ဝါယှေန်တာန်၊ ဂျူလာၚ် ၄
ဟိုတ်နူအမေရိကာန် ဗ္တိုက်ကၠုၚ်လဝ် လောန်ကၠုၚ် ၁၀ တ္ၚဲတေံဂှ်တုဲ ကိုန်စဳမာန်နျူကလဳယျာအဳရာန်ဝွံ ကဆံၚ်သဝ်စှ်ေအာ ၜိုတ်ၜါသၞာံရောၚ် ဌာန်ဂအုပ်ပၞာန်အမေရိကာန် ပေန်တဂေါန် ဟီုလဝ် ပ္ဍဲဂိတုဂျူလာၚ် ၂ တေံရ။
ပ္ဍဲဒဒှ်မလ္ၚတ်လဝ်ကၠာတဲဏံ မမံက်ပြးအာ အကြာညးဍုၚ်ကွာန်တအ်ဂှ် အရာမဇီုကပိုက်ဒး ဒၟါနူအမေရိကာန် ဗတိုက်ကၠုၚ်ဝွံ ဂွံဆဵုကေတ် ဖအောန်ဖျေံလဝ်ကီုလေဝ် အတိုၚ်ဂလာန်ပေန်တဂေါန်တံဂှ်မ္ဂး ပရေၚ်ဗတိုက်အမေရိကာန်ဂှ် သွဟ်တိတ်လဝ် အတိုၚ်မရန်လဝ်ဂှ်ရောၚ် သ္ဂးရ။
ယှံၚ်ပါနေဝ် ညးမၞုံအခေါၚ်ဟီုဂး ပေန်တဂေါန်ဂှ်တှ်ေ ကိုန်စဳမာန်နျူကလဳယျာအဳရာန် ကဆံၚ်သဝ်စှ်ေအာ စဵုကဵုၜါသၞာံမာန်ရောၚ် သာ်ဝွံ ဟီုလဝ်ကဵု အ္စာပရိုၚ်ဂမၠိုၚ်ကီုလေဝ် စပ်ကဵုညးမဟီုဂးကၠုၚ်သာ်ဏံဂှ်တုဲ သက်သဳဂှ် ဟွံထ္မံက်ထ္ၜးလဝ်ရ။
က္ၜၚ်ကျာထောံမခတိုဟ် ဒပ်ပၞာန်အမေရိကာန်တအ် ဗတိုက်ဏာလဝ် ရုၚ်စက်နျူကလဳယျာအဳရာန်ပိ နကဵုမခတိုဟ်ပလီုဂဒုက်စဵုဒၞါဂမၠိုၚ်၊ နကဵုကမ်လှောဝ်ဂမၠိုၚ်ရ။
ဗတိုက်တုဲ လွာဲဂှ်ဂှ် ဒဒှ်ရညးတံ ပသောၚ်ထောံလဝ် ကိုန်စဳမာန်နျူကလဳယျာအဳရာန်တုဲယျဂှ် သမ္မတအမေရိကာန် ဒဝ်နေဝ်ထြာမ် ဟီုကၠုၚ်လဝ်ရ။
ဆ္ဂး ပ္ဍဲကဵုလိက်ဒုၚ်စဳရေၚ်ထံၚ်ပရိုၚ် မမံက်တိတ်ကၠုၚ်ဂှ်တှ်ေ ဟိုတ်နူပရေၚ်အမေရိကာန် ဗတိုက်ကၠုၚ်ဂှ်တုဲ ရုၚ်စက်နျူကလဳယျာအဳရာန်တအ် ဇီုကပိုက်ဒးအာလဝ် ဇၞော်ကဵုဇြဟတ်ကီုလေဝ် နကဵုအဳရာန် ကလေၚ်စအာ ကိုန်စဳမာန်နျူကလဳယျာတအ်ဂှ် အပ္ဍဲမွဲၜါဂိတုမာန်ဒၟံၚ်ဏီရောၚ် ထ္မံက်ထ္ၜးလဝ်ရ။
သွက်ဂွံသ္ၚဳဂၠိပ်သာ်ဏံဂှ် နကဵုဗွိုၚ်ညးထံၚ်ပရိုၚ်အမေရိကာန်တအ် ဒးကေတ်အခိၚ် ဂၠိုၚ်ကဵုသတ္တာဟ ဟွံသေၚ်မ္ဂး လအ်နူဏံလေဝ် ဒှ်မာန်ရ။
အေဂျေန်ဇြဳကုလသမဂ္ဂ စပ်ကဵုဓာတ်အနုလက်ကၠိုက်ဂှ် နကဵုအဳရာန် ကလေၚ်စအာ ကမၠောန်ပရေၚ်သ္အးဇ္ၚးယူရေနဳယာန် အပ္ဍဲပွိုၚ်မွဲၜါဂိတုမာန်ရောၚ် ဟီုလဝ်ရ။
ကၠာပရေၚ်ဗတိုက်အမေရိကာန် ဟွံဂွံစဂှ် အဳရာန် ပါဲဒလေတ်ဏာလဝ် ယူရေနဳယာန်ညးတအ် မသ္အးဇ္ၚးလဝ်တုဲတံဂှ် ပ္ဍဲသၟဝ်တိဒၞါဲမဇြိုဟ်မွဲမွဲဒၞါဲတုဲ ဒှ်မာန်ရောၚ် ညးစိုန်သ္ကီုဂမၠိုၚ် သ္ဂးရ။
ကြဴနူအမေရိကာန် ဗတိုက်ကၠုၚ်တုဲဂှ် ပ္ဍဲဍုၚ်အဳရာန် ဓာတ်ရေဒဳယောလရုက္တဵု ဟွံဂွံဆဵုကေတ်ပုဟ်ဂှ်လေဝ် ညးမၚ်ရံၚ်နူဍုၚ်သ္အာၚ်ဂမၠိုၚ် သ္ဂးလဝ်ရ။
ဝန်ဇၞော်ကာဍုၚ်သ္အာၚ်အဳရာန်ဂှ်တှ်ေ ဟိုတ်နူအမေရိကာန် ဗ္တိုက်ကၠုၚ်တုဲ ရုၚ်စက်နျူကလဳယျာ လီုလာ်အာ ဇၞော်ကဵုဇြဟတ်ရောၚ် ဟီုလဝ်ရ။
Ref: Reuters