နေဗျဳဒဝ်၊ ဂျောန် ၄
အပ္ဍဲပၞာန်သီအဝဵု ပွိုၚ်ပန်သၞာံပြၚ်ဏံ ပ္ဍဲကဵုပေါဲဗ္တိုက်ပၠန်ဂတးသၞောတ်တၠအဝဵုပၞာန်တအ်ဂှ် က္ၜၚ်ကျာဗ္တိုက်၊ က္ၜၚ်ကျာပလံၚ်ဇွောံမ ကေုာံ က္ၜၚ်ကျာသၞေၚ်ဝဲ သွက်ဂွံဗတိုက် နူဒပ်ကျာကံၚ်ဇြဳပၞာန်ဂှ် သရိုဟ်စှ်ေအာလဝ် နွံကၠုၚ်ၜိုတ်မွဲဒါဇြိန်ပြၚ်ရ။
က္ၜၚ်ကျာတံဏံဝွံ သရိုဟ်စှ်ေအာလဝ် ပ္ဍဲကဵုကချေၚ်၊ ရးသေံသၟဝ်ကျာ၊ ကရေၚ်ဍာဲ၊ ကရေၚ် ကေုာံ သက်ကိုၚ်တံဂှ်တုဲ က္ၜၚ်ကျာဗ္တိုက် ပန်ဖ္ဍိုက်ကဵု က္ၜၚ်ကျာသၞေၚ်ဝဲ ထပှ်ဖ္ဍိုက် ပါလုပ်ရောၚ် ဂွံတီကေတ် ဇရေၚ်တမ်ရိုဟ်ပရိုၚ်ဗလးတိ ကေုာံ ဗွိုပ်ဒပ်ပၞာန် သ္ပလဝ်ဇြဳဒဳအာမ်တံရ။
က္ၜၚ်ကျာသရိုဟ်စှ်ေအာတံဂှ်ဝွံ လ္ပာ်ဇြဟတ်ပၠန်ဂတးတအ် ပန်ဖျေံမာန်လဝ် အကြာပေါဲဗ္တိုက်တံဂှ်လေဝ် ပါလုပ်တုဲ ယဝ်တော်စုတ် က္ၜၚ်ကျာဗတိုက်မွဲဖ္ဍိုက် မကၠေံအာ အခိၚ်ပဝ်ယာန်ဒၟံၚ် သွက်ပရေၚ်ပကတ်ပကေၚ်ဂှ်မ္ဂး ၜိုတ် ၁၂ ဖ္ဍိုက် နွံကၠုၚ်ရ။
ကံၚ်ဇြဳပၞာန်ဂှ်တှ်ေ စပ်ကဵုက္ၜၚ်ကျာ သရိုဟ်လီုစှ်ေဒၟံၚ်သာ်ဏံဂှ်တုဲ လလောၚ်ပ္တိတ်လဝ်ပရိုၚ် သောဲသောဲဗြောဲဗြောဲဂှ် ဟွံမွဲကီုလေဝ် လ္ၚဵုတံဂှ်တှ်ေ ဟိုတ်နူစက်လီုဂးတုဲ တးပါဲကၠုၚ်နွံရ။
(ကိုနောၚ်ရိုး) ညးဒုၚ်လျိုၚ်သုတေသနလ္ပာ်ပၞာန် ဂကောံလ္ၚတ်ကေၚ်ကာပၞာန်ဗၟာ ကေုာံ ပရေၚ်ဂီုကၠီု MDSI ဂှ်တှ်ေ သီုကဵုဒးဒုၚ်ပန်ဖျေံလဝ်တအ်ဂှ်မ္ဂး က္ၜၚ်ကျာဗတိုက် ကံၚ်ဇြဳပၞာန်တအ် ၜိုတ် ၁၁ ဖ္ဍိုက် သရိုဟ်လေၚ်ဒိုက်အာလဝ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“က္ၜၚ်ကျာဗ္တိုက် က္ၜၚ်ကျာသၞေၚ်ဝဲပၞာန် က္ၜၚ်ကျာသွက်ပရေၚ်ဗတိုက်တံဂှ် ၜိုတ် ၁၀ ဖ္ဍိုက်နွံရောၚ် ပိုယ် သ္ၚဳဂၠိပ်ကေတ်ရ။ ဆ္ဂး ဟွံဂွံပကောံပကေဝ်လဝ် စၟတ်သမ္တီပုဟ်။ သီုက္ၜၚ်ကျာဗတိုက် သရိုဟ်စှ်ေ ပ္ဍဲစၟတ်တ္ၚဲ ၁ ဏံဂှ်မ္ဂး ကြဴနူသီအဝဵုတုဲဂှ် က္ၜၚ်ကျာဗတိုက်၊ က္ၜၚ်ကျာသွက်ပရေၚ်ဗတိုက် က္ၜၚ်ကျာသွက်ဂွံပလံၚ်ဇွောံမ အပံၚ်သီုဖအိုတ်ဂှ် ၜိုတ် ၁၁ ဖ္ဍိုက်နွံဏောၚ် ပိုယ်ဟီုဂွံရ” သာ်ဝွံ သ္ဂးရ။
ပ္ဍဲဂိတုဂျူလာၚ် စၟတ်တ္ၚဲ ၁ အခိၚ်ဗ္တံဂှ် က္ၜၚ်ကျာဗ္တိုက်မွဲဖ္ဍိုက် နူဒပ်ပၞာန်ကျာ အခိၚ်ပကတ်ပ္ကေၚ်ဒၟံၚ်ဂှ် ဟိုတ်နူစက်လီု ဟွံသေၚ်မ္ဂး ဟိုတ်နူရာသဳဥတုပရေံတုဲ ကၠေံအာလဝ်ရောၚ် ပ္ဍဲဂိတုဂျူလာၚ် ၃ တေံ ကံၚ်ဇြဳပၞာန် လလောၚ်ပ္တိတ်ကၠုၚ်ပရိုၚ်ရ။
က္ၜၚ်ကျာကၠေံအာဂှ် ၜိုတ်ခြာဇမ္ၚောဲ ၁၃၀ ကဳလောမဳတာ နူဗွဲဒိုဟ်အဂၞဲ နေဗျဳဒဝ်ဂှ် ကၠေံအာလဝ် နူကဵုဗဗဵုမတ်ရေဒါ လွာဲဂှ်တုဲ အဆက်ပိုတ်အာလဝ်ရောၚ် သ္ဂးရ။
ၜိုန်ဟွံလလောၚ်တြးလဝ် ဂကူက္ၜၚ်ကျာ သောဲသောဲဗြောဲဗြောဲကီုလေဝ် မွဲဒမြိပ်ပွဳဗွိုၚ်အဆက်ပိုတ်အာဂှ် ဂၠိုက်ဂၠါဲဒၟံၚ်ရောၚ် ကံၚ်ဇြဳပၞာန် ကဵုလဝ်သမ္တီ ပ္ဍဲလိက်ပရိုၚ်တြးဝါဒညးတအ်ရ။
စပ်ကဵုက္ၜၚ်ကျာကံၚ်ဇြဳပၞာန် ကၠေံအာဂှ်တုဲ ပ္ဍဲဂိတုဂျူလာၚ် စၟတ်တ္ၚဲ ၃ ဂှ် လ္ပာ်ဂကောံဒပ်ပၠန်ဂတးကရေၚ်ဍာဲတအ် ဒဒှ်ရပန်ဖျေံလဝ်ဂှ် လလောၚ်ပ္တိတ်ကၠုၚ် သီုကဵုစၟတ်သမ္တီဗီုဓာတ်ဂမၠိုၚ်ရ။
ကြဴနူပရေၚ်ပၞာန် ၁၀၂၇ တုဲ ကံၚ်ဇြဳပၞာန် ပလေဝ်ပလေတ်ကၠုၚ်ဒၟံၚ် နဲဗျူဟာပၞာန်တံဂှ်တုဲ ပပ္တံနူသၞာံ ၂၀၂၄ တုဲ ရပ်စပ်စကာကၠုၚ်ဒၟံၚ် ပရေၚ်ပြုပြေၚ်ပၞာန်ကျာ ကေုာံ နဲကွတ်ပညာကဆံၚ်သၠုၚ်ဂမၠိုၚ်ရ။
ကံၚ်ဇြဳပၞာန် စွံပွန်ကဵုဒၞါဲမဆေၚ်စပ်ကဵုညးဍုၚ်ကွာန်ဂမၠိုၚ် မၞုံပ္ဍဲတိဍာ်ဂကောံပၠန်ဂတးတအ် မချဳဒရာၚ်ဒၟံၚ်တံဂှ်ကဵု တိဍာ်ထိၚ်ဒဝ်တံဂှ်တုဲ ထောံမခတိုဟ် ဗ္တိုက်ကၠုၚ်ဒၟံၚ် ကဵုက္ၜၚ်ကျာဗ္တိုက်တံဂှ် အဆက်က်ရ။
ဟိုတ်ဂှ်ရ က္ၜၚ်ကျာဂမၠိုၚ် ဒးဒုၚ်ပန်ဖျေံ လီုစှ်ေတအ် နွံကၠုၚ်ကီုလေဝ် ယဝ်ဟွံဂွံလဝ်သဂံၚ်ကဵုပၞာန်ကျာဂှ်မ္ဂး ကံၚ်ဇြဳပၞာန် ကျပၞာန်ဏောၚ်ဂှ်ရ ရပ်စပ်စကာကၠုၚ်ဒၟံၚ် ကြာန်န်ရောၚ် ဗိုလ်ဇၞော်ဇြေန်ယဝ် သ္ပလဝ်ဇြဳဒဳအာမ်ဂှ် သ္ၚဳဂၠိပ်လဝ်ရ။
“ ပ္ဍဲပၠန်ဂတးကညၚ်ဏံ က္ၜၚ်ကျာသၞေၚ်ဝဲတအ် လီုစှ်ေကီု ဒးဒုၚ်ပန်ဖျေံကီုဂှ် နွံကၠုၚ်ၜိုတ်မွဲဒါန်ဇြိန်ပြၚ်ယျ။ ဆ္ဂး အရာမပန်ဖျေံ လီုစှ်ေသာ်ဏံ နွံကၠုၚ်ကီုလေဝ် ပရေၚ်ဗတိုက်ပၞာန်ကျာဂှ် ဟွံယအ်အာတုဲ ယဝ်ဟွံဂွံလဝ်ပၞာန်ကျာဏံမ္ဂး ဒပ်ပၞာန် ကျပၞာန်ယျ။ ဟိုတ်ဂှ်ရ ဍေံတံ ဒးရပ်စပ်တွဵုဏောၚ်။ တုဲပၠန် ပၞာန်ကျာဂှ်လေဝ် ပ္ဍဲပၠန်ဂတးကညၚ်ဏံမှ သုၚ်စောဲဂၠိုၚ်ကၠုၚ်တုဲ ကၠာတေံ ကၠာပၠန်ဂတးကညၚ်ဏံဟွံဂွံဒှ်ဂှ် ဗီုမိက်ဂွံရပ်ဂှ် ရပ်ဒၟံၚ်ပၞာန်ကျာတအ်ဏံ ကြာန်န်ဟွံဂွံပုဟ်။ လၟုဟ်ဂှ် ရပ်ကြာန်န်ဂွံမံၚ်” သာ်ဝွံ သ္ဂးရ။
တုဲကၠုၚ်ဂိတုဂျောန် ၁၀ တေံ အပ္ဍဲပေါဲဗ္တိုက်သီဗ္ဒိုပ်ဗၠာဲသၟိၚ်(ကန့်ဒေါင့်) ပွိုၚ်ဍုၚ်ပလေဝ်(ပုလဲ) ရးသက်ကိုၚ်ဂှ် ဒပ်ပၞာန်ဗၠးၜးညးဍုၚ်ကွာန် PLA ပန်ဖျေံလဝ် က္ၜၚ်ကျာဗ္တိုက်မွဲဖ္ဍိုက်တုဲ ကေတ်လဝ်စၟတ်သမ္တီ သီုကဵုကဝေက်က္ၜၚ်ကျာ မတူပၟတ်လီုအာလဝ်ဂှ်ရ။
ပ္ဍဲဂိတုမေ ၂၀ တေံဂှ်လေဝ် ဒပ်ပၞာန်ဗၠးၜးကချေၚ် KIA ပန်လဝ် က္ၜၚ်ကျာသၞေၚ်ဝဲပိဖ္ဍိုက် မကၠုၚ်ကဵုအရီုဗၚ်ပၞာန် ပ္ဍဲတွဵုရးကချေၚ်၊ ဍုၚ်ဗာန်မဝ်ဂှ်တုဲ က္ၜၚ်ကျာသၞေၚ်ဝဲ ဂကူ Mi-17 ၂ ဖ္ဍိုက် ဒးအာလဝ်တုဲ မွဲဖ္ဍိုက် လီုစှ်ေတုဲ သှ်ေမွဲဖ္ဍိုက်ဂှ် ဒးဂ္စါန်စှ်ေလဝ် လွာဲလွာဲဂှ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−KNDF