လံၚ်လုၚ်၊ ဂျူလာၚ် ၃
ဟိုတ်နူပေါဲဗတိုက် ပ္ဍဲကွာန်(ဖွားဘုတ်ပြၚ်) ပွိုၚ်ဍုၚ်လံၚ်လုၚ် ရးတၞၚ်သဳဂှ်တုဲ ညးဍုၚ်ကွာန်ဒေသ ၃၀၀၀ ပြၚ် ထောံလသာဌာန်ဒၟံၚ် ဒးဂြိပ်ဒဴပါဲဒလေတ်ဒၟံၚ်ရောၚ် ညးဒုၚ်တာလျိုၚ် ဂကောံစဵုဒၞါညးဍုၚ်ကွာန် ပွိုၚ်ဍုၚ်လံၚ်လုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ်ဂိတုဂျူလာၚ် ၁ အခိၚ်တ္ၚဲစေၚ် ၜိုတ် ၁ နာဍဳဂှ် အကြာဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် လ္ပာ်သၞေဟ်ဍာ်ဒမျိုဟ်ထဝါဲဂှ်ကဵု ဒပ်ပံၚ်ကောံပၠန်ဂတးတအ်ဂှ် ဒှ်လဝ်ပေါဲဗ္တိုက်ၜါလ္ပာ် ဗ္ဒါဲကွာန်(ဖွားဘုတ်ပြၚ်) ရ။
ဟိုတ်နူပေါဲဗ္တိုက်တုဲ ညးဍုၚ်ကွာန်ဒေသ ၃၀၀၀ ပြၚ် နူ ၅ ကွာန် ပါလုပ်သီုကဵု ကွာန်(ဖွားဘုတ်ပြၚ်၊ စခန်းကြီး၊ ဆၚ်ပုနှစ်) တံဂှ်ဝွံ ဒးဂြိပ်ပါဲမံၚ်ဒၟံၚ် လ္ပာ်ကွာန်ဗၠးဘဲတံကဵု ဒၞါဲကၠအ်ဂူဝါတအ်ရ။
ကြဴနူပေါဲဗတိုက်ဒှ်တုဲ ကရောၚ်ပၞာန်ကံၚ်ဇြဳပၞာန် ဇြဟတ်မၞုံ ၁၅၀ ပြၚ်ဂှ်ဝွံ ဆက်ဖျေံလဝ်ဒပ် ပွဳဗွိုၚ်ကြပ်ကွာန်(ဖွားဘုတ်ပြၚ်) ဂှ်တုဲ ပရေၚ်ပၞာန်ၜါလ္ပာ် ကြံၚ်မ္ၚိုဟ်ဒၟံၚ်ရ။
စပ်ကဵုအကာဲအရာပေါဲဗ္တိုက်တုဲ အကြာကံၚ်ဇြဳပၞာန်ကဵု ဒပ်ပံၚ်ကောံပၠန်ဂတးတအ်ဂှ် လလောၚ်ပ္တိတ်လဝ် မမိက်ကဵုမွဲမွဲဂှ် ဟွံမွဲဏီရ။
တုဲကၠုၚ်ဂိတုဂျောန် ၁၃ တေံဂှ်လေဝ် ဒပ်ကံၚ်ဇြဳပၞာန် ထ္ပက်ကၠုၚ်လဝ်ကရောၚ်ပၞာန် လ္ပာ်ကွာန်ကညုၚ်ကျောန် ပွိုၚ်ဍုၚ်လံၚ်လုၚ်ဂှ်တုဲ ညးဍုၚ်ကွာန် ၄၀၀၀ ပြၚ် ထောံလသာဌာန်ဒၟံၚ် ဒးဂြိပ်ဒဴပါဲဒလေတ်လဝ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ