ပ္ဍဲကျံက်ကျဳ ဟိုတ်နူကံၚ်ဇြဳပၞာန် ဗ္တိုက်ကၠုၚ်ကဵုပၞာန်ကျာတုဲ မၞိဟ် ၅ တၠ ကလိဂွံဝပ်တုဲ ကောန်ၚာ်သၟတ် ၃ တၠပါလုပ်

ကျံက်ကျဳ၊ ဂျူလာၚ် ၁
ပ္ဍဲရးဗဂေါ အပ္ဍဲပွိုၚ်ဍုၚ်ကျံက်ကျဳဂှ် တုဲကၠုၚ်ဂိတုဂျောန် ၂၈ တေံ ဟိုတ်နူဒပ်ကံၚ်ဇြဳပၞာန် ဗ္တိုက်ကၠုၚ်ကဵုပၞာန်ကျာတုဲ ကောန်အရာပ် ၅ တၠ ပါလုပ်သီုကဵုကောန်ၚာ်သၟတ်တအ် ဇီုကပိုက်ကလိဂွံလဝ်ဝပ်တုဲ သ္ၚိဒၟံၚ်ဂမၠိုၚ်လေဝ် ဇီုကပိုက်လီုလာ်အာလဝ်ရောၚ် KNU ဗဟဵု လလောၚ်ပ္တိတ်လဝ်ပရိုၚ်ရ။
ပ္ဍဲဂိတုဂျောန် စၟတ်တ္ၚဲ ၂၈ တေံ ဒပ်ကျာကံၚ်ဇြဳပၞာန် ဗတိုက်ကၠုၚ် ပ္ဍဲကွာန်(ဟၚ်္သာဝဲ) ပွိုၚ်ဍုၚ်ကျံက်ကျဳ ခရိုၚ်ညံၚ်လေဝ်ပေန် တိဍာ် KNU ဂှ်တုဲ ကောန်ၚာ်အပ္ဍဲကွာန် ၃ တၠ မပါလုပ် ကောန်အရာပ် ၅ တၠ ဇီုကပိုက်ကလိဂွံလဝ်ဝပ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ပ္ဍဲကဵုကောန်အရာပ် ၅ တၠ ပါလုပ်သီုကဵုကောန်ၚာ်သၟတ် ၃ တၠ မကလိဂွံလဝ်ဝပ်တအ်ဂှ် ကောန်ၚာ်အာယုက် ၂ သၞာံ ၂ တၠ၊ ကောန်ၚာ်အာယုက် ၁၂ သၞာံ မွဲတၠ၊ ညးဗြဴအာယုက် ၃၀ သၞာံမွဲတၠ ကဵု မၞိဟ်တြုံအာယုက် ၂၀ သၞာံမွဲတၠ ပါလုပ်ရ။
သ္အာၚ်နူဂှ်ပၠန် အပ္ဍဲကဵုပရေၚ်ဗ္တိုက်ပၞာန်ကျာ ထောံဂြာတ်လဝ်မခတိုဟ်ဂှ် သ္ၚိအပ္ဍဲကွာန် ၉ မ ဇီုကပိုက်လီုလာ်အာလဝ်တုဲ ညးဇီုကပိုက်ကလိဂွံဝပ် ဟိုတ်နူပရေၚ်ဗတိုက်တံဂှ် လွဳလွတ်ကဵုဒၟံၚ် ပ္ဍဲဗ္ဒမ်ဂဥုဲတံဂှ်ရောၚ် ဂွံတီကေတ် အတိုၚ်တၚ်လလောၚ်တြးရ။
ပ္ဍဲဂိတုဂျောန် စၟတ်တ္ၚဲ ၂၆ တုဲကၠုၚ်တေံ ဒပ်ပံၚ်ကောံ KNLA PDF တအ် ဗတိုက်လဝ် ဒပ်ကံၚ်ဇြဳပၞာန် အပ္ဍဲပွိုၚ်ဍုၚ်ကျံက်ကျဳ၊ ရးဗဂေါဂှ်တုဲ ကောန်ဒပ်ကံၚ်ဇြဳပၞာန် ဟွံအောန်နူ ၇ တၠ ချိုတ်အာလဝ်တုဲ လ္ပာ်ဒပ်ပံၚ်ကောံတအ် ရပ်ဂွံလဝ်ဂၠုဲပၞာန် ၂၂ တၠ ကေုာံ မကမ်လွဟ်လက်နက် ဗွဲမဂၠိုၚ်ရ။
ဒပ်ကံၚ်ဇြဳပၞာန် မဒးဂိအာလဝ် အပ္ဍဲပရေၚ်ဗ္တိုက်ဏံဂှ် ဗတိုက်ကၠုၚ်လဝ်ကဵုပၞာန်ကျာ ပ္ဍဲပွိုၚ်ဍုၚ်ကျံက်ကျဳ သာ်ဏံရ။
ဒပ်ကံၚ်ဇြဳပၞာန်ဝွံ အပ္ဍဲတိဍာ်ဒပ်မဟာ ၃ ခရိုၚ်ညံၚ်လေဝ်ပေန် KNU ဂှ် ဗတိုက်ကဵုပၞာန်ကျာ၊ ပန်ပှော်ကဵုလွဟ်ဇၞော် ကေုာံ ထောံဂြာတ်မခတိုဟ်နကဵုဒရုၚ်တအ်ဂှ် ကၠောန်ဒၟံၚ်မွဲနှေံမွဲနှေံတုဲ ဟိုတ်နူပရေၚ်ဗတိုက် နူဒပ်ကံၚ်ဇြဳပၞာန်တံဂှ်တုဲ ညးဍုၚ်ကွာန်ကောန်အရာပ် ဇီုကပိုက်ကလိဂွံမံၚ်ဝပ်တအ် ဒှ်ဒၟံၚ်အဆက်က်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−KNU