂး ပ္ဍဲကဵုဒပ်ကံၚ်ဇြဳပၞာန် ဗပေၚ်ဇြဟတ်ဂှ် ကောန်ဒပ်စှ်ေနူတန်ဗ္တောန်ကွတ်ပၞာန်ဂမၠိုၚ် ပါလုပ်ဒၟံၚ် ဂၠိုၚ်အိုတ်ရောၚ် သ္ဂးရ။
နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF ဂှ်တှ်ေ ကံၚ်ဇြဳပၞာန် ဗပေၚ်ကၠုၚ်ဒၟံၚ်ဇြဟတ်ဒပ်ဂှ်ဝွံ ဟိုတ်နူကြပ်စိုပ်အခိၚ်ကာလဗြဲဂှ်တုဲ ဂွံအာကၠုၚ်နူဂၠံၚ်ဍာ်ဂှ် တၚ်အခက်အခုဲဂမၠိုၚ် နွံဂှ်ရ မ္ဒးဒစးဒုၚ်ဗပေၚ်ကၠုၚ်ဒၟံၚ်ရောၚ် ဟီုရ။
ပ္ဍဲကဵုသ္ကုတ်ဂၠံၚ်ရေဝ်−ဇြပ်ဗုဂှ် ဒပ်ပံၚ်ကောံပၠန်ဂတးတံ ဟိုတ်နူအုပ်ဓလီုလဝ်ဒၞါဲလ္ၚဵုတံဂှ်တုဲ ကောန်ဒပ်ကံၚ်ဇြဳပၞာန်ကဵု သ္ဇိုၚ်ဝန်နူဌာနမဆေၚ်စပ်ဂမၠိုၚ် ဟွံသုၚ်စောဲဂၠံၚ်ကုန်တံဂှ်ရတုဲ သ္ပပဓာန်ကဵုဂၠံၚ်ဍာ်တုဲ ဒးအာကၠုၚ်ဒၟံၚ်ရ။
အပ္ဍဲပွိုၚ်ဍုၚ်ရေဝ် ဒၞါဲဒပ်ပံၚ်ကောံပၠန်ဂတးတံ အုပ်ဓလီုဇြဟတ်ခိုဟ်ဒၟံၚ်ဂှ် ကံၚ်ဇြဳပၞာန် သာတုဲ ဗပေၚ်ကၠုၚ်ဇြဟတ်၊ ပလေဝ်ပၞာန်ဒုၚ် ပ္ဍဲတမ်ဒပ်ကေုာံဗ္ဒိုပ်ဖျေံသ္ဇိုၚ်တံဂှ် ဂွံတီကေတ် ဇရေၚ်ညးဒေသတံရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ