မတ်မလီု၊ ဂျူလာၚ်
သွက်ဂွံရပ်စပ်စက်ကဵုမာဲ ပ္ဍဲပေါဲရုဲမာဲကၠုၚ်စိုပ်ဏံဂှ်တုဲ ပ္ဍဲတွဵုရးဍုၚ်မန်ဂှ် ကံၚ်ဇြဳပၞာန် စဖျေံကဵုဒၟံၚ် တန်ဗ္တောန်သ္ပအ္စာတံယျဂှ် ဂွံတီကေတ် အတိုၚ်ဂလာန် ညးမစုက်လုက်ကဵု ရုၚ်ကဝ်မယှေန်ပေါဲရုဲမာဲတွဵုရးရ။
ကံၚ်ဇြဳပၞာန်ဝွံ ပြဟ်ဟ်ဏံ ပံက်လဝ်ကဵုတန်ဗ္တောန်သ္ပအ္စာ စပ်ကဵုပရေၚ်ရပ်စပ်စက်ကဵုမာဲအဳလက်ထရဝ်နေတ်ဗၟာ MEVM နူဂိတုဂျောန် ၂၆ စဵုကဵုဂိတုဂျောန် ၂၈ ပွိုၚ်ပိတ္ၚဲ လ္တူဍုၚ်မတ်မလီု တွဵုရးဍုၚ်မန်ရ။
တန်ဗ္တောန်ဏံဂှ် မၞိဟ် ၁၀၀ တၠ တိုန်စိုပ်ကတ်ဗ္တောန်လဝ်တုဲ သ္ဇိုၚ်ဝန်ဌာနပရေၚ်ပညာ၊ သ္ဇိုၚ်ဝန်ဌာနက္ဍိုက်ပ်ပရေၚ်အုပ်ဓုပ်ကာနာန ကေုာံ သ္ဇိုၚ်ဝန်ရုၚ်ကဝ်မယှေန်ပေါဲရုဲမာဲတအ် တိုန်စိုပ်လဝ်ရောၚ် ဂွံတီကေတ်ရ။
သွက်ဂွံဆက်ပံက်အာ တန်ဗ္တောန်စပ်ကဵုဗီုပြၚ်ဂွံရပ်စပ် စက်ကဵုမာဲ MEVM ပ္ဍဲပွိုၚ်ဍုၚ်မသှ်ေသၟေဟ်ဒၟံၚ်တံဂှ်လေဝ် ပလေဝ်ပလေတ်လဝ်ရောၚ် ညးမစုက်လုက်ကဵု ရုၚ်ကဝ်မယှေန်ပေါဲရုဲမာဲတွဵုရးမွဲတၠ ဟီုရ။
က္ဍိုပ်သ္ကိုပ်ပၞာန်သီအဝဵု ကြဴနူဟီုကၠုၚ် ကၠောန်အာပေါဲရုဲမာဲ ကၞောတ်သၞာံဏံကဵု သၞာံဂတဏံဏောၚ်တုဲဂှ် ပ္ဍဲဒေသကံၚ်ဇြဳပၞာန် ထိၚ်ဒက်ဂွံလဝ်တအ်ဂှ် ပလေဝ်ပလေတ်ကၠုၚ်ဒၟံၚ် သွက်ဂွံကၠောန်ပေါဲရုဲမာဲတအ် အဆက်က်ရ။
ပ္ဍဲတွဵုရးဍုၚ်မန်ဂှ်တှ်ေ ကံၚ်ဇြဳပၞာန် ၜိုန်ရဟီုဒၟံၚ် ကၠောန်အာပေါဲရုဲမာဲဏောၚ်ကီုလေဝ် ပ္ဍဲကဵုပွိုၚ်ဍုၚ်ဂကောံဇြဟတ်ပၠန်ဂတးတအ် အုပ်ဓလီုဂွံလဝ် မပ္တံကဵုပွိုၚ်ဍုၚ်ကျာ်ထဝ်၊ ပွိုၚ်ဍုၚ်ၜဳကလေၚ်၊ ပွိုၚ်ဍုၚ်သဓီု၊ ပွိုၚ်ဍုၚ်ကျာ်မြဟ်၊ ပွိုၚ်ဍုၚ်ဇြပ်ဗု ကေုာံ ပွိုၚ်ဍုၚ်ရေဝ်တံဂှ် ကၠောန်ပေါဲရုဲမာဲပေၚ်ၚ်မာန်ဟွံသေၚ်ရ။
လ္ပာ်ဂကောံဇြဟတ်ပၠန်ဂတးဖျေံသ္ဇိုၚ်ဒေသတအ်ဂှ်တှ်ေ နကဵုညးဍုၚ်ကွာန်တအ် လ္ပပံၚ်တောဲရေၚ်တၠုၚ်အာ ပ္ဍဲပေါဲရုဲမာဲကံၚ်ဇြဳပၞာန်သီအဝဵု မကၠောန်ဗဒှ်ဏံညိဂှ် ဖတိုက်ဖ္အောဝ်လဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−MOI