ၜၚ်ကံက်၊ ဂျူလာၚ် ၂
အလဵုအသဳသေံ မဒးဆေၚ်ဒၟံၚ်မုက်ကဵုဇြဟတ်ဓရိုဟ် သွက်ကိစ္စဗွဲမဂၠိုၚ်ဂှ် အရာမဇီုကပိုက်ကၠုၚ်မွဲပၠန်ဂှ်တှ်ေ ပ္ဍဲဂိတုဂျူလာၚ် ၁ တေံ ရုၚ်သၞောဝ်ဓဝ်သၞောဝ်သ္ဇိုၚ် ဗဒေါအ်ဇူလဝ် သ္ကိုပ်ဝန်ဇၞော် ဗဴဓံၚ်ဓာန်ယှေန်နဝါတ်ရ။
ကြဴနူစၟတ်သမ္တီ ဒဒှ်မတက်ကျာလဝ် စပ်ကဵုပရေၚ်ဍုၚ်ကွာန် ကုဟောန်သေန် သ္ကိုပ်ဝန်ဇၞော်တြေံ ကာမ္ဗောဒဳယျာဂှ်တုဲ သ္ကိုပ်ဝန်ဇၞော် ဗဴဓံၚ်ဓာန်ဝွံ ဟွံလ္ဂူတပ်တးတုဲ ကၠောန်ဒးဗၠေတ်အာ နူအစာံဒ္ဂေတ်ပဋိပတ် ပ္ဍဲကဵုသၞောဝ်သ္ဇိုၚ်ဂှ်ရောၚ်ဂးတုဲ ရုၚ်သၞောဝ်ဓဝ် သ္ဂုတ်သွာတ်ကၠုၚ်လဝ် လ္တူလိက်ဒုၚ်ဂုန် အမာတ်ကၠတ်ထဝ် ၁၆ တၠတံဂှ်ရ။
ကြဴနူဒှ်ပြဒ္ဒညာပယျဵု ကုကာမ္ဗောဒဳယျာတုဲဂှ် ပ္ဍဲကဵုဂကောံအလဵုအသဳသေံပံၚ်ကောံဂှ် ဗော်ဗောန်ဇာဲထာဲ မဒှ်ဗော်ဇၞော်အိုတ် ဂၞန်ၜါဂှ် နုက်တိတ်နူဂကောံအလဵုအသဳဂှ်တုဲ ဇြဟတ်ဓရိုဟ် လ္တူသ္ကိုပ်ဝန်ဇၞော် ဗဴဓံၚ်ဓာန် သာဂၠိုၚ်ကၠုၚ်ရ။
ဆ္ဂး ဒဒှ်ရကလိဂွံလဝ် ပရေၚ်ထံက်ဂလာန် နူကဵုဗော်ပံၚ်ကောံသှ်ေသၟေဟ်ဒၟံၚ်တအ် ပေၚ်ၚ်ဂှ် ဗဴဓံၚ်ဓာန် ဟီုကၠုၚ်လဝ်ရ။
ဒှ်ကၠုၚ်သ္ကိုပ်ဝန်ဇၞော်တုဲ ဂွံကၠုၚ်ပွိုၚ် ၁၀ ဂိတုဂှ် ဟိုတ်နူအခက်အခုဲ ဗဴဓံၚ်ဓာန်တုဲ နကဵုဗော်ညး ဗော်ဖဳထာဲ ဂွံဆက်ဒတူလိုၚ်အာဂှ် သ္ဒးရုန်ဂ္စါန်အာ နွံဒၟံၚ်ရ။
ဂြောဝ်ဂတာညးတံဝွံ အုပ်ဓလီုကၠုၚ်လဝ် ပေါဲရုဲမာဲဍုၚ်သေံ နူသၞာံ ၂၀၀၁ တေံရ။
အကြာဏံ ဟိုတ်နူပရေၚ်ပၞာန်သီအဝဵု၊ ဟိုတ်နူတၚ်သ္ဂုတ်သွာတ် ရုၚ်သၞောဝ်ဓဝ်တံဂှ်တုဲ ဂကောံအလဵုအသဳဂမၠိုၚ် ဒးသရိုဟ်စှ်ေအာလဝ်ရ။
ဗဴဓံၚ်ဓာန် လမိၚ်လညာတ်ပ္ဍဲပရေၚ်ဍုၚ်ကွာန်ဟွံမွဲမွဲသာ် ဒှ်ကၠုၚ်သ္ကိုပ်ဝန်ဇၞော်ဍုၚ်သေံ အာယုက်ဍောတ်အိုတ်ဂှ်ကဵု သ္ကိုပ်ဝန်ဇၞော်တြေံ သရဳထာ တာဗဳဇြေန် နူကဵုရုၚ်သၞောဝ်ဓဝ်သၞောဝ်သ္ဇိုၚ် ကေၚ်ကေတ်လဝ်ဒုဟ်တအ် ဂွံကၠုၚ်ဒၞါဲဂှ်ဝွံ ပ္ဍဲဗွိုၚ်ပရေၚ်ဍုၚ်ကွာန်ဍုၚ်သေံဂှ် ဒှ်ဒၟံၚ်အရာညးဂမၠိုၚ် သ္ဇက်ဒးဟီုစရ။
အလဵုအသဳသေံလၟုဟ်ဝွံ ဒးဂဗဒၟံၚ်ကဵု တၚ်ကော်ဆဴ ပရေၚ်ပိုန်ဒြပ် ဂွံကလေၚ်ယိုပ်ယာကၠုၚ်ရ။
ပ္ဍဲဂိတုမာတ်တုဲကၠုၚ်တေံ ညးဍုၚ်ကွာန်ထံက်ဂလာန်ဂှ် ၃၀ တၟံကၠံပြၚ် နွံလဝ်ကီုလေဝ် အခိၚ်လၟုဟ်ဂှ်တှ်ေ စှ်ေဒၟံၚ် စဵုကဵု ၉ တၟံကၠံရ။
နကဵုသ္ကိုပ်ဝန်ဇၞော်တြေံ တက်ဇြေန် မဒှ်မအံက်သ္ကိုပ်ဝန်ဇၞော်ဂှ်လေဝ် ဂွံဒးဆေၚ်အာမုက် ကုဂဗုတ်ဖ္ဍိုက်ဂရိုက်ဒးနန်ဨကရာဇ်ဂှ် နွံဒၟံၚ်ရ။
Ref: Reuters