နေဗျဳဒဝ်၊ ဂျူလာၚ် ၂
အလဵုအသဳဍုၚ်ဗဴလာရုသ် မဒှ်ဍုၚ်ဂကောံပၞာန်ဗၟာတအ် မဒက်လဝ်မိတ်မွဲဂှ်ဝွံ ပံၚ်တောဲရေၚ်တၠုၚ်ဒၟံၚ် ကုဒပ်ပၞာန်ဗၟာ လ္ပာ်ပရေၚ်ပၞာန်နွံဒၟံၚ်ရောၚ် ပ္ဍဲဂိတုဂျောန် ၃၀ တေံ Justice For Myanmar လလောၚ်ပ္တိတ်ကဵုလဝ်သမ္တီရ။
အလဵုအသဳဗဴလာရုသ် သွံတြးကဵုလဝ် သၞောတ်စဵုဒၞါပၞာန်ကျာ ကုဂကောံပၞာန်ဗမာတုဲ ကုသ္ဇိုၚ်ဝန်ပၞာန် နူကဵုသွာၚ်ပတိတ်လွဟ်ပၞာန် ဂကောံပၞာန်တအ်ဂှ်လေဝ် ပကတ်ပကေၚ်ဗ္တောန်ကဵုဒၟံၚ်ရောၚ် သ္ဂးရ။
သၞောတ်ထိၚ်ပြုပြေၚ်ပၞာန် စဵုဒၞါပၞာန်ကျာဗၟာ (MADOC) ၊ ကွတ်ပညာရေဒါ 3D ကေုာံ သၞောတ်ကမ်လှောဝ်ဖျေံသ္ဇိုၚ်ဗလးတိတအ် မပါလုပ် ဒဒှ်ရလှဲပြံၚ်သွံတြးကဵုလဝ် နဲကွတ်ပညာစပ်ကဵုသွာၚ်ပၞာန် ကဆံၚ်သၠုၚ်ဂမၠိုၚ်ဂှ် သ္ပဒတန်မာန်လဝ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ဣဏံဝွံ အတိုၚ်လိက် အကြာသၟိၚ်တၠအဝဵု ဗဴလာရုသ်တံကဵု ဌာန်ဂအုပ်ကောပ်ကာဲကာစဵုဒၞါပၞာန်ကျာဗၟာ မမံက်တိတ်ကၠုၚ်ဂှ်မ္ဂး သက်သဳအကြာၜါဍုၚ်ဏံ ပံၚ်တောဲကၠောန်လဝ် စပ်ကဵုသွာၚ်ပရေၚ်ပၞာန်တအ်ဂှ် ထ္မံက်ထ္ၜးလဝ် ပ္ဍဲကဵုသုတေသန Justice For Myanmar ရ။
သၞောတ်ထိၚ်စဵုဒၞါပၞာန်ကျာ မချူလဝ်ဒဳဇြာၚ် သွက်ဂကောံပၞာန်ဗၟာဂှ် နူကဵုကမ္ပဏဳကၟိန်ဍုၚ်ပိုၚ် Belspetsvnesh-technika (BSVT) မွဲကဆံၚ် သွံကဵုတုဲထံက်ပၚ်လဝ်ရ။
ပ္ဍဲသၞောတ်ဏံဂှ် ဂၠိုက်ဂၠါဲ ကပေါတ်ဝတ္ထုလ္တူမှဲအကးမာန် ပါလုပ်သီု ဒရုၚ်ဇြဟတ်ပၠန်ဂတးတအ် မရပ်စပ်စကာဒၟံၚ်တံဂှ်တုဲ သွက်ဂွံဗက်ဒၞါဲဇိုၚ်ပွန် အလဵုလဵုဍေံမာန်ဂှ် သၞောတ်ထိၚ်ကေတ်ကေတ် “မြၚ်ကွၚ်းကျယ်” ကဵု ကွတ်ပညာရေတာ ညာတ်ကေတ်ပိလ္ပာ် Vostok တံ ပါလုပ်ရ။
သ္ဇိုၚ်ဝန်ဍုၚ်ဗၟာ တိုန်ဒၟံၚ်ဘာ ပ္ဍဲတက္ကသိုလ်ဗဴလာရုသ် BSUIR တအ်ဂှ်လေဝ် သွက်သၞောတ်စဵုဒၞါပၞာန်ကျာဂှ် သ္ပဒၟံၚ်သုတေသန ပ္ဍဲသွာၚ် ရေဒဳယော−အဳလက်ထရဝ်နေတ် အေန်ဂျေန်နဳယျာရေန်ရောၚ် Justice For Myanmar ထ္မံက်ထ္ၜးလဝ်ရ။
ကွးဘာတံဏံဂှ် ဆက်စပ်ဒၟံၚ်ကဵု ရုၚ်စက်ပ္တိတ်လွဟ်ပၞာန်ပၟိက်ဇၞော်ဂမၠိုၚ် ပါလုပ်သီုကဵု ကမၠောန်ကွတ်စက်ဍုၚ်ဗၟာ အဇာဇၞော် စၟတ် (၁၀) လ္တူဍုၚ်မာန္တလေဝ် ကဵု ရုၚ်စက်ကပေါတ်ကာစဵုဒၞါ စၟတ် (၄) လ္တူနေဗျဳဒဝ်ရ။
ဒပ်ပၞာန်ကျာ ဂကောံပၞာန်ဗၟာဝွံ စွံပွန်ဗ္တိုက်ကၠုၚ် လ္တူညးဍုၚ်ကွာန် ရုၚ်ဂဥုဲ ဗ္ဒမ်ဂဥုဲ ဘာဗ္တောန်လိက်တအ် ကြာန်န်ဂှ်တုဲ ညးဍုၚ်ကွာန် ဇီုကပိုက်လမျီုဒးအိုတ် ဒးထောံလသာသ္ၚိဌာန် ဒးပါဲဒလေတ်တံ ဒှ်ဒၟံၚ်တုဲ ကလိလောန်ဒၟံၚ် ရာဇဝတ်ပၞာန်ရ။
အပ္ဍဲသၞာံ ၂၀၂၅ ဏံ က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် အာစိုပ်လဝ် ဍုၚ်ဗဴလာရုသ် ဍုၚ်ဇၞော် မေသ်ဂှ် ၜါဝါတုဲ ဆဵုဂဗကဵုက္ဍိုပ်သ္ကိုပ်ကဆံၚ်လ္တူဂမၠိုၚ်တုဲ ပရေၚ်ပံၚ်တောဲရေၚ်တၠုၚ်ပရေၚ်ပၞာန်ကီု ပရေၚ်ပါလုပ်ဆက်စပ်ကဵုဗဴလာရုသ်တံကီု သၠုၚ်တိုန်ကၠုၚ်ရောၚ် Justice For Myanmar သ္ဂးလဝ်ရ။
ပ္ဍဲဂိတုဂျောန်ကြပ်အိုတ်ဏံ က္ဍိုပ်သ္ကိုပ်ပၞာန် တိုန်စိုပ်လဝ် ဝှဝ်ရာမ်ပရေၚ်ပိုန်ဒြပ် ယူရောပ်−အာယှ အလန်စတုတ္ထ ကၠောန်ဗဒှ်လဝ် ပ္ဍဲဍုၚ်ဗဴလာရုသ် ဍုၚ်မေသ်ဂှ်တုဲ နကဵုဍုၚ်ဗၟာ သွက်ဂွံပါလုပ် ပ္ဍဲသမဂ္ဂပရေၚ်ပိုန်ဒြပ် ယူရောပ်−အာယှ EAEU မွဲကရောံကီုဂှ် ဒဒှ်ရစိုတ်ထတ်သန်ဒၟံၚ်ဂှ် ဟီုလဝ်ရ။
သ္အာၚ်နူဂှ်ပၠန် ဆဵုဂဗလဝ် ကုသမ္မတဗဴလာရုသ် ဗွဲတၞဟ်ခြာတုဲ အကြာၜါဍုၚ် သွက်ဂွံပံၚ်တောဲကၠောန်အာ ပ္ဍဲဍုၚ်ဗၟာ စပ်ကဵုပရေၚ်ဍုၚ်ကွာန်၊ ပရေၚ်ထတ်ယုက်၊ ပရေၚ်ပိုန်ဒြပ်တံဂှ် ဗဴလာရုသ် စဳဇန်ဒၟံၚ်တုဲ က္ဍိုပ်သ္ကိုပ်ပၞာန်လေဝ် သၠဲပတိုန်သွာၚ်ဇဳတုဲ ကၠောန်အာဏောၚ် ထ္မံက်ထ္ၜးလဝ် ပ္ဍဲလိက်ပရိုၚ်တြးဝါဒရ။
အတိုၚ်တၚ်နၚ် Justice For Myanmar ဂှ်မ္ဂး ညးစၞး နူကဵုတက္ကသိုလ် မၞုံကဵုပရိုဝ်ဂရာမ် အေန်ဂျေန်နဳယျာရေန်ပၞာန် ကေုာံ ပရေၚ်ပကတ်ပကေၚ်၊ ရုၚ်စက်လွဟ်ပၞာန် ဗဴလာရုသ်တအ်ဝွံ အပ္ဍဲသၞာံဏံ ကၠုၚ်စိုပ်လဝ်ဍုၚ်ဗၟာ ဂၠိုၚ်ၚ်ကဵုဝါတုဲ ချုက်လဝ်လိက်ကသုက် ကုတက္ကသိုလ်ဍုၚ်ဗၟာ မရပ်စပ်စကာသွက်ပၞာန်ဂွံ တိုက်ရိုက်တံဂှ်ရ။
ဟိုတ်ဂှ်ရ သွက်ဂွံတပ်ဒဏ်ကၟာတ်လဒဵု လ္တူတက္ကသိုလ် မပကတ်ပကေၚ်ကဵုဒၟံၚ် သ္ဇိုၚ်ဝန်လ္ပာ်ပၞာန်ဍုၚ်ဗၟာတအ် မပါလုပ် သွက်ဂွံစွံပွန်ကေတ်အရေဝ် လ္တူညးစအကြာလွဟ်ပၞာန်ဗၟာ မပါလုပ်လဝ် ပ္ဍဲကဵုပရေၚ်သွံရာန်လွဟ်ပၞာန် ကုဍုၚ်ဗဴလာရုသ်တံဂှ် ဖတိုက်ဖ္အောဝ်လဝ်ရ။
ပ္ဍဲကောံဓရီုကုလသမဂ္ဂ သၞာံ ၂၀၂၁ တေံ ပ္ဍဲအရာပၠောပ်ဂလာန် ဒဒှ်ရဗျိပၠုတ် လ္တူပရေၚ်ပၞာန်သီအဝဵု အပ္ဍဲဍုၚ်ဗၟာဂှ် ၁၁၉ ဍုၚ် ထံက်လဝ်ဂလာန်တုဲ ဍုၚ်ကြုက်၊ ရုယှာ၊ အိန္ဒိယတအ် မံၚ်ကၠုၚ်အကြာကီုလေဝ် ဍုၚ်ဗဴလာရုသ်ဂှ်တှ်ေ ဒစဵုဒစးလဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်− Justice For Myanmar
