နေဗျဳဒဝ်၊ ဂျူလာၚ် ၄
တိုက်သြန်ဂၠးတိ ခယျတော်ဆလဝ် ပရေၚ်ပိုန်ဒြပ်ဍုၚ်ဗၟာဂှ် ကၠာတေံ စၟဳလဝ်စဵုကဵု ၂ ဒသမ ၅ ကီုလေဝ် အခိၚ်လၟုဟ်ဂှ် ခယျကေတ်လဝ် ဒဒှ်ရစှ်ေကၠုၚ် စဵုကဵု လက္ချန်နုက် ၂ ဒသမ ၅ မာန်ရောၚ်ဂှ်ဝွံ ဟွံဍာံပြပုဟ်ဂှ် က္ဍိုပ်သ္ကိုပ်ပၞာန်သီအဝဵု သ္ကိုပ်ပၞာန်ဇၞော် မေန်အံၚ်လှာၚ် ပါ်ပါဲလဝ်ရ။
တုဲကၠုၚ်ဂိတုဂျူလာၚ် ၂ တေံ အခိၚ်ညးဆဵုဂဗကဵု ဌာနသၟဝ်တဲညးဂမၠိုၚ် ပ္ဍဲကဵုကောံဓရီုပညဳပညပ်ကမၠောန် သွက်ပရေၚ်ပိုန်ဒြပ်ကၟိန်ဍုၚ်ဂွံတောတက် မကၠောန်ဗဒှ်လဝ် ပ္ဍဲနေဗျဳဒဝ်ဂှ် က္ဍိုပ်သ္ကိုပ်ပၞာန် ပါ်ပါဲကၠုၚ်လဝ် သာ်ဏံရ။
က္ဍိုပ်သ္ကိုပ်ပၞာန်ဂှ်တှ်ေ ပရေၚ်ပိုန်ဒြပ် မွဲမွဲကၟိန်ဍုၚ်ဂှ် ၜတ်ကၞာတ်ကဵု GDP တုဲ ပ္ဍဲသၞာံဘဏ္ဍာ ၂၀၂၄−၂၀၂၅ ဂှ် GDP ဍုၚ်ပိုယ် နွံလဝ် ၇၆ ဒသမ ၄ ဗဳလျာန် သြန်ဒဝ်ဠာအမေရိကာန်တုဲ ပ္ဍဲသၞာံ ၂၀၂၅−၂၀၂၆ ဂှ် ညံၚ်ဂွံဇၞော်ပၟဝ်တိုန် စဵုကဵု ၈၁ ဒသမ ၆ ဗဳလျာန်ဂှ် စၟဳလဝ်ရောၚ် သ္ဂးရ။
စၟဳလဝ်သာ်ဏံတုဲ အခိၚ်မရေၚ်တၠုၚ်ဒၟံၚ် ညံၚ် GDP ဂွံဇၞော်ပၟဝ်ကၠုၚ် ဗၞတ် ၅ ဒဿမ ၂ ဗဳလျာန်ဂှ် အရာတိုက်သြန်ဂၠးတိ မခယျကၠုၚ် ပရေၚ်ပိုန်ဒြပ်ဍုၚ်ဗၟာ စှ်ေအာ စဵုကဵုလက္ချန်နုက် ၂ ဒဿမ ၅ မာန်ဂှ်ဝွံ တၚ်နၚ်စရၚ်မတော်လဝ်ဂမၠိုၚ် ဟွံဍာံပြသၟးဟွံက သီုကဵုဟွံဍိုက်ပေၚ်ပုဟ်ဂှ် ပါ်ပါဲလဝ်ရ။
တၠကမၠောန်ပရေၚ်ပိုန်ဒြပ်မွဲတၠဂှ်တှ်ေ တိုက်သြန်ဂၠးတိဝွံ တော်ကေတ်လဝ် နကဵုၚုဟ်မးကြပ်အိုတ်တုဲ ယဝ်ဟွံဒးမ္ဂးလေဝ် ဒှ်ဒၟံၚ်ကြပ်တုပ်အိုတ်ရတုဲ အခိၚ်လၟုဟ်ဂှ်လေဝ် ဟိုတ်နူၚုဟ်မးသြန်စှ်ေဒၟံၚ်ဂှ်ကီု သီုကဵုပရေၚ်ကၟာတ်လဒဵုကေတ်လဝ်အရေဝ်တံဂှ်တုဲ ပရေၚ်ပိုန်ဒြပ်ယာက္ဍိုပ်ဟွံမာန်ဏီရောၚ် ဟီုရ။
“တိုက်သြန်ဂၠးတိ တော်သရောပ်ကေတ်လဝ်ကြပ်အိုတ်ဂှ်တုဲ ၜိုတ်ဟွံဒးတၟံကၠံပေၚ်ၚ်ကီုလေဝ် ဒှ်ဒၟံၚ်ဂၞန် ဆောံသရောပ်ကေတ်လဝ် ကြပ်အိုတ်ရဏောၚ်။ ညအ်ဂှ် ပြာကတ်မံၚ်ရ။ ၚုဟ်မးသြန်လေဝ် စှ်ေကၠုၚ်အဆက်က်ကီု ပရေၚ်သွံရာန်ပိုတ်သ္ကုတ်ကီု၊ ညးဂၠးတအ် ကၟာတ်လဒဵုတပ်ဒဏ်တအ်ကီု နွံကၠုၚ်အဆက်က်တုဲ သာ်လဵုမှ ပရေၚ်ပိုန်ဒြပ် ကလေၚ်ယာက္ဍိုပ်ဟွံမာန်ပုဟ်။ ညအ်ဂှ် ကယျာန်ပါဲဟွံဂွံ။ ဒးဒုၚ်တဲဏောၚ်” သာ်ဝွံ သ္ဂးရ။
သ္အာၚ်နူဂှ်ပၠန် တၠကမၠောန်ပရေၚ်ပိုန်ဒြပ် အပ္ဍဲဒေသဂမၠိုၚ်ဝွံ ဟိုတ်နူၚုဟ်ကၠောန်ပ္တိတ်ဗၞိက် က္ဍၚ်မံၚ်ကီု၊ ဂၠါဲကောန်ကလောန်စိုန်သကီုဝါတ်ကီု၊ ဟွံဂွံပၟတ်ဓာတ်လလဳ ဗွဲလၟေၚ်ၚ်ကီုတံဂှ်တုဲ ကမၠောန်ဂွံဂေတ်ဂြိပ်ရဂှ် အခိၚ်ဒှ်ဒၟံၚ်အခက်အခုဲဂှ် က္ဍိုပ်သ္ကိုပ်ပၞာန် ဟီုကၠုၚ် ဒဒှ်ရရေၚ်တၠုၚ်ဒၟံၚ် ညံၚ် GDP ဂွံတိုန်ဂှ်ဝွံ ဟွံစှ်ေကဵုနတဲပုဟ်ဂှ် ညးဆက်ဟီုရ။
တိုက်သြန်ဂၠးတိဂှ်တှ်ေ ဟိုတ်နူကသဳတိ ပ္ဍဲဂိတုမာတ်တုဲကၠုၚ်တေံဂှ်တုဲ ပရေၚ်ပိုန်ဒြပ်ဍုၚ်ဗၟာဝွံ အပ္ဍဲသၞာံဘဏ္ဍာ ၂၀၂၅−၂၀၂၆ ဂှ် စှ်ေကၠုၚ်စဵုကဵု ၂ ဒသမ ၅ တၟံကၠံမာန်ရောၚ် ပ္ဍဲဂိတုဂျောန် ၁၂ တုဲကၠုၚ်တေံ လလောၚ်ပ္တိတ်လဝ် အရာညးတအ် မခယျတော်ဆလဝ်ဂှ်ရ။
ဟိုတ်နူတိချဳလဝ်ဂှ်တုဲ တိသ္ၚိကၠအ် ကေုာံ စမြိုၚ်သ္ဇိုၚ်ဂမၠိုၚ် လီုလာ်အာလဝ်ဂှ် ၜိုတ် ၁၁ ဗဳလျာန်ဒဝ်ဠာအမေရိကာန်နွံတုဲ နကဵု GDP ကၟိန်ဍုၚ်မ္ဂး ဗ္ဒါဲ ၁၄ တၟံကၠံနွံတုဲ ဗၞိက်ပတိတ်ပရေၚ်ပိုန်ဒြပ်တံဂှ်လေဝ် ဟွံဂွံဗီုကၠာတေံရတုဲ သဝ်စှ်ေအာ ၜိုတ် ၂ ဗဳလျာန်ဒဝ်ဠာမာန်ရောၚ် သ္ၚဳဂၠိပ်လဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−MOI/AFP