ဂျေရုသလေန်၊ မေ ၁၅
တ္ၚဲအကြာကၠုၚ်စိုပ်ဏံ ဒပ်ပၞာန်ညးတံ ဒဒှ်ရလုပ်စိုပ်အာ ဒေသဂါဇြာ နကဵုဇြဟတ်ပေၚ်ၚ်ဏောၚ်ဂှ် သ္ကိုပ်ဝန်ဇၞော်အေဿရေ ဗေန်ဂျမေန် နေတာန်ညာဟု ဟီုလဝ်ဂှ် ထ္မံက်ထ္ၜးလဝ် ပ္ဍဲကဵုတၚ်လလောၚ်တြး ရုၚ်သ္ကိုပ်ဝန်ဇၞော် မလလောၚ်ပ္တိတ်လဝ် ပ္ဍဲဂိတုမေ ၁၃ တေံရ။
ပ္ဍဲဂိတုမေ ၁၄ ပယျာံဂယးဂှ် ဒပ်ပၞာန်အေဿရေ လလောၚ်တြးလဝ် ပရေၚ်ဆုဲပြံၚ် ညံၚ်မၞိဟ်ဂမၠိုၚ် မၞုံပ္ဍဲဒေသသ္ကုတ်သၟဝ်ကျာဂါဇြာ ဂွံဗၠးဘဲရ။
ညံၚ်ပရေၚ်ပၞာန်ဂွံတုဲဒှ်ဂှ် အပ္ဍဲတ္ၚဲအကြာကၠုၚ်စိုပ်ဏံ ဒပ်ပၞာန်ညးတံ လုပ်စိုပ်အာ နကဵုဇြဟတ်ပေၚ်ၚ်ဏောၚ်ဂှ် သ္ကိုပ်ဝန်ဇၞော် နေတာန်ညာဟု ဟီုကၠုၚ်ရ။
ပတုဲကၠေံပရေၚ်ပၞာန်ဟီုဂှ် သွက်ဂွံဗ္တိုက်သ္အး ဂကောံဟာမာသ်တံဏောၚ်ဂှ် သ္ကိုပ်ဝန်ဇၞော် ဟီုကၠုၚ်လဝ် အပ္ဍဲပေါဲဆဵုဂဗ ကုကောန်ပၞာန်ကလိဂွံဝပ် ပ္ဍဲဂိတုမေ ၁၂ တေံရ။
အကာဲအရာ ညးတံဂွံဒေါအ်ပေါဲပၞာန်ဂှ် ဟွံမွဲတုဲ ပရေၚ်ဒေါအ်ပန်ပှော် ဗွဲယာယဳ နွံကၠုၚ်မာန်ကီုလေဝ် နကဵုညးတံ အာဒဵုစိုပ်လအိတ်ဏောၚ်ဂှ် ဟီုဗပေၚ်စုတ်လဝ်ရ။
သွက်ဂွံသၠဲပ္တိုန် ပရေၚ်ဝေၚ်ပၞာန်ထ္ပက် ပ္ဍဲဂါဇြာဂှ် အပ္ဍဲဂိတုဏံ အခိၚ်ပြဟ်ဟ်တေံ အလဵုအသဳအေဿရေ တုပ်စိုတ်ကဵုလဝ်အခေါၚ်တုဲ သၞာဲဒဴအေဿရေဂမၠိုၚ် ဟီုဂးဒၟံၚ် ပရေၚ်ဂွံတန်တဴအာ ပ္ဍဲဂါဇြာ ဍာ်ဇမၠိၚ်ရ။
အေဿရေ လလောၚ်တြးလဝ် အစဳဇန်သ္ဂောံဝေၚ်အာပရေၚ်ပၞာန် မလှဲလးတံဂှ်တုဲ ဍုၚ်သ္အာၚ်တံဂှ်တှ်ေ ပတိုန်ဒုဟ် ဟီုဗျိပၠုတ်လဝ်ရ။
ယဝ်အေဿရေ ထ္ပက်ကၠုၚ်ပၞာန် နကဵုဇြဟတ်သာ်ဏံမ္ဂး ညးဒေသပါလက်သတိုၚ် မံၚ်ဒၟံၚ်ဒၞါဲတံဏံ ဗွဲမဂၠိုၚ် ဒးဂြိပ်အိုတ်ဏောၚ် မဒှ်ရ။
အေဿရေ ပရာန်ကၠုၚ်ဒၟံၚ် ကောန်ပါလက်သတိုၚ်ဂမၠိုၚ် သွက်ဂွံတိတ်အာနူဂါဇြာဂှ် သၞာဲဒဴဂီုကၠီုကဆံၚ်လ္တူမွဲတၠ ဟီုရ။
နကဵုကောန်ပါလက်သတိုၚ် မၞုံပ္ဍဲဂါဇြာဂမၠိုၚ် သွက်ဂွံတိတ်အာ လ္ပာ်ဍုၚ်ဇိုၚ်ဝုတ်ဒိုဟ် ညံၚ်ရဴဂျဝ်ဒါန်ကဵုအဳဂျေတ်တံဂှ် အေဿရေ ပၠောပ်လဝ်ဂလာန်ကီုလေဝ် အဳဂျေတ် ကေုာံ ဂျဝ်ဒါန်၊ မဟာမိတ်အာရာပ်ဂမၠိုၚ် ကေုာံ ဍုၚ်တၞဟ်ဟ်တံလေဝ် တးပါဲလဝ်ရ။
Ref: AFP