ပဠဝ်၊ ဂျူလာၚ် ၁
ပၞောဝ်ကဵုမၞိဟ်တြုံ နူဍုၚ်သေံ ဍုၚ်ရနံၚ် မဒးဒုၚ်ပလံၚ်ဖျဴ လ္ပာ်ဍုၚ်ဗမာ ဍုၚ်ကအ်သံၚ်ဂှ် ညးမလုပ်ပၞာန်ဂွံသီုဖအိုတ်ဂှ် ဒးဒုၚ်ပလံၚ်ဏာဒၟံၚ် ဘာတန်ဗ္တောန်ကွတ်ပၞာန်တံဂှ်ရောၚ် ညးဒုၚ်တာလျိုၚ်လလောၚ်ပရိုၚ် ခရိုၚ်ဗိက် တမ်ဒပ်လၟိဟ် (၁) ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
မၞိဟ်တြုံ မပလံၚ်ဖျဴနၚ် နူဍုၚ်သေံတံဂှ် ပကောံစွံလဝ် ပ္ဍဲတမ်ဒပ်ကံၚ်ဇြဳပၞာန် ဖျေံသ္ဇိုၚ်ကအ်သံၚ်ဂှ်တုဲ ပလံၚ်ဏာလဝ် ဇရေၚ်ဘာပ္ကတ်ပ္ကေၚ်ဒပ်ပၞာန် စၟတ် (၁၂) ဍုၚ်ပလံက်(တိုၚ်းဗိုလ် ၁၂) နူဂၠံၚ်ဍာ်မွဲကဆံၚ်တုဲ ကဵုယိုက်ဒၟံၚ်လျိုၚ်ပၞာန်ရောၚ် သ္ဂးရ။
ဒဒှ်ရလ္ပာ်ကံၚ်ဇြဳပၞာန်တအ် ပကောံဒၟံၚ်ညးမဒးဒုၚ်ပလံၚ်ဖျဴနၚ်ဍုၚ်ဗၟာ ဗွဲအဓမ္မ သွက်ဂွံယိုက်လျိုၚ်ပၞာန်ဂှ် ဂွံတီကေတ် နူကဵုညးဒေသကဵုပရိုၚ်တံကဵု ညးမဂြိပ်တိတ်နူ ဘာတန်ဗ္တောန် (တိုၚ်းဗိုလ် ၁၂) တံဂှ်ရောၚ် သ္ဂးရ။
ကောန်ဒပ်ကံၚ်ဇြဳပၞာန်တအ် အခါပလံၚ်ကောန်ပၞာန်သ္ဂောံယိုက်လျိုၚ်ပၞာန် နူကအ်သံၚ် စဵုစိုပ်ပလံက်ဂှ် နူကဵုဂၠံၚ်ကုန် လ္ပာ်ဂကောံပၠန်ဂတးတအ် ထိၚ်ဒက်ဂွံလဝ်ဂှ် ဟွံအာတုဲ နူကဵုက္ၜၚ်ပၞာန် ပလံၚ်ဏာဒၟံၚ် နကဵုဂၠုၚ်ဒုန်၊ ဂၠုၚ်ဍေန်လဝ်ပၟတ်တံဂှ်တုဲ ပလံၚ်ဒၟံၚ်ဇရေၚ် (တိုၚ်းဗိုလ် ၁၂) ရောၚ် သ္ဂးအိုတ်ရ။
မၞိဟ်မပကောံလဝ် ပ္ဍဲကဵု(တိုၚ်းဗိုလ် ၁၂) သွက်တန်ဗ္တောန်ကွတ်ပၞာန် လၟေၚ် ၁၄ ပံက်အာခြာဟွံလအ်ဏံဂှ် နွံဒၟံၚ် ဗၞတ် ၁၀၀၀ ရောၚ် သ္ဂးရ။
ပ္ဍဲကဵုဘာတန်ဗ္တောန်ဏံဂှ် တန်ဗ္တောန်ကွတ်ပၞာန် မွဲမွဲလၟေၚ်ဂှ် ပ္ကတ်ပ္ကေၚ်ကဵုဒၟံၚ် လၟိဟ်မၞိဟ် ၃၀၀ တုဲ ယဝ်ပံက်အာလၟေၚ် ၁၄ ဏံဏောၚ်မ္ဂး ကောန်တန်ဗ္တောန်ကွတ်ပၞာန် နွံကၠုၚ် ၄၀၀၀ ပြၚ်ရ။
ပ္ဍဲကဵုညးဒးဒုၚ်ပကောံပလဝ်ကောန်ပၞာန်ဂမၠိုၚ် ညးဟွံမိက်ပကောန်ပၞာန်၊ ညးဟွံမိက်တိုန်စိုပ် တန်ဗ္တောန်ကွတ်ပၞာန်တအ်ဂှ်လေဝ် နွံဒၟံၚ်တုဲ ဂြိပ်တိတ်ဒၟံၚ် နကဵုနဲကဲနာနာသာ်တုဲ ကောန်တန်ဗ္တောန် ဂြိပ်တိတ်ဖျေံကၠုၚ်လွဟ် ဇရေၚ်တမ်ဒပ်လၟိဟ် ၁ ခရိုၚ်ဗိက်ဂှ် နွံကၠုၚ် စဵုကဵု ၆ တၠယျတုဲ မၞိဟ်လုပ်စိုပ်ဖျေံကၠုၚ်လွဟ် ဇရေၚ်ဂကောံပၠန်ဂတးတၞဟ်ဟ်တံလေဝ် နွံဒၟံၚ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−MOI
