မတ်မလီု၊ ဂျူလာၚ် ၃
သွက်ဂွံလုပ်ပြိုၚ် ပ္ဍဲပေါဲရုဲမာဲကံၚ်ဇြဳပၞာန် ကၠောန်ဗဒှ် ကၞောတ်သၞာံဏံဂှ် နကဵုဗော် တန်တဴဒၟံၚ်ကဵု လ္တူညးဍုၚ်ကွာန်ဒေသတံရောၚ် နာဲတာန်ယှိုဲ ညးမၞုံအခေါၚ်ဟီုဂး ဗော်ညဳသၟဟ်မန် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဗော်ညဳသၟဟ်မန် ဂွံလဝ်အခေါၚ်ဒက်ပ္တန်ဗော်ပရေၚ်ဍုၚ်ကွာန် နူကဝ်မယှေန်ပေါဲရုဲမာဲကၟိန်ဍုၚ် ကံၚ်ဇြဳပၞာန်ခါန်ကၞက်လဝ်ဂှ်တုဲ စန်ဒက်အာကဆံၚ်တွဵုရးဂှ် ဗော်ပရေၚ်ဍုၚ်ကွာန်မန်မွဲ ဂွံဒတူလိုၚ် အပ္ဍဲကၟိန်ဍုၚ် ထေက်၊ ဟွံထေက်ဂှ် ကံက်လဝ်စရၚ် ဇရေၚ်ညးဍုၚ်ကွာန်တံရောၚ် သ္ဂးရ။
ဆ္ဂး ကံက်လဝ် အခိၚ်လဵု နဗီုပြၚ်လဵုရောဟီုဂှ်တှ်ေ ဟွံဟီုလဝ်ရ။
အတိုၚ်စရၚ်မကံက်လဝ်ဂှ်မ္ဂး ကလိဂွံလဝ်တၚ်တုပ်စိုတ် အပ္ဍဲကၟိန်ဍုၚ်ဏံ ဗော်ပရေၚ်ဍုၚ်ကွာန်မန်မွဲ ဒးနွံဂှ်တုဲ နကဵုဗော်ညဳသၟဟ်မန် ဒးတတ်ထ္ပာ်အာ ပေါဲရုဲမာဲဏောၚ်ဂှ် နာဲတာန်ယှိုဲ ဟီုလဝ် သာ်ဏံရ။
“စပ်ကဵုပေါဲရုဲမာဲတုဲ တန်တဴဒၟံၚ် လ္တူညးဍုၚ်ကွာန်တံကီုဏောၚ်။ ညးဍုၚ်ကွာန်တအ်ဂှ်တှ်ေ ဗော်ဏံဒးနွံထေက်ရောၚ်မ္ဂး ပိုယ်တံ ဟွံဒေါအ်ဟွံဂွံ ဒးတတ်ထ္ပာ်အာပေါဲရုဲမာဲဂှ်ဏောၚ်။ ယဝ်ရ ညးဍုၚ်ကွာန်တအ်ညာတ်ကၠုၚ် ဗော်ဟွံမွဲလေဝ်ဂွံမ္ဂး ဗော်ပိုယ်တအ် ဒးရုဲဂၠံၚ်တၞဟ်ဟ်ဏောၚ်။ ဗီုလဵုဂွံကၠောန်ရောဟီုဂှ် ပိုယ်တံ ဒးကလေၚ်ချပ်ဏောၚ်” သာ်ဝွံ သ္ဂးရ။
ဟိုတ်ဂှ်ရ ပွမလုပ်ပြိုၚ်၊ ဟွံပြိုၚ် ပေါဲရုဲမာဲကံၚ်ဇြဳပၞာန် ကၠောန်ဗဒှ်ဂှ်ဝွံ သ္ပသ္ဇိုၚ်ကဵု လညာတ်ဆန္ဒညးဍုၚ်ကွာန်ဒေသတံကဵု ကောန်ဗော်တံဂှ်တုဲ သ္ဂုတ်သွာတ်အာဏောၚ်ဂှ် ညးဆက်ဟီုရ။
အတိုၚ်သၞောဝ်ဗော်ပရေၚ်ဍုၚ်ကွာန် ကံၚ်ဇြဳပၞာန် မသ္ပဒတန်လဝ် ပ္ဍဲသၞာံ ၂၀၂၃ ဂိတုဂျာန္နဝါရဳဂှ်မ္ဂး ယဝ်ဒှ်ဗော်စန်ဒက်အာ အပ္ဍဲရးဒေသ ဟွံသေၚ်မ္ဂး ပ္ဍဲတွဵုရးမွဲမွဲမ္ဂး ပ္ဍဲပေါဲရုဲမာဲဂှ် ဗွဲတွဵုမအောန် ဒးလုပ်ပြိုၚ်အာ ဒၞါဲဒေသဆန္ဒမာဲ မွဲဒၞါဲရ။
ဒေသဆန္ဒမာဲ ညးစၞးကၠတ်ထဝ်ကောန်ဍုၚ်အရၚ် ပ္ဍဲရးဒေသ ဟွံသေၚ်မ္ဂး အပ္ဍဲတွဵုရးတံ မပါလုပ် ဗွဲတွဵုမအောန် ပ္ဍဲကဵုဒေသဆန္ဒမာဲမွဲဂှ် ယဝ်ဗော်ဇကု လုပ်ပြိုၚ်ဟွံမာန်မ္ဂး အခေါၚ်ဂွံဆက်ဒတူလိုၚ် နဒဒှ်ဗော်ပရေၚ်ဍုၚ်ကွာန် ဟွံမွဲပုဟ်ဂှ် ထ္မံက်ထ္ၜးလဝ်ရ။
မွဲလ္ပာ်ဂှ်ပၠန် ဗော်ပရေၚ်ဍုၚ်ကွာန် မစန်ဒက်အာကဆံၚ်ကၟိန်ဍုၚ် ဖျေံသ္ဇိုၚ်ၝောံဍုၚ်တံဂှ်ဝွံ ကၠုၚ်ပံက်ဒၟံၚ်ရုၚ် ကဆံၚ်ပွိုၚ်ဍုၚ် ပ္ဍဲတွဵုရးဍုၚ်မန်တုဲ ဂွံဂွံကောန်ဗော်ဂှ် စန်ဒက်ကၠုၚ်ဒၟံၚ်တံလေဝ် နွံကၠုၚ်ရ။
စပ်ကဵုပရေၚ်ဏံတုဲ နူကဵုသြၚ်လောန်တိုၚ်(မ်) သၟာန်ရံၚ် လညာတ်ဗော်ညဳသၟဟ်မန် မဒှ်ဗော်ပရေၚ်ဍုၚ်ကွာန်ကောန်ဍုၚ်အရၚ် ဖျေံသ္ဇိုၚ်တွဵုရးဂှ် နာဲတာန်ယှိုဲ ဟီုကၠုၚ်သာ်ဏံရ။
“ပြဟ်ဟ်ဏံ အရာဂွံဒးဂွိၚ်ဂှ်ဟွံမွဲဏီ။ ဗော်ပ္တိုန်လဝ်စရၚ် ကဆံၚ်ကၟိန်ဍုၚ်တအ် ပ္ဍဲတွဵုရးဍုၚ်မန်ဏံဂှ် ဟိုတ်နူၜိုဟ်သြိုဟ်ဒၟံၚ်ညိညတုဲ ကၠုၚ်ပံက်လဝ်ရုၚ်ရနွံ။ ဍေံတံ စန်ဒက်ကၠုၚ်ပြာပြာကတ်တ်ဂှ် စဵုကဵုအခိၚ်လၟုဟ် ဟွံဂွံဆဵုကေတ်ဏီပုဟ်” သာ်ဝွံ သ္ဂးရ။
နကဵုဗော်ညဳသၟဟ်မန် ညံၚ်လၟိဟ်ကောန်ဗော်ဂွံဂၠိုၚ်တိုန်ကၠုၚ်ဂှ် စန်ဒက်ဒၟံၚ်လၟေၚ်ၚ်တုဲ ကုညးမနုက်တိတ်၊ ညးမစုတိအာတံဂှ် စၟဳတ်ဒၟံၚ်တုဲ ဒဒှ်မပံက်လဝ်ရုၚ် ပ္ဍဲပွိုၚ်ဍုၚ်တံဂှ်လေဝ် လၟိဟ်ပေၚ်ဒၟံၚ်ယျဂှ် ညးဆက်ဟီုရ။
ညံၚ်ရဴဗော်ပရေၚ်ဍုၚ်ကွာန်ဇၞော်ဇၞော်တၞဟ်သ္အာၚ်ဂမၠိုၚ် ဆဵုဂဗကဵုညးဍုၚ်ကွာန်တုဲ စှ်ေစန်ဒက်လဝ်ဂှ် ဟွံမွဲဏီတုဲ လၟေၚ်ကမၠောန် ၜိုတ်ကိစ္စရီုဗၚ်ပရေၚ်မၞိဟ်၊ ၜိုတ်ကောံဓရီုကဆံၚ်ဗဟဵု ကေုာံ ကဆံၚ်ပွိုၚ်ဍုၚ်တံရ နွံဂှ် သ္ဂးရ။
ဗော်ညဳသၟဟ်မန်ဂှ်တှ်ေ စဵုကဵုအခိၚ်လၟုဟ် ညးစၞးဗော် ဒံက်တာဗညာအံၚ်မိုဝ် ကေတ်လဝ်လျိုၚ် နဒဒှ်ကောန်ဂကောံကဵုကသပ် ကုကံၚ်ဇြဳပၞာန် ကဆံၚ်ဗဟဵုတုဲ နာဲလျးတၟးဂှ်တှ်ေ ကေတ်လဝ်လျိုၚ် နဒဒှ်ကောန်ဂကောံကံၚ်ဇြဳပၞာန်တွဵုရးဍုၚ်မန် ကေုာံ ဝန်ဇၞော်ကေၚ်ကာပရေၚ်ပိုန်ဒြပ်ရ။
ဟိုတ်ဂှ်ရ လ္တူဗော်ညဳသၟဟ်မန် ပံၚ်တောဲလဝ်ကဵုကံၚ်ဇြဳပၞာန်ဂှ် ညးဍုၚ်ကွာန်ဒေသမန်ဂမၠိုၚ် လညာတ်ဟွံတုပ်သၟဟ်နွံတုဲ ယဝ်ၜတ်ကၞာတ်ကဵုဇြဟတ်ထံက်ဂလာန် ကာလဟွံဂွံသီအဝဵုတေံဂှ်မ္ဂး ယအ်စှ်ေကၠုၚ်ရ။
ပေါဲရုဲမာဲကံၚ်ဇြဳပၞာန် ရပ်စပ်စက်ကဵုမာဲအဳလက်ထရဝ်နေတ်တုဲ ကၠောန်ဗဒှ်အာဂှ် ညးဍုၚ်ကွာန်အလုံဍုၚ်မွဲ ပါလုပ်သီုညးဍုၚ်ကွာန်တွဵုရးဍုၚ်မန်တအ်ဂှ် စိုတ်လုပ်စအောန်လောန်တုဲ ဂကောံဇြဟတ်ပၠန်ဂတးတအ်ဂှ်တှ်ေ ဒစဵုဒစး ဗတိုက်သရိုဟ်အာဏောၚ်ဂှ် ဟီုပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ