ကျာ်ထဝ်၊ မေ ၂၈
ပ္ဍဲတွဵုရးဍုၚ်မန် ပွိုၚ်ဍုၚ်ကျာ်ထဝ်ဂှ် ကရောၚ်ပၞာန်ကံၚ်ဇြဳပၞာန် ၜိုန်ကလေၚ်ဆုတ်အာဒပ်ကီုလေဝ် ပန်ပှော်ဒၟံၚ်ကဵုလွဟ်ဇၞော် ဆက်နွံဒၟံၚ်တုဲ ညးဍုၚ်ကွာန်ပါဲဘဲပၞာန် ၁၇၀၀၀ ပြၚ် ဟွံဂံၚ်စဴဌာန်ဒၟံၚ်ဏီပုဟ်ဂှ် ဂွံတီကေတ် နူခရိုၚ်သဓီု KNU ရ။
ကရောၚ်ပၞာန်ကံၚ်ဇြဳပၞာန် ဇြဟတ် ၜိုတ်လ္ၚီနွံဂှ်ဝွံ စနူဂိတုမေ ၂၆ တုဲ ကလေၚ်ဆုတ်အာ ဇရေၚ်တမ်ဒပ်ဖျေံသ္ဇိုၚ်ကျာ်ထဝ်၊ ဒုၚ်သယိတ် ကေုာံ ဝဝ်ရ။
ကရောၚ်ပၞာန်ဂမၠိုၚ် ၜိုန်ကလေၚ်ဆုတ်အာကီုလေဝ် အရိုဟ်ဒဒှ်တ္ၚဲ လ္ပာ်ဒပ်ကံၚ်ဇြဳပၞာန် ဆက်ပန်ပှော်ဒၟံၚ်ကဵုလွဟ်ဇၞော် ပ္ဍဲကဵုပွိုၚ်ဍုၚ်ကျာ်ထဝ် ပ္ဍဲကွာန်ဂမၠိုၚ် ဒၞါဲညးဍုၚ်ကွာန်ကောန်အရာပ်မံၚ်တန်တဴဂှ်ရ။
ညးဒေသပါဲဘဲပၞာန်ဂမၠိုၚ်ဝွံ ဟိုတ်နူဘဲလွဟ်ဇၞော်တုဲ ဒးဆက်မံၚ်ဒၟံၚ် အပ္ဍဲဒဵုဂြိုပ်တုဲ ဟိုတ်နူစိုပ်ကၠုၚ်အခိၚ်ဗြဲဂှ်ရ နွံပၟိက်ဒၟံၚ်ကဵု အရီုဗၚ်ဒၞါဲစ္ၜုဲစ္ၜော် ဂၠိုၚ်တိုန်ကၠုၚ်ဂှ် ပဒိုဝ်သဝ်အေနာၚ် ညးမၞုံအခေါၚ်ဟီုဂး ခရိုၚ်သဓီု KNU ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ညးဍုၚ်ကွာန်ပါဲဘဲပၞာန်ဂမၠိုၚ်ဝွံ အခိၚ်ပါဲဘဲပၞာန် ဂၠိၚ်သ္ၚောဲကၠုၚ်ဗက် ဂဥုဲဇဗဇွောံမစၞစတံ မပါလုပ် အရီုဗၚ်ပရေၚ်ဗ္စာရဏာမၞိဟ်တံဂှ် နွံပၟိက်ကၠုၚ်ဒၟံၚ်ရောၚ် သ္ဂးရ။
မွဲလ္ပာ်ဂှ်ပၠန် ကရောၚ်ပၞာန်ကံၚ်ဇြဳပၞာန်ဝွံ ကၠာဟွံဂွံဆုတ်ကလေၚ်ဂှ် လုပ်ကၠတ်ဂၠံက်လဝ် သ္ၚိအပ္ဍဲဂကောံကွာန်ဝေန်ကာန် ဗ္ဒါဲ ၂၀၀ မတုဲ သီုကဵုယိုက်ကေတ်ဏာလဝ် ကပေါတ်မၞုံကဵုၚုဟ်မး ဗွဲမဂၠိုၚ်ဂၠေၚ်ရ။
အတိုၚ်တၚ်နၚ် ခရိုၚ်သဓီု ဗော်သွးကောန်ဂကူကရေၚ် KNU မ္ဂး ပ္ဍဲပွိုၚ်ဍုၚ်ကျာ်ထဝ်ဂှ် ဟိုတ်နူဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်ကီု သီုကဵုဗ္တိုက်ကဵုလွဟ်ဇၞော်ကေုာံပၞာန်ကျာတံဂှ်တုဲ နူကဵု ၃၆ ကွာန် လၟိဟ်မၞိဟ် ၁၇၀၀၀ ပြၚ် ဒးပါဲမံၚ်ဘဲပၞာန်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ