မတ်မလီု၊ မေ ၂၈
သွက်ဂွံသောၚ်ကလး ပြဒ္ဒညာပရေၚ်ဍုၚ်ဗၟာတုဲ ပေါဲရုဲမာဲကံၚ်ဇြဳပၞာန် မကၠောန်ဗဒှ်အာဂှ်ဝွံ ဒှ်ကိစ္စအာဇြဳယာန် ကဵုက္ဍိုပ်ဟွံသေၚ်တုဲ အကာဲအရာပဋိပက္ခသာတုဲပရေံစှ်ေအာမာန်ရောၚ် ဝန်ဇၞော်ကာဍုၚ်သ္အာၚ်မလေဝ်ယှာ မိုဝ်ဟာမက် ဟာသာန် ကဵုလဝ်သတိရ။
ကၠာဟွံဂွံကၠောန်ကောံဓရီုအာဇြဳယာန် ပ္ဍဲဍုၚ်မလေဝ်ယှာ ဍုၚ်ကွာလာလာမ်ပူဂှ် ကၠောန်ဗဒှ်လဝ်ကောံဓရီုဝန်ဇၞော်ကာဍုၚ်သ္အာၚ်အာဇြဳယာန်တုဲ ဟီုလဝ် ပ္ဍဲပေါဲသောၚ်ကလးလိက်ပရိုၚ် ပ္ဍဲဂိတုမေ ၂၅ ဂှ်ရ။
ပေါဲရုဲမာဲဝွံ သွက်ဂွံကၟာတ်လဒဵုဓဝ်ဍာံ အကြာဍုၚ်သ္အာၚ်တုဲ ဒှ်ပြဝပလေဝ်ပလေတ်မံၚ်မွဲတုဲ အဓိပ္ပာယ်ဟွံမွဲတုဲ အကာဲအရာ သာတုဲပရေံစှ်ေကၠုၚ်မာန်ဂှ်ရ နကဵုကံၚ်ဇြဳပၞာန် သွက်ဂွံဒ္ဂေတ်ဗက် တၚ်တုပ်စိုတ်အာဇြဳယာန် ၅ သာ်ဂှ် အာတ်မိက်လဝ်ရ။
ထ္မံက်ရုပ်ရဴ တၚ်တုပ်စိုတ်အာဇြဳယာန် ၅ သာ်ဏံတုဲမှဟေၚ် သွက်ဂွံကၠောန်ပရေၚ်သဳကၠဳစပ်ကဵုပေါဲရုဲမာဲဂှ် ဟီုလဝ်တုဲ လၟေၚ်ကမၠောန်ပ္ညဳပ္ညပ်သီုညးဖအိုတ်ပါလုပ် အံၚ်ဇၞးမှဟေၚ် ဒက်ပ္တန် အလဵုအသဳဒဳမဝ်ကရေဇြဳမဍာံပြမွဲမာန်ဏောၚ်ဂှ် ဝန်ဇၞော်ကာဍုၚ်သ္အာၚ်မလေဝ်ယှာ ဟီုဂးလဝ်ရ။
သ္ကိုပ်ဗိုလ်ဇၞော် သဝ်ကျဝ်ညောအ် ညးမၞုံအခေါၚ်ဟီုဂး မဟာမိတ်ဒေါအ်ပန်ပှော် ၇ ဂကောံဂှ် နူကဵုမလေဝ်ယှာ စပ္တိတ်ကၠုၚ်ဇြဟတ် အကာဲအရာပေါဲသဳကၠဳ သီုညးဖအိုတ်ပါလုပ်မာန် ဂွံဒှ်ဂှ်ဝွံ စၟဳစ နဒဒှ်သ္ဇက်သ္ပပဓာန်ဂွံဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“အာဇြဳယာန်ပ္တိတ်ဒၟံၚ်ဇြဟတ် ညးမဆေၚ်စပ်သီုဖအိုတ်ပါလုပ်တုဲ ဂွံတက်ကျာဟီုဂှ် အခိၚ်ဏံ တၚ်ကော်ဆဴနွံတၟာဂလိုၚ်ဂှ်တှ်ေ ဒှ်ဓဝ်ဍာံတုဲ ပိုယ်တံ ဒးဒုၚ်တဲဏောၚ်။ သာ်လဵုဒှ်ဒှ် စၞးမုဟွံကၠောန်ဂှ် လၟုဟ် နူကဵုမလေဝ်ယှာ စဂိုတ်ဂ္စါန် ချဳဒရာၚ်ကၠုၚ်ဂှ် နကဵုပိုယ် စၟဳစ နဒဒှ်သ္ဇက်ဂွံပပဓာန်မွဲဏောၚ်ဂှ် ထေၚ်ကေတ်ရ” သာ်ဝွံ သ္ဂးရ။
ပေါဲရုဲမာဲကံၚ်ဇြဳပၞာန် မကၠောန်ဗဒှ် ကၞောတ်သၞာံဏံဂှ် ကၟိန်ဍုၚ်ဇြဟတ်ဇၞော် ညံၚ်ရဴဍုၚ်ကြုက်ကဵုဍုၚ်ရုယှာဂှ် ထံက်လဝ်ဂလာန်ပေၚ်ၚ်တုဲ အရီုဗၚ်နွံပၟိက်တံဂှ်လေဝ် သွက်ဂွံထံက်ပၚ်ကဵုအာ နွံဒၟံၚ်ရ။
ကံၚ်ဇြဳပၞာန်ဂှ်လေဝ် ၜိုန်ဒေါအ်လဝ်ပန်ပှော် စဵုကဵုဂိတုမေအိုတ်ကီုလေဝ် စွံပွန်ကုကောန်အရာပ်တုဲ ဗ္တိုက်ဒၟံၚ်ပၞာန်ကျာ ပ္ဍဲဘာဗ္တောန်လိက် ပ္ဍဲဒၞါဲမဆေၚ်စပ်ကဵုညးဂမၠိုၚ်ရ။
မွဲလ္ပာ်ဂှ်ပၠန် နူဍုၚ်အာဇြဳယာန်ဂမၠိုၚ် မပ္တံကဵုဍုၚ်ဗဳယေတ်နာမ်၊ ဍုၚ်သေံ၊ ဍုၚ်သေန်ကာပေါဝ်၊ ဍုၚ်မလေဝ်ယှာ ကေုာံ ဍုၚ်အေန်ဒိုဝ်နဳယှာတအ်ဂှ် ကမ္ပဏဳနူဍုၚ်တအ်ဏံ ၅၄ ဝွံ ထံက်ပၚ်ရီုဗၚ်ဒၟံၚ်ကံၚ်ဇြဳပၞာန် အခေါန်ဖလှာ၊ ကၠေၚ်က္ၜၚ်ကျာ ကေုာံ နဲကွတ်ပညာတံဏောၚ်ဂှ် Justice For Myanmar ကဵုလဝ်သမ္တီ ပ္ဍဲဂိတုမေ ၂၄ တေံရ။
ဟိုတ်နူအကာဲအရာတံဏံတုဲ သွက်ဂွံကၠောန်ဗဒှ်ပေါဲရုဲမာဲ နကဵုကံၚ်ဇြဳပၞာန် မကလိဂွံလဝ်ပရေၚ်ထံက်ဂလာန် နူကဵုဍုၚ်ဇြဟတ်ဇၞော်လ္ၚဵုတအ်ဂှ် တၚ်တုပ်စိုတ် ၅ သာ်ကီု သီုအာဇြဳယာန်ဂှ် ညးတအ် ဟွံသ္ပဂရုပုဟ်ဂှ် ညးလ္ၚတ်ဂမၠိုၚ် ထံက်ထ္ၜးလဝ်ရ။
ညးမဆေၚ်စပ်ကဵုပရေၚ်ဍုၚ်ဗၟာအိုဿီု ဂွံဒေါအ်ပန်ပှော်ဂှ် နွံပၟိက်ဒၟံၚ်ကဵု ပရေၚ်ဆဵုဂဗသဳကၠဳတုဲ သွက်ဂွံခါန်ကၞက်ပ္တိုန် ကလုတ်တၟေၚ်အာဇြဳယာန် မဆေၚ်စပ်ကဵုဍုၚ်ဗၟာ မွဲတၠ ပွိုၚ်ပိသၞာံဂှ် တုပ်လဝ်စိုတ် အပ္ဍဲဂကောံအာဇြဳယာန်ရောၚ် ဝန်ဇၞော်ကာဍုၚ်သ္အာၚ်မလေဝ်ယှာ ဟီုလဝ်ရ။
အလဵုအသဳညဳသၟဟ်ဂကူ NUG ဂှ်တှ်ေ ပွမကရေပ်ဓရတ်တုဲ ကဵုသဳကၠဳပညဳပညပ် ကေုာံ ကဵုဒေါအ်ပန်ပှော်ဂှ်ဝွံ ဍေံဟွံဒှ်အထံက်အပၚ် ညံၚ်ပြဒ္ဒညာဂွံပြေလာဲ ဍာ်ဇမၠိၚ်ပုဟ်ဂှ် ဥူကျဝ်ဇြဝ် ညးမၞုံအခေါၚ်ဟီုဂး ရုၚ်သမ္မတ ဟီုရ။
နကဵုအာဇြဳယာန် ညံၚ်တၚ်ဒတူလိုၚ် လစွံစိုတ်တုပ် ဂွံမံက်ဂတဝ်ကၠုၚ်၊ ဇြဟတ်ပၠန်ဂတးရေၚ်သ္ကအ် ဂွံဆဵုဂဗသဳကၠဳ အကာဲအရာဏံဂွံဒှ်ကၠုၚ်မာန် ထေက်ကဵုဒးကဵုအရီုဗၚ်ကၠာထေက်ရောၚ် ဟီုလဝ် ပ္ဍဲအစဳဇန်ဟီုဗ္ကန် ဗ္စိုပ်ညးဍုၚ်ကွာန်ကေုာံဍုၚ်သ္အာၚ်ရ။
သ္ကိုပ်ဝန်ဇၞော်မလေဝ်ယှာ အာန်ဝါဂှ်လေဝ် ပ္ဍဲအရာသောၚ်ကလး အကြေပ်အဂြတ်ဍုၚ်ဗၟာဂှ် ပရေၚ်ဆက်ဆောံသ္ၚိတ်တ်ဂှ်ဝွံ ပါလုပ်ဒၟံၚ် နူကဵုအခန်ကဏ္ဍ ပၟိက်ဇၞော်ဏောၚ်ဂှ် ဟီုဏာလဝ်ဂလာန် ပ္ဍဲကောံဓရီုအာဇြဳယာန် မရနုက်ကဵု ၄၆ ဝါဂှ်ရ။
နကဵုဍုၚ်မလေဝ်ယှာ မကေတ်လဝ်တာလျိုၚ် နဒဒှ်ဥက္ကဌအာဇြဳယာန်ဒးအလန်ဂှ် အပ္ဍဲဂိတုဨပရဴတုဲကၠုၚ်တေံ သ္ကိုပ်ဝန်ဇၞော် အာန်ဝါ ဆဵုဂဗလဝ်ကဵု က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ပ္ဍဲဍုၚ်ၜၚ်ကံက်တုဲ ကုအလဵုအသဳ NUG လေဝ် ဆဵုဂဗလဝ် နူကဵုလပှ်ကျာရ။
ပရိုၚ်−သြၚ်လောန်တိုၚ်(မ်)
ဗီုရုပ်−Asean FB