မတ်မလီု၊ ဂျူလာၚ် ၂
ဗော်ဒဳမဝ်ကရေတ်တေတ် ဂကူသေံ ကေုာံ ကောန်ဍုၚ်အရၚ်ဂမၠိုၚ် SNDP မၞိဟ်တီဂၠိုၚ် နဒဒှ်ဗော်ကၠဗုဂှ်ဝွံ ပံက်လဝ်ရုၚ် ပ္ဍဲတွဵုရးဍုၚ်မန် ပွိုၚ်ဍုၚ်မတ်မလီုကဵု ပွိုၚ်ဍုၚ်ကျာ်ထဝ်ဂှ် လ္ပာ်ဗော် ကဵုကၠုၚ်လဝ်သမ္တီ လလောၚ်ပ္တိတ်လဝ်ရ။
ဗော်ကၠဗုဝွံ ပ္ဍဲပွိုၚ်ဍုၚ်ကျာ်ထဝ်ဂှ် ပံက်လဝ်ရုၚ် ပ္ဍဲဂိတုဂျောန် ၂၅ တေံတုဲ၊ ပ္ဍဲပွိုၚ်ဍုၚ်မတ်မလီုဂှ် ပံက်လဝ်ရုၚ်ပွိုၚ်ဍုၚ် ပ္ဍဲဂိတုဂျောန် ၂၆ တေံရ။
သ္အာၚ်နူဂှ်ပၠန် ပ္ဍဲပွိုၚ်ဍုၚ်ၜဳကလေၚ်၊ ပွိုၚ်ဍုၚ်သဓီု ကေုာံ ပွိုၚ်ဍုၚ်ပံၚ်တံဂှ်လေဝ် ခြာဟွံလအ်ဏံ ထပ်ပံက်အာ ရုၚ်ဗော်ကဆံၚ်ပွိုၚ်ဍုၚ်ဏောၚ်ဂှ် လလောၚ်တြးလဝ်ရ။
ဗော်ကၠဗုဝွံ အာတ်ပ္တိုန်လဝ် နဒဒှ်ဗော်ပရေၚ်ဍုၚ်ကွာန် မလုပ်ပြိုၚ်ပေါဲရုဲမာဲကံၚ်ဇြဳပၞာန် ကၠောန်ဗဒှ်ဂှ်တုဲ တုဲကၠုၚ် သၞာံ ၂၀၂၃ ဂိတုသေပ်တေမ်ဗာ ၇ တေံဂှ် ပတိုန်လဝ်စရၚ်ဗော် နဒဒှ်ဗော်စန်ဒက်အာ အလုံကၟိန်ဍုၚ်မွဲရ။
ကြဴနူဂှ်တုဲ ဗော်ကၠဗု ပံက်လဝ်ရုၚ် အလုံကၟိန်ဍုၚ်မွဲ ဟွံအောန်နူကဵု ၁၃၀ ပွိုၚ်ဍုၚ်ဂှ်တုဲ ပ္ဍဲကဵုရးဒေသ ကေုာံ တွဵုရးသှ်ေတအ်ဂှ်လေဝ် ဂ္စါန်ကၠုၚ် သွက်သ္ဂောံပံက်ရုၚ်ကီုရ။
နူကဵုဗော်ဒဳမဝ်ကရေတ်တေတ်ကောန်ဂကူသေံဂှ် ဗော်ကၠဗုဏံ လှာဲလဝ်ယၟု နဒဒှ်ဗော်ဒဳမဝ်ကရေတ်တေတ် ဂကူသေံ ကေုာံ ကောန်ဍုၚ်အရၚ်ဂမၠိုၚ် SNDP ဂှ်ဝွံ ပ္ဍဲပေါဲရုဲမာဲ သၞာံ ၂၀၁၅ ကဵု သၞာံ ၂၀၂၀ ဗော် NLD မလုပ်ပြိုၚ်လဝ်ဂှ် ဂွံလဝ်ဒၞါဲညးစၞးကၠတ်ထဝ်မွဲဒၞါဲဓဝ်ရ။
ဆ္ဂး ဗော်ကၠဗုဝွံ ပ္ဍဲကဵုပေါဲရုဲမာဲ ၂၀၁၀ အလဵုအသဳပၞာန် အာဍိုပ်တုဲကၠောန်လဝ်ဂှ် ညးစၞးကၠတ်ထဝ် ၅၈ တၠ ဂွံလဝ်ဇၞးတုဲ ဝန်ဇၞော်ကေုာံဒုဝန်ဇၞော် စဵုကဵုတြဴတၠ ဂွံလဝ်ဒၞါဲရ။
စပ်ကဵုပေါဲရုဲမာဲ ကံၚ်ဇြဳပၞာန် မကၠောန်ဗဒှ်အာဂှ်တုဲ ဥက္ကဌဗော် SNDP သာၚ်အိုက်ပံၚ်ဂှ်တှ်ေ ပ္ဍဲပေါဲရုဲမာဲဂှ် မၞိဟ်မွဲတၠဓဝ် ကၠုၚ်ကဵုမာဲမ္ဂးလေဝ် ပေါဲရုဲမာဲ စိုပ်ဒၟံၚ်ဒတုဲရောၚ်ဂှ် ပ္ဍဲဂိတုမေတုဲကၠုၚ်တေံ ဟီုလဝ်ကဵု ပရိုၚ်မဳဒဳယျာဂမၠိုၚ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−ဗော်ကၠဗု
