၁၃ တၠ ထပ်ဒးပြဟ်လလုဲ
ကအ်သံၚ်၊ ဂျူလာၚ် ၂
ပ္ဍဲကဵုထံၚ်စာတ် အလုံဍုၚ်မွဲဂှ် အပ္ဍဲကဝက်သၞာံဏံ ဟိုတ်နူဟွံဂွံပရေၚ်မၚ်မွဲရံၚ်စံၚ်ဂဥုဲဇဗ ဗွဲမရုမ်ဂပ်တုဲ ကောန်ထံၚ်ပရေၚ်ဍုၚ်ကွာန် ၁၃ တၠ ချိုတ်အာလဝ်ရောၚ် ဂွံတီကေတ် နူဇရေၚ်ဇာဇၞိက်ကောန်ထံၚ်ပရေၚ်ဍုၚ်ကွာန်အလုံဍုၚ်မွဲ PPNM ရ။
သၞာံ ၂၀၂၅ နူဂိတုဂျာန္နဝါရဳ စဵုကဵုဂိတုဂျောန်အိုတ်ဏံ ပ္ဍဲကဵုထံၚ်စာတ် နွံအလုံဍုၚ်မွဲဂှ် ဟိုတ်နူဟွံဂွံပရေၚ်မၚ်မွဲရံၚ်စံၚ် ပရေၚ်ထတ်ယုက် ဗွဲမရုမ်ဂပ်တုဲ ဥက္ကဌကၠတ်ထဝ်မာန္တလေဝ် မပါလုပ် ကောန်ထံၚ်ပရေၚ်ဍုၚ်ကွာန်ဂမၠိုၚ် ဒးချိုတ်အာလဝ်ရ။
တုဲကၠုၚ်ဂိတုဂျောန် ၂၆ အခိၚ်ဗ္တံ ၜိုတ် ၇ နာဍဳဂှ်လေဝ် ကောန်ထံၚ်ပရေၚ်ဍုၚ်ကွာန်မွဲတၠ မၞုံအာယုက် ၅၄ သၞာံ ဒးဒုၚ်ဖျေံလဝ်ထံၚ် နကဵုၝောံပိုဒ်ပရေၚ်ဍုၚ်ကွာန်ဂှ် ဒှ်ယဲတုဲ ဒးချိုတ်အာလဝ်ရောၚ် သ္ဂးရ။
အခိၚ်ဥူအေလွေန်ဂိယဲဂှ် ပလံၚ်လဝ် ရုၚ်ဂဥုဲ(နှစ်မိုၚ်) အပ္ဍဲထံၚ်ဂှ်ကီုလေဝ် ဒၟါနူဟွံဂွံလွဳ ဗွဲမဂတာပ်အခိၚ်ဂှ်တုဲ ဒးထောံအာလဝ် ပ္ဍဲရုၚ်ဂဥုဲရောၚ် သ္ဂးရ။
ကိုဝ်တိုက်ထောန်ဥူ ကမ္မတဳက္ဍိုက်ပ် ဇာဇၞိက်ကောန်ထံၚ်ပရေၚ်ဍုၚ်ကွာန် အလုံဍုၚ်ဗၟာဂှ် အတိုၚ်အကာဲအရာလၟုဟ်မ္ဂး ပရေၚ်လမျီုဒးအိုတ် အပ္ဍဲထံၚ်စာတ်ဂှ်ဝွံ ကြဴနူသီအဝဵုတုဲဂှ် သၞာံလၟိဟ်အောန်စှ်ေအာဂှ်ဟွံမွဲတုဲ မွဲသၞာံတုဲမွဲသၞာံ ဂၠိုၚ်တိုန်ကၠုၚ်ဒၟံၚ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
လအာတုပ်သာ်ဂှ်ကီု ပ္ဍဲဂိတုဂျောန် ၂၇ တေံဂှ်လေဝ် ဥူအံၚ်ကျဝ်ဥူ ဥက္ကဌကၠတ်ထဝ် ရးမာန္တလေဝ် အာယုက်မၞုံ ၆၉ သၞာံ ဒးမံၚ်ထံၚ် ပ္ဍဲထံၚ်စာတ်အိုဝ်ဗိုဝ်ဂှ်ဝွံ ဟိုတ်နူယဲခ္ဍက်ဆီတိတ်၊ ယဲဍောၚ်တံဂှ်တုဲ ဒးချိုတ်အာလဝ်ရ။
ပ္ဍဲသၞာံ ၂၀၂၄ တုဲကၠုၚ်တေံဂှ်လေဝ် ပ္ဍဲထံၚ်စာတ် အလုံဍုၚ်မွဲဂှ် ဟိုတ်နူဟွံဂွံလွဳလွတ် ချိုတ်တ်ပၠိုတ်တ်တုဲ ကောန်ထံၚ်ပရေၚ်ဍုၚ်ကွာန် အပံၚ်ဖအိုတ် ၂၂ တၠ နွံဂှ် ဂွံတီကေတ်ရ။
ပရိုၚ်−သြၚ်လောန်တို(မ်) ရ။
ဗီုရုပ်−PPNM
