ကျာ်မြဟ်၊ ဂျူလာၚ် ၅
ပ္ဍဲတွဵုရးဍုၚ်မန် ပ္ဍဲကဵုထံၚ်စာတ်ကျာ်မြဟ်ဂှ် သ္ဇိုၚ်ဝန်ထံၚ်ဂမၠိုၚ် စဲတ္ၚဲၜုၚ်တက်ပျဲပျာံကၠုၚ်ဒၟံၚ် ကောန်ထံၚ်ပရေၚ်ဍုၚ်ကွာန်တံ ဂၠိုၚ်ကၠုၚ်ဂှ် ညးမစုက်လုက်ကဵု ဂြောဝ်ဂတာကောန်ထံၚ်ပရေၚ်ဍုၚ်ကွာန်တအ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
သ္ဇိုၚ်ဝန်ထံၚ် သၟဝ်တဲကံၚ်ဇြဳပၞာန်တအ်ဝွံ ပတေၚ်ဂြတ်ကၠုၚ် ကောန်ထံၚ်ပရေၚ်ဍုၚ်ကွာန် ဒးဒၟံၚ်ထံၚ် နကဵုၝောံပိုဒ်ပရေၚ်ဍုၚ်ကွာန်နာနာဂှ် နူကၠာတေံကီု၊ သ္ပမာန်ကီု၊ ဂၠါဲဟိုတ်တုဲ ကၟာတ်ကၠုၚ်ပ္ဍဲတိုက်တံ ဒှ်တမ် ကၠောန်ကၠုၚ်ရ။
သ္အာၚ်နူဂှ်ပၠန် ကောန်ထံၚ်ပရေၚ်ဍုၚ်ကွာန်မ္ဂး ဒးဒုၚ်ကၟာတ်လဒဵုအခေါၚ်အရာ ဂၠိုၚ်နူကဵုကောန်ထံၚ် ဒးမံၚ်ထံၚ်နကဵုဒုဟ်ဒဏ်တၞဟ်ဟ်တံဂှ်တုဲ၊ သီုကဵုဒးဒုၚ်ဖအောန်ဖျေံလဝ် အခေါၚ်ပၠောပ်စၞစ ကေုာံ ဂဥုဲဇဗတံဂှ်တုဲ ကၠောန်သ္ပကၠုၚ်ဒၟံၚ် ပရေၚ်ဍဵုဍိုက်နာနာသာ်ရ။
ညးမစုက်လုက်ကဵု ဂြောဝ်ဂတာကောန်ထံၚ်ပရေၚ်ဍုၚ်ကွာန် မွဲတၠဂှ်တှ်ေ ဗွဲကြဴဏံ ဍဵုဍိုက်ကၠုၚ်ကောန်ထံၚ်ပရေၚ်ဍုၚ်ကွာန်တအ် ဂၠိုၚ်ကၠုၚ်ဂှ်ဝွံ ဒှ်ဒၟါနူဇၞော်ထံၚ် မပြံၚ်ကၠုၚ်နူကဵုလ္ပာ်ဒပ်ပၞာန်တံတုဲ ဍဵုဍိုက်ဒၟံၚ် ကောန်ထံၚ်ပရေၚ်ဍုၚ်ကွာန် နကဵုနဲကဲနာနာသာ်ရောၚ် ဟီုလဝ်ရ။
“ဇၞော်ထံၚ်လၟုဟ် ဆာန်အေဂျဝ်ဂှ်တှ်ေ ဒှ်နူဒပ်ပၞာန်တုဲ ပတိတ်ကၠုၚ်စေဝ်ပၞောန် ၁၈ သာ် ယဝ်ကၠောန်ဒးဗၠေတ်မ္ဂး စဲတ္ၚဲတုဲ ကဵုဗလိုက်လဝ်မတ် ကဵုဗဵုတ္ၚဲ။ ယဝ်ဗၜေက်မတ် ခရေပ်ဒးမတ်တှ်ေ ၜုၚ်တက်တုဲ အခိၚ်ဗ္တံ ခိၚ်တိက်တှ်ေ ကၠုၚ်စၟဳတ်တုဲ တုဲပၠန် ကၠောန်ဗၠေတ်ဒးအာညိဗက် ကၟာတ်စုတ်ပ္ဍဲထံၚ်တိုက်၊ ပတေၚ်ဂြတ်လဝ်တံဏံလေဝ် ပါရ။ ပရေၚ်ဍဵုဍိုက်ပျဲပျာံ ပါသီုဇိုၚ်တဲတံဂှ်တှ်ေ သာဂၠိုၚ်ကၠုၚ်ရ” သာ်ဝွံ ဟီုရ။
သ္အာၚ်နူဂှ်ပၠန် ကၠာတေံမ္ဂး ကဵုလဝ်အခေါၚ်ပလံၚ်ဇွောံမ ကုကောန်ထံၚ်ပရေၚ်ဍုၚ်ကွာန်တအ် မွဲသတ္တာဟ မွဲဝါတုဲ လၟုဟ်ဂှ်တှ်ေ ၜါသတ္တာဟ မွဲဝါ ကၞာတ်လဒဵုကၠုၚ်တုဲ မၞိဟ်ယဲနွံတံဂှ်လေဝ် ဟွံကဵုအခေါၚ်ပၠောပ်နၚ်ဂဥုဲဇဗတံဂှ် ကၠောန်ကၠုၚ်ဒၟံၚ်ဟွံသ္ကုတ်ရောၚ် ညးဆက်ဟီုရ။
ပ္ဍဲအရာပလံၚ်ကပေါတ် ကောန်ထံၚ်ပရေၚ်ဍုၚ်ကွာန်တအ်ဂှ်လေဝ် ဗီုကၠာတေံ သ္ကအ်ရဲ၊ မိဿဟာဲတအ် ပလံၚ်ဟွံဂွံရတုဲ ညးမဒှ်ကောန်မွဲသ္ၚိတအ်ရဟေၚ် ပလံၚ်ဂွံတုဲ ကောန်မွဲသ္ၚိဍာံ၊ ဟွံဍာံဂှ် စၟဳတ်ကၠုၚ်ဒၟံၚ် တၞးကာဒ်ကောန်ဍုၚ်၊ သီုကဵုစရၚ်သ္ၚိကၟိန် ဗွဲမတေၚ်ဂြတ်ရ။
ပ္ဍဲထံၚ်ကျာ်မြဟ် တွဵုရးဍုၚ်မန်ဂှ် ကောန်ထံၚ်ပရေၚ်ဍုၚ်ကွာန် ဒးမံၚ်ထံၚ် နကဵုၝောံပိုဒ်ပရေၚ်ဍုၚ်ကွာန်နာနာ နူတွဵုရးမန်၊ တွဵုရးကရေၚ်၊ ရးဒေသလ္ဂုၚ်၊ မာန္တလေဝ်၊ ဗဂေါ တအ်ကီု သီုကဵုဒေသတၞဟ်ဟ်တံဂှ် အပံၚ်ဖအိုတ် ဟွံအောန်နူကဵု ၃၀၀ နွံရောၚ် ဂွံတီကေတ် အတိုၚ်ဂလာန် ညးမစုက်လုက်ကဵုထံၚ်စာတ်တံရ။
ပရိုၚ်−သြၚ်လောန်တိုၚ်(မ်)
ဗီုရုပ်−AAPP