ဒဳဟဳရာန်၊ ဂျူလာၚ် ၁
နကဵုအမေရိကာန် ယဝ်ဆန္ဒမၞုံ သ္ဂောံကလေၚ်စ ပေါဲသဳကၠဳပရေၚ်ကလုတ်တမာန်တံဂှ်မ္ဂး ဒးကဵုကတိ ညံၚ်ဟွံဂွံထပ်ကလေၚ်ဗ္တိုက်အဳရာန်ဂှ် လစှ်ေဝန်ဇၞော်ကာဍုၚ်သ္အာၚ် ဒဳဟဳရာန် ဟီုလဝ်ရ။
အလဵုအသဳထြာမ် ဟီုကၠုၚ်လဝ် ကုအဳရာန် နူမၞိဟ်အကြာမွဲကဆံၚ် ဒဒှ်ရဆန္ဒမၞုံ သွက်ဂွံကလေၚ်ပညဳပညပ်ဂှ်ကီုလေဝ် အခိၚ်ကၠောန်ဒၟံၚ်ပရေၚ်သဳကၠဳဂှ် စပ်ကဵုပရေၚ်ဗ္တိုက်အနာဂတ် မဒှ်တၚ်သၟာန်ပၟိက်ဇၞော်ဂှ်တုဲ အမေရိကာန် ဟွံဟီုလဝ် သောၚ်ၚ်ကၠးကၠးပုဟ်ဂှ် ဝန်ဇၞော်ကာဍုၚ်သ္အာၚ် မာဂျေတ် တက် ရာဗာန်ချဳ ဟီုလဝ်ရ။
အခိၚ်စဳဇန်လဝ် သ္ဂောံကၠောန်ဗဒှ်ပေါဲသဳကၠဳတိုက်ရိုက်ဟွံသေၚ် အကြာအမေရိကာန် ကဵု အဳရာန် မရနုက်ကဵုတြဴဝါ ပ္ဍဲဍုၚ်မူသကာတ် ပ္ဍဲဂိတုဂျောန် ၁၅ ဂှ် ပ္ဍဲဂိတုဂျောန် ၁၃ အခိၚ်နူဂယးဂှ် အေဿရေ ဗတိုက်လဝ် အဳရာန်ရ။
ပ္ဍဲပေါဲပၞာန်အေဿရေ−အဳရာန် ဂှ် အမေရိကာန် ပါလုပ်ကၠုၚ်လဝ် တိုက်ရိုက်တုဲ ထောံမခတိုဟ်ဗ္တိုက်လဝ် ရုၚ်စက်နျူကလဳယျာအဳရာန်ရ။
နကဵုအဳရာန် အာတ်မိက်အာ အခေါၚ်သ္ဂောံသ္အးဇ္ၚးယူရေနဳယာန်ဂှ် ဗိုန်န်ဏောၚ်တုဲ ဒဒှ်ရတးပါဲကၠေံ တၚ်စောဲစပ် ညးတအ်မကၠတ်ပ္တိတ်ဒၟံၚ်ဗုမ်နျူကလဳယျာဂှ် ဝန်ဇၞော် တက် ရာဗာန်ချဳ ဟီုလဝ်ရ။
နကဵုအဳရာန် ဟွံဂွံလဝ်အခေါၚ်လ္ၚတ် ကပေါတ်နျူကလဳယျာ သွက်ကိုန်စဳမာန်သုတေသနတံဂှ်တုဲ ဒးပတှ်ေဇကုဇကုဏောၚ်ဂှ် ညးဟီုရ။
ဗၞတ်ဗ္ၜတ်သ္အးဇ္ၚး ကၠောန်ပ္တိတ် ကေုာံ လၟိဟ်ပမာဏတံဂှ် ပညဳပညပ်သဳကၠဳအာဂွံမာန်ကီုလေဝ် သ္အးဇ္ၚးယူရေနဳယာန်ဟွံဂွံ၊ ဟွံတုပ်စိုတ်မ္ဂး ထောံဂြာတ်မခတိုဟ်တုဲဗ္တိုက်ဏောၚ်ဟီုဂှ် ဒှ်ဒၟံၚ်သၞောဝ်အပ္ဍဲဂြိုပ်ဏောၚ်ဂှ်လေဝ် ဝန်ဇၞော် တက် ရာဗာန်ချဳ ဟီုလဝ်ရ။
ဟိုတ်နူပရေၚ်အမေရိကာန် ဗ္တိုက်ကၠုၚ်ဂှ်တုဲ အခိၚ်ဟွံဂွံတီကေတ် ဗ္ၜတ်ရုၚ်စက်နျူကလဳယျာအဳရာန် မဒးလီုလာ်အာ သောၚ်ၚ်ကၠးကၠးဏီဂှ် ညး ဟီုချိုတ်တ်ပၠိုတ်တ် ဟွံဂွံပုဟ်ဂှ် သ္ဂးရ။
သမ္မတအမေရိကာန် ဒဝ်နေဝ်ထြာမ်ဂှ်တှ်ေ ရုၚ်စက်နျူကလဳယျာ အဳရာန်တအ် လီုလာ်အာယျရောၚ် ဟီုလဝ်ကီုလေဝ် ဇၞော်သ္ကိုပ် အေဂျေန်ဇြဳဓာတ်အနုလက်ကၠိုက်ဂၠးတိ IAEA ဂှ်တှ်ေ ၜိုန်ဇီုကပိုက်လီုလာ်အာလဝ် ဍာံကီုလေဝ် လီုလာ်အာဖအိုတ်ဟွံသေၚ်ပုဟ်ဂှ် ညးဟီုလဝ်ရ။
နကဵုအဳရာန် ကလေၚ်ကၠောန်ကိုန်စဳမာန်နျူကလဳယျာညးတံ အပ္ဍဲပွိုၚ်မွဲၜါဂိတု ဂွံမာန်ရောၚ် IAEA ဟီုလဝ်ရ။
Ref: BBC