ဒဳပေဝ်ယေန်၊ မေ ၁၅
အပ္ဍဲကာလသီအဝဵု ပွိုၚ်ပန်သၞာံဏံ လၟေၚ်ဒဒှ်ကောန်အရာပ် ဒးချိုတ်လဝ်ကဵုဂအုံဗွဝ် လ္တူ ၁၀ တၠဂှ် နွံကၠုၚ် ဟွံအောန်နူကဵု ၈၀ ဝါတုဲ ကောန်အရာပ် ဗ္ဒါဲ ၁၆၀၀ လမျီုဒးအိုတ်အာလဝ်ရောၚ် ISP-Myanmar လလောၚ်ပ္တိတ်လဝ် ပ္ဍဲဂိတုမေ ၁၃ တေံရ။
ပ္ဍဲကဵုပရေၚ်ဒးချိုတ်အာလဝ်ကဵုဂအုံဗွဝ်တအ်ဂှ် ဟိုတ်နူဒပ်ကံၚ်ဇြဳပၞာန် ဗ္တိုက်ကဵုပၞာန်ကျာကီု၊ အခိၚ်ထ္ပက်ကရောၚ်ပၞာန်ဂှ် စံၚ်ယတ်ပြိုက်ဂစိုတ်ကီု၊ ဟိုတ်နူပန်ပှော်ဗ္တိုက်ကဵုလွဟ်ဇၞော် ကေုာံ ဟိုတ်နူဂကောံရပ်လွဟ်တၞဟ်သ္အာၚ်ဂမၠိုၚ် ပြိုက်ဂစိုတ်ကၠုၚ်တံ ပါလုပ်ရ။
လၟေၚ်ဒဒှ်ဂမၠိုၚ်ဝွံ က္တဵုဒှ်အာလဝ် ပ္ဍဲရးဒေသ ကေုာံ တွဵုရး ၁၁ ဂှ်တုဲ ဗွဲမဂၠိုၚ်ဂှ် က္တဵုဒှ်အာလဝ် ပ္ဍဲရးသက်ကိုၚ်ရ။ အကြာမွဲၜါတ္ၚဲဏံ ဘာဗ္တောန်လိက် ကွာန်အိုဝ်တုၚ်တွေန် ပွိုၚ်ဍုၚ်ဒဳပေဝ်ယေန် ရးသက်ကိုၚ် ဒးဒုၚ်ထောံမခတိုဟ်ဂှ်ကဵု ကွာန်ထောန်ရဝေ ပွိုၚ်ဍုၚ်( ရသေ့တောင်) တွဵုရးရခေၚ် ဒးဒုၚ်ဗ္တိုက်ကဵုပၞာန်ကျာဂှ်လေဝ် ပါလုပ်ရ။
နကဵုကံၚ်ဇြဳပၞာန် လလောၚ်တြးဒေါအ်ပန်ပှော်တုဲ အပ္ဍဲပွိုၚ်မွဲဂိတုပြၚ်ဂှ် ဟိုတ်နူဗ္တိုက်ကၠုၚ်ကဵုပၞာန်ကျာတုဲ ပါလုပ်သီုကဵုပရေၚ်ကွာန်အိုဝ်တုၚ်တွေန်ကဵု ကွာန်ထောန်ရဝေတံဂှ် လၟေၚ်ဒဒှ်ကောန်အရာပ် ဒးချိုတ်အာ လ္တူ ၁၀ တၠဂှ် နွံကၠုၚ်လဝ်ဟွံအောန်နူတြဴဝါရ။
လၟေၚ်ဒဒှ်သီုတြဴဏံဝွံ ဘာဗ္တောန်လိက် ကေုာံ ကွာန် ကောန်အရာပ်တံ မံၚ်တန်တဴသၟးရ ဒးဒုၚ်ဗ္တိုက်လဝ်တုဲ ကောန်အရာပ် ဟွံအောန်နူ ၁၁၃ တၠ ချိုတ်အာလဝ်ရောၚ် တၚ်နၚ် ISP-Myanmar ထ္မံက်ထ္ၜးလဝ်ရ။
ပ္ဍဲလဒေါဝ်ဍုၚ်ဗၟာ ကြဴနူတိချဳအာတုဲဂှ် ပရေၚ်ကံၚ်ဇြဳပၞာန် ဗ္တိုက်ကဵုပၞာန်ကျာဂှ် နွံကၠုၚ်လဝ် ဟွံအောန်နူ ၇၄၁ ဝါတုဲ ၜိုတ် ၉၀ တၟံကၠံဂှ်ဝွံ ကြဴနူလေလောၚ်တြးဒေါအ်ပန်ပှော် ဂိတုဨပရဴ ၂ တုဲဂှ် ဗ္တိုက်ကၠုၚ်လဝ်ရ။
မ္ၚးနူကဵုဒၞါဲပရေၚ်ပၞာန် ကြံၚ်မ္ၚိုဟ်ဒၟံၚ် ပ္ဍဲကဵုကချေၚ်၊ ကရေၚ်၊ သေံ၊ သက်ကိုၚ်၊ မဂွဵု ကေုာံ ရခေၚ်တံဂှ် ပ္ဍဲကဵုဍုၚ်ကွာန် ပဋိပက္ခဟွံမွဲတံဂှ်လေဝ် ကံၚ်ဇြဳပၞာန် ထောံမခတိုဟ်ဗ္တိုက်ဒၟံၚ် နူကဵုပၞာန်ကျာတုဲ တွဵုရးကချေၚ် ဒးဒုၚ်ဗ္တိုက်လဝ်ဂၠိုၚ်အိုတ်ရ။
ပရေၚ်ဗ္တိုက်ပၞာန်ကျာဂှ်ဝွံ ရပ်စပ်စကာက္ၜၚ်ကျာဗ္တိုက်၊ ဒရုၚ် ကေုာံ က္ဍိုက်ကျာစုတ်လဝ်စက်တံဂှ်တုဲ ကံၚ်ဇြဳပၞာန် ကၠောန်သ္ပကၠုၚ်ဒၟံၚ်ရ။
ပ္ဍဲအရာကၠောန်ကၠုၚ်သာ်ဏံဂှ် မ္ၚးနူပွန်ပရေၚ်ပၞာန်ဂှ် ပ္ဍဲဒေသ ကံၚ်ဇြဳပၞာန် ထိၚ်ဟွံမာန်တံဂှ် အရာပ်မၞိဟ်ဒၟံၚ်၊ ကွာန်၊ ရုၚ်ဂဥုဲ၊ စမြိုၚ်ဘုတ်ဘာ ကေုာံ ဘာဗ္တောန်လိက်တံလေဝ် ပါလုပ်ရောၚ် ISP-Myanmar လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ