ဒဴအဝေတ်၊ ဂျောန် ၂၉
အပ္ဍဲပေါဲပၞာန်အကြာၜါဍုၚ် ပွိုၚ် ၁၂ တ္ၚဲဂှ် အေဿရေ ဂွံၚးတးပသောၚ်ကၠေံ က္ဍိုပ်သ္ကိုပ်အဳရာန် အယာတဝ်လာ အလဳ ခါမေနဳ နွံကၠုၚ်လဝ်ဂှ် ဝန်ဇၞော်ကာစဵုဒၞါအေဿရေ အေဿရေ ကာသ် ဟီုလဝ် ပ္ဍဲဂိတုဂျောန် ၂၇ တေံရ။
“ယဝ်ခါမေနဳ နွံပ္ဍဲမတ်ပိုယ်မ္ဂး ပိုယ် ပသောၚ်ဒးညးတေံဏောၚ်ဂှ် ထေၚ်ကေတ်ရ” ဂးတုဲ ဟီုလဝ် အပ္ဍဲပေါဲဆဵုဂဗ ကုအစဳဇန်ရုပ်ရမျာၚ်အလဵုအသဳဂှ် အေဿရေ ကာသ် ဟီုလဝ်ရ။
ဆ္ဂး ခါမေနဳ ကၠိုဟ်ကေတ်လဝ်တုဲ ပါဲဒလေတ်လဝ် ပ္ဍဲသၟဝ်တိ ဒၞါဲမဇြိုဟ်ဂှ်ရ အဆက်ပိုတ်အာလဝ် ကုသ္ကိုပ်ဒပ်ညးတအ်ဂှ်ရောၚ် ကာသ် ဟီုရ။
ပ္ဍဲဂိတုဂျောန် စၟတ်တ္ၚဲ ၁၃ တ္ၚဲပေါဲပၞာန်စဂှ် ဟိုတ်နူအေဿရေ ဗတိုက်ကၠုၚ်တုဲ သၞာဲဒဴအဳရာန် လ္ပာ်ပၞာန် ကေုာံ တၠပညာသိပ္ပံနျူကလဳယျာ ဗွဲမဂၠိုၚ်ဂၠေၚ် ဒးချိုတ်အာလဝ်ရ။
သွဟ်ပေါဲပၞာန်ဂှ်တှ်ေ အလဵုအသဳ ဒှ်အပြံၚ်အလှာဲမာန်တုဲ စပ်ကဵုအကာဲအရာ ခါမေနဳ ဒးဒုၚ်ဂစိုတ်မာန်ဂှ်တုဲ သ္ကိုပ်ဝန်ဇၞော်အေဿရေ နေတာန်ညာဟု ကေုာံ သမ္မတအမေရိကာန် ဒဝ်နေဝ်ထြာမ်တအ် သဳကၠဳလဝ် ဂၠိုၚ်ၚ်ကဵုဝါရ။
သၞာဲဒဴအဳရာန် လ္ပာ်ပၞာန် ကေုာံ တၠပညာသိပ္ပညာနျူကလဳယျာဂမၠိုၚ် ဒးဒုၚ်ဂစိုတ်လဝ်ဂှ်ဝွံ ဒှ်ဟိုတ်နူမၞိဟ်ကၠတ်ထံၚ်ပရိုၚ်အေဿရေ မချဳဒရာၚ်ဒၟံၚ် အပ္ဍဲဍုၚ်အဳရာန် ကဵုကၠုၚ်ပရိုၚ်ဏောၚ်ဂှ် သၞာဲဒဴဒဳဟဳရာန် ဟီုလဝ်တုဲ ရပ်ဒက်ကဵုမံၚ်ဒဏ်ဂစိုတ် လ္တူညးမၞုံကဵုသၠေဟ်ပၟာ ဒှ်ရဲကၠတ်ထံၚ်ပရိုၚ်မာန်တံဂှ်ရ။
အဳရာန်ဂှ်တှ်ေ ကိုန်စဳမာန်နျူကလဳယျာညးတံဝွံ ဒှ်သွက်ပရေၚ်ၜိုဟ်လလမ်သၟးရဏောၚ် ဟီုကၠုၚ်လဝ် ဂၠိုၚ်ၚ်ကဵုဝါကီုလေဝ် ပရေၚ်သ္အးဇ္ၚးယူရေနဳယာန်ဂှ် ကၠောန်ပ္တိတ်ကၠုၚ်လဝ် ကြပ်စိုပ်ကဆံၚ် ကၠောန်ပ္တိတ်လွဟ်နျူကလဳယျာမာန်ရ။
ကြဴနူအမေရိကာန် ထောံမခတိုဟ်ဗ္တိုက်ကၠုၚ်တုဲဂှ် ပ္ဍဲအဳရာန် ဟွံဂွံဆဵုကေတ် ဓာတ်ရေဒဳယောလရုက္တဵုရောၚ် အခိၚ်တၠပညာဂမၠိုၚ် ဟီုလဝ်ဂှ် ဝန်ဇၞော်ကာဍုၚ်သ္အာၚ်အဳရာန် ဒုၚ်လဝ်ဝန် ဒဒှ်ရရုၚ်စက်နျူကလဳယျာဂမၠိုၚ် ဇီုကပိုက်လီုလာ်အာ ဇၞော်ကဵုဇြဟတ်ရ။
ရုၚ်စက်ဂမၠိုၚ် ဇီုကပိုက်လီုလာ်ဒးအာသာ်ဏံကီုလေဝ် ပရေၚ်သ္အးဇ္ၚးယူရေနဳယာန်ဂှ်တှ်ေ ဒေါအ်ဒေၚ်အာဟွံသေၚ်ပုဟ်ဂှ် အဳရာန် ဟီုလဝ်ရ။
Ref: Reuters