တယိတ်ချံၚ်၊ ဂျူလာၚ် ၁
ပ္ဍဲရးတၞၚ်သဳ ပွိုၚ်ဍုၚ်တယိတ်ချံၚ် ဗ္ဒါဲကွာန်( ရန်တောၚ်) ဂှ် အကြာကံၚ်ဇြဳပၞာန် ကဵု ဂကောံဒပ်စဵုဒၞါဒေသတအ် ဒှ်ဒၟံၚ်ပေါဲဗ္တိုက်တုဲ ညးဍုၚ်ကွာန် ၁ တၠ ချိုတ်တုဲ လၟိဟ်မၞိဟ် ၂၀၀၀ ပြၚ် ဒးဂြိပ်ဒဴဒၟံၚ်ရောၚ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုဂျောန် ၃၀ အခိၚ်နူဂယး ၜိုတ် ၇ နာဍဳဂှ် ကရောၚ်ပၞာန်ကံၚ်ဇြဳပၞာန် ကၠုၚ်နူလ္ပာ်ထဝါဲ ဇြဟတ်မၞုံ ၁၅၀ ပြၚ်ပါဂှ်ဝွံ အခိၚ်စိုပ်ကၠုၚ် လ္ပာ်ကွာန်( ရန်တောၚ်)ဂှ် ဒှ်လဝ်ပေါဲဗ္တိုက် ကုဂကောံဒပ်စဵုဒၞါဒေသတအ် ဗွဲမသ္ကာတ်မြဟ်ရောၚ် သ္ဂးရ။
ဒပ်ကံၚ်ဇြဳပၞာန် မဖျေံလဝ်ဒပ် ပ္ဍဲသၞေဟ်ကၚ်အခေါန်ဖလှာ (ကြက်စာပြၚ်) ဂှ် ပန်ပှော်ကၠုၚ်လွဟ်ဇၞော်တုဲ ဒတုံဒးအာလဝ် ပ္ဍဲကွာန်( ရန်တောၚ်)တုဲ မၞိဟ်ဗြဴအာယုက် ၄၀ သၞာံပြၚ်မွဲတၠ ချိုတ်အာလဝ်ရောၚ် ညးဒေသမွဲတၠ ဟီုရ။
စဵုကဵုအခိၚ်လၟုဟ် အကာဲအရာဇီုကပိုက်ဒး သီုၜါလ္ပာ်ဂှ် ဟွံဂွံတီကေတ်ဏီရောၚ် သ္ဂးရ။
ဟိုတ်နူပေါဲဗ္တိုက်တုဲ ညးဒေသ ၂၀၀၀ ပြၚ် နူကဵုကွာန် ၅ ကွာန် ပါလုပ်သီုကဵုကွာန် (ရန်တောင်၊ သင်ပြွန်း၊ စော်ဖျား၊ ညောင်ဇင်) ဂှ် ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံရ။
ပေါဲဗ္တိုက်ဂှ် ဆက်ဒှ်ဒၟံၚ် စဵုကဵုဇိုၚ်သဝ်တ္ၚဲ ၃ နာဍဳပြၚ်တုဲ လ္ပာ်ကံၚ်ဇြဳပၞာန် ဆက်ပန်ဒၟံၚ်ကဵုလွဟ်ဇၞော်တအ်ရ။
ကရောၚ်ပၞာန်ဏံ မထ္ပက်ကၠုၚ်ပၞာန် လ္ပာ်ကွာန်( ရန်တောၚ်)ဂှ်ဝွံ တုဲကၠုၚ်ပ္ဍဲဂိတုမေ ၁၃ တေံ ထ္ပက်ကၠုၚ်ကရောၚ်ပၞာန် လ္ပာ်ကွာန်ကညုၚ်ကျောန် ပွိုၚ်ဍုၚ်လံၚ်လုၚ်တုဲ ဂစိုတ်လဝ်ညးဒေသ ၃ တၠရ။
ပ္ဍဲဂိတုဂျောန် ၂၆ တေံဂှ်လေဝ် လုပ်စိုပ်ဗ္တိုက်လဝ် ကောန်ဒပ်ကံၚ်ဇြဳပၞာန် မဖျေံလဝ်သ္ဇိုၚ် ပ္ဍဲကဵုဘာလကျာ် ကွာန်(မၚ်းဒပ်) ပွိုၚ်ဍုၚ်တယိတ်ချံၚ်တံဂှ်တုဲ ကောန်ဒပ်မသုန်တၠ ချိုတ်အာလဝ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ
ဟိုတ်နူပေါဲဗ္တိုက်ဒှ်ဒၟံၚ်ပ္ဍဲတယိတ်ချံၚ်ဂှ်တုဲ ညးဍုၚ်ကွာန် ၁ တၠ ချိုတ်တုဲ ညးဒေသ ၂၀၀၀ ပြၚ် ဒးဂြိပ်ဒဴဒၟံၚ်
By
sanlontai
