မတ်မလီု၊ ဂျူလာၚ် ၂
ဗော်ပရေၚ်ဍုၚ်ကွာန် လုပ်ပြိုၚ်အာ ပ္ဍဲပေါဲရုဲမာဲကံၚ်ဇြဳပၞာန် ကၠောန်ဗဒှ် ပ္ဍဲတွဵုရးဍုၚ်မန်ဂှ် ဗက်စန်ဒက်ကၠုၚ်ဒၟံၚ် ညးဍုၚ်ကွာန်ဂမၠိၚ် သွက်ဂွံလုပ်ဗော်ညးတအ်ဂှ် နွံဒၟံၚ်ရောၚ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဗော်ပရေၚ်ဍုၚ်ကွာန်လ္ၚဵု ကလိဂွံလဝ်အခေါၚ်ဒက်ပ္တန်ဗော် နဒဒှ်ဗော်ပရေၚ်ဍုၚ်ကွာန် နူကံၚ်ဇြဳပၞာန်ဂှ်ဝွံ ကဵုမက်ဂၠက်စန်ဒက်ဒၟံၚ် ညးဍုၚ်ကွာန်ဒေသတံကီု၊ ပေါဲရုဲမာဲတုဲမ္ဂး ဖဍိုက်ဗပေၚ်ကဵုအရာကောန်ဗော်ဂမၠိုၚ် နွံပၟိက်တအ်ဂှ်ဏောၚ်ဂးတုဲ စန်ဒက်ကၠုၚ်ဒၟံၚ် သွက်ဂွံလုပ်ဗော်ညးတအ်ဂှ် နွံကၠုၚ်ရ။
သ္အာၚ်နူဂှ်ပၠန် ညးမပြံၚ်ကၠုၚ်လ္ပာ် နူကဵုဗော်ပရေၚ်ဍုၚ်ကွာန်တၞဟ်ဟ်တံဂှ်လေဝ် ဒုၚ်တၠုၚ်ကီု၊ ညးမၞုံကဵုပရေၚ်ဆဵုဂဗ ပ္ဍဲပရေၚ်ဍုၚ်ကွာန်တံဂှ်လေဝ် ကဵုဒၞါဲမွဲမွဲဒၞါဲတုဲ ရေၚ်တၠုၚ်ဒၟံၚ်တုဲ အခိၚ်ကာလစန်ဒက်မာဲဏံ ဂွံထ္ၜးဇြဟတ်ဂၠိုၚ်ၚ်မာန်ဂှ် စန်ဒက်ကၠုၚ်ဒၟံၚ်ညးဍုၚ်ကွာန်ဒေသဂမၠိုၚ် သွက်ဂွံလုပ်ဗော်ညးတအ် နကဵုနဲကဲနာနာသာ်ရ။
ညးဒေသတွဵုရးဍုၚ်မန် ဟွံမိက်ထ္မံက်ယၟုမွဲတၠဂှ်တှ်ေ ပ္ဍဲအရာစန်ဒက်ကၠုၚ်ဂွံလုပ်ဗော်ညးတအ်ဂှ် ဗော်ပရေၚ်ဍုၚ်ကွာန် စုက်လုက်ကဵုကံၚ်ဇြဳပၞာန်တအ်ဂှ် ဂွံဆဵုကေတ်ဒၟံၚ် ဂၠိုၚ်အိုတ်တုဲ စွံဒၟံၚ်ပွန် လ္တူဂြောဝ်ဂတာ ပရေၚ်ပိုန်ဒြပ် ဟွံပြေပြံၚ်တံဂှ် အဓိကရောၚ် ဟီုရ။
ဟိုတ်နူဗော်ပရေၚ်ဍုၚ်ကွာန်ဂမၠိုၚ် စန်ဒက်ကၠုၚ်ဂှ်တုဲ ညးဒေသလ္ၚဵုတအ်ဝွံ လုပ်စိုပ်အာ နဒဒှ်ကောန်ဗော်ဂှ်နွံတုဲ လ္ၚဵုဂှ်တှ်ေ ဟွံပတှ်ေ လ္တူပေါဲရုဲမာဲကံၚ်ဇြဳပၞာန်တုဲ ဟွံလုပ်လဝ်ပုဟ်ဂှ် ညးဆက်ဟီုရ။
က္ဍိုပ်သ္ကိုပ်ပၞာန်သီအဝဵုဂှ်တှ်ေ ကြဴနူဟီုကၠုၚ် ဒဒှ်ရကၠောန်အာပေါဲရုဲမာဲ ပ္ဍဲကၞောတ်သၞာံဏံကဵု သၞာံဂတဏံမံက်ဂှ်တုဲ ဗော်ပရေၚ်ဍုၚ်ကွာန် မလုပ်စိုပ်ပြိုၚ်ပ္ကာန်အာ ပ္ဍဲပေါဲရုဲမာဲဂမၠိုၚ် ဗက်စန်ဒက်ဒၟံၚ် ကောန်ဗော်တၟိတၟိတအ်ရ။
ပ္ဍဲအရာစန်ဒက်ကောန်ဗော်ဂမၠိုၚ်ဂှ် မၞိဟ်တၞးကာဒ်ကောန်ဍုၚ်ဟွံမွဲဏီဂှ် ကၠောန်အာညံၚ်သ္ဂောံဂွံတၞးကာဒ်ကောန်ဍုၚ်ကီု၊ ဘိုၚ်ရီုဗၚ်ကဵုကိစ္စတိဗ္ၚတအ်ကီု၊ ပရေၚ်စသုၚ်မံၚ်စံၚ်ဂြောဝ်ဂတာ သ္ဒးပြေပြံၚ်ဏောၚ်ဂးတုဲ စန်ဒက်ဒၟံၚ်ရ။
ပ္ဍဲတွဵုရးဍုၚ်မန်ဂှ် ဗော်ကျခိုၚ်ယျေ၊ ဗော်ပၠတရဴညးဍုၚ်ကွာန်၊ ဗော်ညးဍုၚ်ကွာန်၊ ဗော်ညဳသၟဟ်မန်၊ ဗော်ညဳသၟဟ်ကောန်ဍုၚ်အရၚ်၊ ဗော်ဒဳမဝ်ကရေတ်တေတ် ဂကူသေံ ကေုာံ ကောန်ဍုၚ်အရၚ်ဂမၠိုၚ် SNDP ၊ ဗော်ညးဗြဴ(မန်) မပါလုပ် ဗော်ပရေၚ်ဍုၚ်ကွာန်လ္ၚဵုတအ်ဒှ်တမ် သ္ဂောံလုပ်ပြိုၚ်အာပေါဲရုဲမာဲ ကံၚ်ဇြဳပၞာန် ကၠောန်ဗဒှ်အာဂှ် နွံဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ