မဝ်သဂိုဝ်၊ ဂျူလာၚ် ၅
ကြဴနူရုယှာ သ္ပကၠုၚ်စၟတ်သမ္တီ ပရေၚ်အုပ်ဓုပ်တာလဳဗာန် အလန်ကၠာအိုတ်တုဲဂှ် ဝန်ဇၞော်ကာဍုၚ်သ္အာၚ် အဖဂါန်နေဿတာန် အမခါန် မူသတာခဳ ဟီုကၠုၚ် ဒှ်တၚ်သ္ဂုတ်သွာတ်မၞုံကုသတ္တိရ။
ပ္ဍဲဂိတုဂျူလာၚ် ၃ တေံ အခိၚ်အမာတ်ကလုတ်ရုယှာ ဒဳမဳထရဳ ဇြာနပ် ဆဵုဂဗကဵု ဝန်ဇၞော် မူသတာခဳ ပ္ဍဲဍုၚ်ကပူဂှ် ဟီုကၠုၚ်လဝ် ဒဒှ်ရအလဵုအသဳညးတအ် သ္ပစၟတ်သမ္တီ ဍုၚ်အေဿလာမ္မေတ် အာမ္မရိတ် အာဖဂါန်နေဿတာန် ဗွဲမလုပ်သၞောဝ်ရ။
တၚ်သ္ဂုတ်သွာတ်ရုယှာဝွံ ဒှ်ပရေၚ်ဆက်ဆောံလ္ပာ်ခိုဟ် လဂါံဇိုၚ်တၟိမွဲတုဲ ဒှ်ပရေၚ်ပညဳပညပ်မၞုံကဵုဖဵု နကဵုဓဝ်ရှ်ေသှ်ေအဲပရဲတုဲ သီုကဵုဒှ်သာဓက သွက်ကၟိန်ဍုၚ်တၞဟ်ဟ်တံရောၚ် ဝန်ဇၞော် မူသတာခဳ ဟီုရ။
ပရိုၚ်ဝးပ္ကဝ်အခေါၚ်အရာမၞိဟ် ဂၠိုၚ်ကၠုၚ်ဂှ် မံက်တိတ်ဒၟံၚ်ကီုလေဝ် ဂကောံတာလဳဗာန် ကြဴနူဂွံအဝဵု ပ္ဍဲသၞာံ ၂၀၂၁ ဂိတုအဝ်ဂါတ်တုဲဂှ် ကော်ဘိက်ကၠုၚ်ဒၟံၚ် ပရေၚ်ဓလိုက်တမ်ရိုဟ်ဂမၠိုၚ် ကေုာံ ပရေၚ်သ္ပစၟတ်သမ္တီ နူဍုၚ်သ္အာၚ်တအ်ရ။
ဟိုတ်နူတၚ်သ္ဂုတ်သွာတ်သာ်ဏံတုဲ ထ္မံက်အာရုပ်ရဴ ပရေၚ်ပံၚ်တောဲမၞုံကဵုဖဵု အကြာၜါဍုၚ်မာန်ဏောၚ်ဂှ် အမာတ်ကလုတ်ရုယှာ စပ်ကဵုဍုၚ်အဖဂါန်နေဿတာန် ဇြာနပ် ဟီုလဝ်ရ။
နကဵုအလဵုအသဳကပူ သွက်ဂွံဒှ်အထံက်အပၚ် ပရေၚ်ဗတိုက်သ္အး ဂဥုဲၜူမာဲ ကေုာံ ပွပကီုပရာပ်တံဂှ်တုဲ ဒဒှ်ရပံၚ်တောဲကၠောန်အာ ပရေၚ်ဇြဟတ်ဓာတ်၊ ပရေၚ်ပိုန်ဒြပ်၊ ပရေၚ်ပလံၚ်ဗစိုပ် ကေုာံ ပရေၚ်သၞောဝ်သ္ဇိုၚ်တံဂှ် အမာတ်ကလုတ်ရုယှာ ဟီုလဝ်ရ။
ဂကောံတာလဳဗာန် အလုံဂၠးမွဲ မသမ္တီကေတ်လဝ် နဒဒှ်ဂကောံပကီုပရာပ်ဂှ် အခိၚ်ဂွံကၠုၚ်အဝဵု ပ္ဍဲအဖဂါန်နေဿတာန်ဂှ် ပ္ဍဲကဵုစရၚ်ကၟိန်ဍုၚ်လၟိဟ်မအောန် မဟွံကၟာတ်လဝ်ရုၚ်ကလုတ် လ္တူဍုၚ်ကပူဂှ် ဍုၚ်ရုယှာလေဝ် ပါလုပ်မွဲကီုရ။
သၞာံဏံ ပ္ဍဲဂိတုဨပရဴတေံ ရုယှာ ရုပ်သီထောံလဝ် နူကဵုဒဒှ်မစၟတ်သမ္တီကေတ်လဝ် ဂကောံတာလဳဗာန် နဒဒှ်ဂကောံပကီုပရာပ်ဂှ်တုဲ သွက်ဂွံသ္ပစၟတ်သမ္တီ နဒဒှ်အလဵုအသဳ မလုပ်သၞောဝ်ဂှ် ဂၠံၚ်ပံက်အာရ။
အလဵုအသဳတာလဳဗာန်ဝွံ သွက်ဂွံဗတိုက်သရိုဟ် ပွပကီုပရာပ်ဂှ် ဒှ်မဟာမိတ်ရောၚ် သမ္မတရုယှာ ဗလာဒဳမာပူတေန် ဟီုလဝ် သၞာံတုဲတေံရ။
အပ္ဍဲပေါဲပၞာန် ပွိုၚ် ၉ သၞာံ ဍုၚ်သဵုဗဳယေတ် ယူနဳယာန် လုပ်စိုပ်ဗ္တိုက်လဝ် အဖဂါန်နေဿတာန် ပ္ဍဲသၞာံ ၁၉၇၉ ဂှ် ကောန်ပၞာန် ၁၅၀၀၀ ပြၚ် ဒးချိုတ်အာလဝ်တုဲ အကြာၜါဍုၚ်ဏံဂှ် ပရေၚ်ပရူဟွံသောၚ်ဟွံအး နွံဒၟံၚ်ရ။
Ref: BBC