ဝဝ်လေ၊ ဂျူလာၚ် ၅
ပပ္တံနူတ္ၚဲအကြာဏံတုဲ ဒပ်ပံၚ်ကောံ KNLA KNDO တအ် စဗ္တိုက်ဒၟံၚ် ဗျူဟာဒပ်ပၞာန် ဖျေံသ္ဇိုၚ်ဍုၚ်ဝဝ်လေ ခရိုၚ်ဗြဝတဳ တွဵုရးကရေၚ် ပယျဵုသေံ−ဗၟာဂှ်ရောၚ် တမ်ရိုဟ်ပရိုၚ်ဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုဂျူလာၚ်ဏံ ဒပ်ပၞာန်ဗၠးၜးကောန်ဂကူကရေၚ် KNLA, ဒပ်စဵုဒၞါကောန်ဂကူကရေၚ် KNDO တအ် ဗိုၚ်ကၟာတ်လဒဵုလဝ် ဗ္ဒိုပ်ကၚ်(ထီးသဲလယ်) ကဵု ကုန်ဗ္ဒိုပ်ဗျူဟာ မဒှ်ဗ္ဒိုပ်ဒပ်ကံၚ်ဇြဳပၞာန်ဂမၠိုၚ် မဖျေံလဝ်သ္ဇိုၚ် ပ္ဍဲဍုၚ်ဝဝ်လေ တံဂှ်တုဲ စဗတိုက်လဝ် နကဵုဒရုၚ်ရ။
ပ္ဍဲဂိတုဂျူလာၚ် ၄ အခိၚ်နူဂယး ၜိုတ် ၁၀ နာဍဳဝိုက်ဂှ် ဒပ်ပံၚ်ကောံ KNLA KNDO တအ် ထောံဂြာတ်မခတိုဟ် ဗ္တိုက်လဝ်ကဵုဒရုၚ် ပ္ဍဲကုန်ဗ္ဒိုပ်ဗျူဟာဝဝ်လေ ကဵု ဗ္ဒိုပ်ကၚ်(ထီးသဲလယ်) တံဂှ်တုဲ ဒပ်ကံၚ်ဇြဳပၞာန်လေဝ် ကလေၚ်ပန်လဝ်ကဵုလွဟ်ဇၞော်ဂှ်ရ ဒတုံဗ္တိုဟ်ထ္ကးအာလဝ် အပ္ဍဲကွာန်ဂမၠိုၚ်ရောၚ် တမ်ရိုဟ်ပရိုၚ်အပ္ဍဲဒေသဂမၠိုၚ် သ္ဂးရ။
ဟိုတ်နူဒပ်ကံၚ်ဇြဳပၞာန် ပန်ကၠုၚ်ကဵုလွဟ်ဇၞော်တုဲ ညးဒေသမွဲတၠ ချိုတ်အာလဝ်တုဲ ၜါတၠ ဇီုကပိုက်ကလိဂွံလဝ်ဝပ်တုဲ ဟိုတ်နူပေါဲဗ္တိုက်တုဲ ညးဍုၚ်ကွာန်ဒေသဂၠိုၚ်ကဵုလ္ၚီ နူကဵုဝဝ်လေကီု သီုနူကွာန်ရးတံဂှ် ဒးဂြိပ်ဒဴပါဲဒလေတ်အာ လ္ပာ်ဍုၚ်သေံရောၚ် ဂွံတီကေတ် ဇရေၚ်တမ်ရိုဟ်ပရိုၚ်အပ္ဍဲဒေသရ။
တမ်ပရိုၚ်ပယျဵုသေံဂှ်လေဝ် ညးဍုၚ်ကွာန်ပါဲဘဲပၞာန် နူဒေသဝဝ်လေ မဂြိပ်စိုပ်ကၠုၚ် ပ္ဍဲဍုၚ်သေံတံဂှ် ဖျေံလဝ်ကဵုဒၞါဲ ပ္ဍဲဗ္ဒိုပ်ပါဲဘဲပၞာန်ယာယဳတံဂှ်တုဲ ကဵုဒၟံၚ်အရီုဗၚ်ပရေၚ်မၞိဟ် အရာမနွံပၟိက်တံဂှ်တုဲ ဟိုတ်နူပေါဲဗ္တိုက်တုဲ ဒပ်ပၞာန်သေံ ပတေၚ်ဂြတ်လဝ် ဂီုကၠီုပယျဵုရောၚ် ထ္မံက်ထ္ၜးလဝ်ရ။
ဒပ်ပံၚ်ကောံ KNLA KNDO ဝွံ ထ္ပက်ပၞာန်ဗတိုက်ဒၟံၚ် တၞဟ်နသ္ဂောံထပ်သီကေတ် ဗျူဟာဝဝ်လေ၊ ဗ္ဒိုပ်ကၚ်(ထီးသဲလယ်) ကေုာံ ဗ္ဒိုပ်ဥကယေတ်ထ မဒှ်ဗ္ဒိုပ်ဒပ်ကံၚ်ဇြဳပၞာန် မသှ်ေဒၟံၚ်ပ္ဍဲပယျဵုသေံတံဂှ်တုဲ ဗ္ဒိုပ်သှ်ေဒၟံၚ် ပိဏံဂှ်ဝွံ ဒးဒုၚ်ဗိုၚ်ကၟာတ်လဒဵုလဝ်တုဲ ကံၚ်ဇြဳပၞာန် ဂွံကၠုၚ်ကဵုအရီုဗၚ်ပၞာန် နူဂၠံၚ်ကုန်ဂှ် ဟွံလောဲသွာရောၚ် တမ်ပရိုၚ်အပ္ဍဲဒေသဂမၠိုၚ် သ္ဂးရ။
စနူဂိတုမေတုဲကၠုၚ်တေံတုဲ ဒပ်ပံၚ်ကောံ KNLA KNDO တအ် ထ္ပက်ပၞာန်ဗတိုက်လဝ် ဗ္ဒိုပ်ဒပ်ကံၚ်ဇြဳပၞာန် နွံအပ္ဍဲဒေသဝဝ်လေ၊ သုကလိ သ္ကုတ်သၠုၚ်ကျာဍုၚ်ဗြဝတဳ တွဵုရးကရေၚ်ဂှ်တုဲ ဗ္တိုက်သီဂွံလဝ် ဗ္ဒိုပ်(ဘလယ်ဒို၊ သေဘောဘိုး၊ ဝါးမီထ၊ ကနဲလေး၊ မော်ခီး၊ ထီးကပလယ်၊ ဘုရင့်နောင်) တအ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်− KNU