နေဗျဳဒဝ်၊ မေ ၂၈
ပ္ဍဲဍုၚ်ဗၟာ အပ္ဍဲကာလသီအဝဵုဏံ ပရေၚ်ပၠောပ်ပ္တိတ်ဗၞိက် ဟွံလုပ်သၞောဝ်တံ ဂၠိုၚ်ကၠုၚ်ရောၚ် ဒုက္ဍိုပ်သ္ကိုပ်ပၞာန် ဒုသ္ကိုပ်ပၞာန်ဇၞော် သဵုဝေန် ဒုၚ်လဝ်ဝန်ရ။
ဒုက္ဍိုပ်သ္ကိုပ်ပၞာန် ဒုၚ်လဝ်ဝန် ပ္ဍဲကောံဓရီုပညဳပညပ်ကမၠောန် ကမ္မတဳက္ဍိုက်ပ်ဗ္တိုက်သရိုဟ်ပရေၚ်သွံရာန်ဗၞိက် ဟွံလုပ်သၞောဝ် ကံၚ်ဇြဳပၞာန် မကၠောန်ဗဒှ်လဝ် ပ္ဍဲနေဗျဳဒဝ် ပ္ဍဲဂိတုမေ ၂၆ ဂှ်ရ။
ဟိုတ်ဂှ်ရ သွက်ဂွံဆက်ရေၚ်တၠုၚ် ကမၠောန်ဗ္တိုက်သရိုဟ်ပရေၚ်သွံရာန်ဗၞိက် ဟွံလုပ်သၞောဝ် နကဵုအသိၚ်အလိုန်ကီု အပ္ဍဲဍုၚ် သွက်ဂွံရပ်ဒက် ဗွဲမစိုပ်တရဴဂှ် စၞောန်ကၠုၚ်လဝ် ကုဌာနမဆေၚ်စပ် သၟဝ်တဲညးရ။
သွက်ဂွံရပ်ဒက် ပရေၚ်သွံရာန်ဗၞိက်ဟွံလုပ်သၞောဝ်တံဂှ် လှာဲဂတးပရိုၚ် ကုဍုၚ်ဇိုၚ်ဝုတ်ဒိုဟ်ဂမၠိုၚ်၊ အလဵုအသဳ ဌာနဝန်ဇၞော်ရေၚ်သ္ကအ် ပညဳတုဲ ဂွံပံၚ်တောဲရေၚ်တၠုၚ်အာဂှ် စၞောန်ပ္ညုၚ်လဝ်ရ။
တၠကမၠောန်ပရေၚ်ပိုန်ဒြပ်မွဲတၠဂှ်တှ်ေ ပရေၚ်သွံရာန်ဗၞိက်ဟွံလုပ်သၞောဝ်တအ် ဂွံဒှ်ကၠုၚ်ဂှ်ဝွံ ဂွံကၠောန်ဗွဲမလုပ်သၞောဝ်ဂှ် အခက်အခုဲနွံကၠုၚ်ကီု သီုကဵုဂလိုၚ်ပ္တိုန်လဝ်သၞေဟ်ကၚ် မဟွံလုပ်သၞောဝ်တံ ဂၠိုၚ်ဂှ်ဏောၚ် ပါ်ပါဲလဝ်ရ။
ဗၞိက်ပၠောပ်ဗၞိက်ပ္တိတ်တံဏံ ဒှ်အခက်အခုဲညိညဟီုဂှ် ဂွံကၠောန်နကဵုဂၠံၚ်လုပ်သၞောဝ်ဂှ် ဝါတ်ဂါတ်ညိညဂှ်ရ အာနကဵုဂၠံၚ်ဟွံလုပ်သၞောဝ်ဂှ် ဒှ်ကၠုၚ်ရ။ သၞေဟ်ကၚ်ဂမၠိုၚ် ဂၠိုၚ်တိုန်ကၠုၚ်တၟာဂလိုၚ်။ ဟိုတ်ဂှ်ရ ပရေၚ်သွံရာန်ဗၞိက် ဟွံလုပ်သၞောဝ်တအ် ဂၠိုၚ်ကၠုၚ်ရ” သာ်ဝွံ သ္ဂးရ။
ဒုက္ဍိုပ်သ္ကိုပ်ပၞာန်ဂှ်တှ်ေ စပ်ကဵုပရေၚ်သွံရာန်ဗၞိက်ပယျဵုဂှ်တုဲ ဟိုတ်နူအကာဲအရာပရေၚ်ဂီုကၠီုတိဍာ်တုဲ ပရေၚ်သွံရာန်ဗၞိက်ပယျဵု ဒးဒေါအ်ဇူလဝ်ခေတ္တဂှ်ရ ပွမပၠောပ်ပ္တိုန်ကပေါတ်ဗၞိက်ဟွံလုပ်သၞောဝ်တအ် ဂၠိုၚ်တိုန်ကၠုၚ်လဝ်ရောၚ် ဒုၚ်လဝ်ဝန်ရ။
သွက်ဂွံဗ္တိုက်သရိုဟ် ပရေၚ်သွံရာန်ဗၞိက်ဟွံလုပ်သၞောဝ် ဗွဲမစိုပ်တရဴမာန်ဂှ် နကဵုကံၚ်ဇြဳပၞာန် ပပ္တံနူသၞာံ ၂၀၂၂ တုဲ ကလေၚ်ဒက်ပ္တန်လဝ် ကမ္မတဳတုဲ အပ္ဍဲပွိုၚ်ပိသၞာံကဵု ပန်ဂိတုဂှ် နဒဒှ်ပရေၚ်သွံရာန်ဗၞိက်ဟွံလုပ်သၞောဝ်ဂှ် ရပ်ဂွံလဝ်ကွဳစက်၊ ကွဳလိုန်ဓာတ် လာၚ်ဇြေန်ဟွံမွဲ ဂၠိုၚ်အိုတ်ရောၚ် သ္ဂးရ။
ကပေါတ်ရပ်ဂွံသာ်ဏံဂှ် ညံၚ်ဂွံဒးဆောံလေၚ်အောန်အိုတ်ဂှ် ထိၚ်ဒဝ်ကီု၊ လ္ပာ်သၞောဝ်ဥပဒေ စၟဳတ်တံဂှ်လေဝ် စၟဳတ်ပြဟ်ဟ်တုဲ ပါ်သွံတြးသၟးဟွံက သွက်ဂွံသီကေတ် နဒဒှ်သြန်ဘဏ္ဍာကၟိန်ဍုၚ်ဂှ် ဒုက္ဍိုပ်သ္ကိုပ်ပၞာန် စၞောန်ကၠုၚ်လဝ်ဏီရ။
အတိုၚ်တၚ်လလောၚ်တြး ကံၚ်ဇြဳပၞာန်ဂှ်မ္ဂး ကြဴနူကလေၚ်ဒက်ကမ္မတဳက္ဍိုက်ပ် ဗ္တိုက်သရိုဟ်ပရေၚ်သွံရာန်ဗၞိက် ဟွံလုပ်သၞောဝ်တုဲဂှ် ထ္မံက်ပ္တိတ်ရပ်ဂွံလဝ် ဂဗုတ် ၂၀၀၀၀ ပြၚ်၊ စဵုကဵုၚုဟ်မး ၅၇၆ ဗဳလျာန်ဒ္ကေဝ်ရောၚ် သ္ဂးလဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−MOI