မတ်မလီု၊ ဂျူလာၚ် ၃
နကဵုညးဍုၚ်ကွာန်ဒေသ အပ္ဍဲတွဵုရးဍုၚ်မန်တအ် လ္ပပံၚ်တောဲကဵုဗော်ပရေၚ်ဍုၚ်ကွာန် မလုပ်ပြိုၚ်အာပေါဲရုဲမာဲကံၚ်ဇြဳပၞာန်ဂှ် ဂကောံဇြဟတ်ပၠန်ဂတးဖျေံသ္ဇိုၚ်ဒေသဂမၠိုၚ် ကဵုလဝ်သတိရ။
က္ဍိုပ်သ္ကိုပ်ပၞာန် ကြဴနူဟီုကၠုၚ် ကၠောန်အာပေါဲရုဲမာဲ ကၞောတ်သၞာံဏံကဵု သၞာံတၟိမံက်တေံဂှ်တုဲ ဗော်ပရေၚ်ဍုၚ်ကွာန် အပ္ဍဲတွဵုရးဍုၚ်မန် လ္ၚဵုဂှ်ဝွံ ပလေဝ်ပလေတ်ကၠုၚ် သွက်ဂွံလုပ်ပြိုၚ်ပေါဲရုဲမာဲ ကံၚ်ဇြဳပၞာန် ကၠောန်ဗဒှ်အာဏံဂှ်ရ။
ဗော်ပရေၚ်ဍုၚ်ကွာန်ဂမၠိုၚ်ဝွံ စန်ဒက်ကောန်ဗော်တၟိ၊ ပံက်ရုၚ်ပါ်ဂမၠိုၚ် ကေုာံ ပလေဝ်ပလေတ်သွက်ပေါဲရုဲမာဲတံဂှ် ကၠောန်မံၚ်အဆက်က်ရ။
နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF ဂှ်တှ်ေ ဗော်ပရေၚ်ဍုၚ်ကွာန်လၟုဟ်ဂမၠိုၚ်ဝွံ ဒှ်ဂကောံပံၚ်တောဲရေၚ်တၠုၚ်ဒၟံၚ်ကဵုကံၚ်ဇြဳပၞာန်တံဂှ်တုဲ ညးဍုၚ်ကွာန်ဂမၠိုၚ် လ္ပပံၚ်တောဲအိုတ်ညိဂှ် ဖတိုက်ဖအောဝ်လဝ်ရ။
“ပ္ဍဲပေါဲရုဲမာဲ ကံၚ်ဇြဳပၞာန် ကၠောန်ဗဒှ်အာဂှ် ဗော်ပရေၚ်ဍုၚ်ကွာန်လုပ်ပြိုၚ်အာဂမၠိုၚ် ဂွံတောဲကၠောန်ကဵုကံၚ်ဇြဳပၞာန်ဂှ် တုပ်လဝ်စိုတ်ရ။ ဒှ်ဂကောံ ပြေဒၟံၚ်စိုတ်ဂမၠိုၚ်ရ။ နကဵုအဲ မိက်ဂွံဟီု စၞးဂကောံပၠန်ဂတးတအ်ဂှ်တှ်ေ ဝၚ်ပါဲကလောန်ကံၚ်ဇြဳပၞာန်ကေုာံကောန်ရဲတဝ်ခွါညးတအ်အိုတ်ညိဂှ် မိက်ဂွံကဵုသတိတာဒၞါရ” သာ်ဝွံ သ္ဂးရ၊
သ္အာၚ်နူဂှ်ပၠန် ဗော်ပရေၚ်ဍုၚ်ကွာန် လုပ်ပြိုၚ်အာပ္ဍဲပေါဲရုဲမာဲကံၚ်ဇြဳပၞာန်တံဝွံ ရံၚ်ကဵုဒတုဲဖဵုညးတံတုဲ လုပ်ပြိုၚ်လဝ်ဂှ်ရ နကဵုညးဍုၚ်ကွာန်ဂမၠိုၚ် ညံၚ်ဟွံဂွံဒးဒုၚ်စကာဂှ် စွံသတိမံၚ်စံၚ်အိုတ်တုဲ အရာဍေံတံ မစန်ဒက်ကၠုၚ်တံဂှ်လေဝ် လ္ပပတှ်ေစှ်ေစိုတ်ညိဂှ် ညးဆက်ဟီုရ။
အလံၚ်ညးစၞးကၠတ်ထဝ်မွဲတၠ ဥူအံၚ်ကျဝ်ဒူဂှ်လေဝ် ပ္ဍဲလက်ထက်ကံၚ်ဇြဳပၞာန်ဏံ မၞိဟ်ဒက်ပ္တန်ဗော်ပရေၚ်ဍုၚ်ကွာန်တုဲ လုပ်ပြိုၚ်အာပေါဲရုဲမာဲတံဂှ်ဝွံ ဒှ်ဂကောံဟွံတၟေၚ်နူကဵုကံၚ်ဇြဳပၞာန်တံရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ပ္ဍဲလက်ထက်ကံၚ်ဇြဳပၞာန် ရဲဒက်ပ္တန်လဝ်ဗော်ပရေၚ်ဍုၚ်ကွာန်တံဂှ်လေဝ် လုပ်ပေါဲရုဲမာဲဏောၚ်ဟီုတှ်ေ ညးတံလေဝ် ဒှ်ဂကောံမၞုံကဵုတၚ်ဒုၚ်ဂိုၚ်ကေတ် ဟွံတၞဟ်ခြာကဵုကံၚ်ဇြဳပၞာန်တံဂှ် မိက်ဂွံဟီုရ။ မွဲပၠန်ဂှ် ညးတံ စန်ဒက်ဂွံမံၚ်။ စန်ဒက်သွက်ဂွံလုပ်ဗော်ညးတံ သွက်ဂွံကဵုမာဲကုညးတံတုဲ ယဝ်ကဵုမာဲကုညးတံမ္ဂး မၞိဟ်ကဵုမာဲတံဂှ်လေဝ် ဒှ်မၞိဟ်စိုတ်ဓာတ်မၞုံ ဗီုညးတံရဏောၚ်” သာ်ဝွံ ဟီုရ။
မွဲလ္ပာ်ဂှ်ပၠန် ဗော်ပရေၚ်ဍုၚ်ကွာန် လုပ်ပြိုၚ်အာ ပ္ဍဲပေါဲရုဲမာဲကံၚ်ဇြဳပၞာန်တံဂှ်ဝွံ စန်ဒက်ကၠုၚ်ညးဍုၚ်ကွာန်ဒေသဂမၠိုၚ်၊ ဒုၚ်တၠုၚ် မၞိဟ်ပြံၚ်ကၠုၚ်လ္ပာ် နူဗော်ပရေၚ်ဍုၚ်ကွာန်တၞဟ်ဟ်တံဂှ်တုဲ ညးမၞုံကဵုလမိၚ်လညာတ် ပ္ဍဲပရေၚ်ဍုၚ်ကွာန်တံဂှ် ကဵုကၠေံဒၞါဲမွဲမွဲတံဒှ်တမ် ကၠောန်ကၠုၚ်ဒၟံၚ်ရ။
လ္ပာ်ကံၚ်ဇြဳပၞာန်ဂှ်လေဝ် သွက်ဂွံကဵုမာဲ အပ္ဍဲပေါဲရုဲမာဲမာန်ဂှ်တုဲ ပ္ဍဲတွဵုရးဍုၚ်မန်ဂှ် စမ်ၜတ်ထ္ၜး စက်ကဵုမာဲအဳလက်ထရဝ်နေတ်ဗၟာ MEVM ၊ ပတိတ်ကဵုတၞးကာဒ်ကောန်ဍုၚ် ကုညးကဵုမာဲဂွံတံဂှ်သၟးဟွံက အရာမလေတ်ပလေတ် စပ်ကဵုပေါဲရုဲမာဲတံဂှ်လေဝ် ကၠောန်ဒၟံၚ်အဆက်က်ရ။
ပ္ဍဲတွဵုရးဍုၚ်မန်ဂှ် အပ္ဍဲပေါဲရုဲမာဲ ကံၚ်ဇြဳပၞာန် မကၠောန်ဗဒှ်အာဂှ် ဗော်ကျခိုၚ်ယျေ၊ ဗော်ပၠတရဴညးဍုၚ်ကွာန်၊ ဗော်ညဳသၟဟ်မန်၊ ဗော်ညဳသၟဟ်ကောန်ဍုၚ်အရၚ်၊ ဗော်ညးဗြဴ(မန်) ကေုာံ ဗော်မစုက်လုက်ကဵုကံၚ်ဇြဳပၞာန် လ္ၚဵု ဂွံလုပ်ပြိုၚ်အာ နွံရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ