ဗြဝတဳ၊ မေ ၂၈
ပ္ဍဲတွဵုရးကရေၚ် ခရိုၚ်ဗြဝတဳ ဒေသဝဝ်လေ ပ္ဍဲကွာန်(သေဘောဘိုး) ဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ ဒပ်မဟာ ၆ KNLA ဒှ်ဒၟံၚ်ပေါဲဗ္တိုက်တုဲ ဟိုတ်နူပေါဲဗ္တိုက်ဂှ်တုဲ ညးဍုၚ်ကွာန်ဒေသ လၟိဟ်ဗ္ဒါဲ ၃၀၀ ဒးဂြိပ်လုပ် လ္ပာ်ဍုၚ်သေံဂှ် တမ်ရိုဟ်ပရိုၚ်ဒပ်ပၞာန်သေံ လလောၚ်ပ္တိတ်လဝ်ရ။
ဗ္ဒိုပ်ဒပ်ကံၚ်ဇြဳပၞာန် နွံပ္ဍဲကွာန်(သေဘောဘိုး) သ္ကုတ်သၠုၚ်ကျာဍုၚ်ဗြဝတဳ တိဍာ်ဒပ်မဟာ ၆ ပွိုၚ်ဍုၚ်ကအ်ကြိက် ခရိုၚ်ဒူပလာယာဂှ် ပ္ဍဲဂိတုမေ ၂၇ တေံ ဒပ်ပံၚ်ကောံမဟာမိတ် သၟဝ်သ္ကိုပ်သ္က ဒပ်မဟာ ၆ ဒပ်ပၞာန်ဗၠးၜးကောန်ဂကူကရေၚ် KNLA တံ ဗ္တိုက်ဒၟံၚ် နကဵုဒရုၚ်၊ သနာ်ပါရ။
လ္ပာ်ဒပ်ကံၚ်ဇြဳပၞာန်ဂှ်လေဝ် ကလေၚ်တဝ်စၞေဟ်လဝ် နကဵုလွဟ်ဇၞော်တုဲ ပေါဲဗ္တိုက်ၜါလ္ပာ် ဒှ်လဝ်သ္ကာတ်မြဟ်တုဲ ဟိုတ်နူပေါဲဗ္တိုက်ဂှ်တုဲ ညးဍုၚ်ကွာန်ဒေသ နူကဵုကွာန်(သေဘောဘိုး) ကီု သီုကဵုကွာန်ဗ္ဒါဲဗ္ဒါဲဂှ်ဂမၠိုၚ် လၟိဟ်မၞုံ ၜိုတ် ၃၀၀ ဝွံ ဂြိပ်စိုပ်ကၠုၚ် လ္ပာ်ဍုၚ်သေံ ခရိုၚ်တက် ပွိုၚ်ဍုၚ်ဖုတ်ဖရ ပိဒၞါဲဂှ် တမ်ရိုဟ်ပရိုၚ်ဒပ်ပၞာန်သေံ ထ္မံက်ထ္ၜးလဝ်ရ။
ညးဍုၚ်ကွာန်ပါဲဒဴဘဲပၞာန်ဍုၚ်ဗမာ ဂြိပ်စိုပ်ကၠုၚ်တအ်ဂှ် သၟိၚ်တၠအဝဵုဒပ်ပၞာန်သေံတအ် ကဵုလဝ်အရီုဗၚ် ပရေၚ်ဗ္စာရဏာမၞိဟ်တုဲ ပရေၚ်ဂီုကၠီုပယျဵုဂှ်လေဝ် မၚ်ရံၚ်ဒၟံၚ် နကဵုဇြဟတ်ပေၚ်ၚ်ရောၚ် တမ်ရိုဟ်ပရိုၚ်ဒပ်ပၞာန်သေံ ကဵုလဝ်သမ္တီရ။
ဗ္ဒိုပ်ဒပ်(သေဘောဘိုး) နွံကရပ်ဂၠံၚ်ကွဳစက် ဗြဝတဳ−ဝဝ်လေတုဲ မဒးဒုၚ်ကၟာတ်လဒဵုဗ္တိုက်လဝ် ကုဒပ်ပံၚ်ကောံ ဒပ်မဟာ ၆ KNLA ဂှ် သွက်ဂွံကဵုအရီုဗၚ်ပၞာန် ကုဗ္ဒိုပ်ဒပ်ဏံဂှ် ပ္ဍဲဂိတုမေ ၂၇ ပယျာံနူဂယးဂှ် ဒပ်ကံၚ်ဇြဳပၞာန် ထ္ပက်ကၠုၚ်ဒၟံၚ်ကရောၚ်ပၞာန် နူကဵုဗျူဟာဝဝ်လေဂှ်လေဝ် ဂွံတီကေတ် အတိုၚ်ဂလာန် တမ်ရိုဟ်ပရိုၚ်အပ္ဍဲဒေသတံရ။
ဗ္ဒိုပ်ဒပ်ကံၚ်ဇြဳပၞာန် နွံပ္ဍဲဒေသဝဝ်လေ တွဵုရးကရေၚ်ဂှ် စနူဂိတုမေ ၂၀ တုဲကၠုၚ်တေံတုဲ ဒပ်ပံၚ်ကောံမဟာမိတ် သၟဝ်သ္ကိုပ်သ္က ဒပ်မဟာ ၆ KNLA တအ် ဗိုၚ်ကၟာတ်လဒဵု ထ္ပက်ပၞာန် ဗ္တိုက်လဝ်တုဲ ပ္ဍဲဂိတုမေ ၂၃ အခိၚ်ဇိုၚ်သဝ်တ္ၚဲဂှ် ဒပ်ပံၚ်ကောံ KNLA KNDO PDF တအ် သီဂွံလဝ် ဗ္ဒိုပ်(ဘလယ်ဒို) ဗ္ဒါဲပယျဵုသေံတုဲ ကလိဂွံလဝ် မကမ်လွဟ်လက်နက် ဗွဲမဂၠိုၚ်ဂၠေၚ်ရ။
လ္တူဂၠံၚ်ကွဳစက် ဗြဝတဳ−ဝဝ်လေ ဂှ် မ္ၚးနူဗ္ဒိုပ်ဒပ်ကံၚ်ဇြဳပၞာန် ဗ္ဒိုပ်(သေဘောဘိုး၊ ဥကရစ်ထ၊ ဝါးမီးထ၊ ဝေါ်လေဗျူဟာ) ဂှ် ဗ္ဒိုပ်မဝ်ခဳ၊ ကနေဝ်လေ၊ ထဳကပလေဝ် တံ သှ်ေဒၟံၚ်ဏီတုဲ ဒပ်ပံၚ်ကောံပၠန်ဂတးတံ ဗ္တိုက်ဒၟံၚ်ဗ္ဒိုပ်တံဏံဂှ်လေဝ် ဂွံတီကေတ် အတိုၚ်ပရိုၚ်အပ္ဍဲဒေသရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ