နေဗျဳဒဝ်၊ ဂျူလာၚ် ၅
ယဝ်ပံက်အာ တန်ဗ္တောန်ကွတ်ပၞာန်တအ်ဏံ ဗွဲလၟေၚ်ၚ်မာန်မ္ဂး သွက်ပရေၚ်စဵုဒၞါကၟိန်ဍုၚ်၊ သွက်ပရေၚ်ဂီုကၠီု ကေုာံ အစောံစရာဲဂွံစဵုဒၞါ မဆက်စပ်ကဵုကၟိန်ဍုၚ်တအ်ဂှ် သာတုဲခိုဟ်သန်ကၠုၚ်ဏောၚ် သ္ကိုပ်ဗိုလ်ဇၞော် ဂျဝ်ဇြဲလေန် ဟီုရ။
ပ္ဍဲကောံဓရီုပရေၚ်ပကောံကောန်ပၞာန်ဗဟဵု မကၠောန်ဗဒှ်လဝ် ပ္ဍဲနေဗျဳဒဝ် ပ္ဍဲဂိတုဂျူလာၚ် ၃ ဂှ် သ္ကိုပ်ဗိုလ်ဇၞော် ဂျဝ်ဇြဲလေန် မဒှ်သ္ကိုပ်စၞောန် ဒပ်ဍာ်၊ ဍာ်တိုက်၊ ဒပ်ကျာ သီုကဵုဒှ်ဒုဥက္ကဌ ဂကောံပကောံကောန်ပၞာန်ဗဟဵုဂှ် ဟီုဏာလဝ်ရ။
ပ္ဍဲအရာကော်ကၠုၚ် ညးမတိုန်တန်ဗ္တောန်ကွတ်ပၞာန်တအ်ဂှ် ဂကောံပကောံကောန်ပၞာန်တအ် ကော်စိုပ်တုဲ ညးမလုပ်စိုပ်ကၠုၚ်တအ်ဂှ် ဌာန်ဂအုပ်ပၞာန်ရးမဆေၚ်စပ်ဂမၠိုၚ်လေဝ် စၟဳတ်ချိုတ်တ်ပၠိုတ်တ်တုဲ သွက်ဂွံဒုၚ်အာတဲဂှ်ကီု၊ သ္ကိုပ်ဝန်ဇၞော် တွဵုရး ကေုာံ ရးဒေသဂမၠိုၚ်လေဝ် စပ်ကဵုပရေၚ်ပကောံကောန်ပၞာန်တၟိဏံတုဲ သွက်ဂွံစၟဳတ်ကောပ်ကာဲကဵုဂှ် ဟီုလဝ်ရ။
ပ္ဍဲကဵုဝှဝ်ရာမ်ပရေၚ်ၜိုဟ်လလမ် ကၠောန်ဗဒှ်လဝ် ပ္ဍဲဂိတုဂျောန်ကြပ်အိုတ်ဏံဂှ် ညးမတိုန်စိုပ်ဂမၠိုၚ် ကဵုလဝ်ကသပ် သွက်ဂွံဒေါအ်ဇူအာပရေၚ်ကံက်စရၚ်သ္ဂောံလုပ်ပၞာန် ပ္ဍဲအခိၚ်ကာလဒစးဒုၚ်ပေါဲရုဲမာဲကဵု အခိၚ်ကာလပေါဲရုဲမာဲတံဂှ် ပွိုၚ်တြဴဂိတုကဵုဒှ် မွဲသၞာံကဵုဒှ်ရ။
အခိၚ်ပေါဲရုဲမာဲတုဲ ယဝ်ရကလေၚ်ပံက်အာ တန်ဗ္တောန်ကွတ်ပၞာန်တအ်ဏံ ဗွဲလၟေၚ်ၚ်မာန်မ္ဂး ၜိုတ်နွံပၟိက်ဂှ် ဗပေၚ်ကၠုၚ်ဇြဟတ် သွက်ကံၚ်ဇြဳပၞာန်မာန်ရ။
ပြဟ်ဟ်ဏံ ပေါဲရုဲမာဲကၠောန်အာ ပ္ဍဲပေါဲရုဲမာဲဏံကဵု အကာဲအရာပရေၚ်ပၞာန် အလုံဍုၚ်မွဲ လၟုဟ်ဂှ်ဝွံ သာ်လဵုဆက်ဒှ်ကၠု်ၚမာန်ရောဟီုဂှ် ဟီုချိုတ်တ်ပၠိုတ်တ် ဟွံဂွံဏီရ။
ဒံက်တာသဳရိမန်ဆာန် သ္ကိုပ်ဒပ် ဒပ်စဵုဒၞါဍုၚ်မန် MSDF ဂှ် ပေါဲရုဲမာဲတုဲ ယဝ်ကော်ကၠုၚ်ကောန်ပၞာန်တၟိ ဗွဲလၟေၚ်ၚ်မာန်မ္ဂးလေဝ် ကံၚ်ဇြဳပၞာန် ဂွံဂွံဇၞး ပ္ဍဲပရေၚ်ပၞာန်ဂှ် ဒှ်ဟွံမာန်ပုဟ်ဂှ် သ္ၚဳဂၠိပ်လဝ်ရ။
“ယဝ်ရ ကၠောန်ပေါဲရုဲမာဲတုဲ အခိၚ်ပေါဲရုဲမာဲလောန်တေံမ္ဂး ကော်ကၠုၚ်ကောန်ပၞာန်တၟိအဆက်က်တုဲ ဗပေၚ်ကၠုၚ်ဇြဟတ်မာန်ကီုလေဝ် ဂွံဂွံဇၞးပ္ဍဲပေါဲဗ္တိုက်ဂှ် ဒှ်ဟွံမာန်ပုဟ်ဂှ် ဟီုဂွံရ။ လၟုဟ် စဵုကဵုလၟေၚ် ၁၄ ဏံ လၟိဟ်မ္ဂး ၜိုတ် ၇ ဠက်နွံတုဲ ဆန္ဒဇကုဟွံပါမွဲသာ် ဒးဒုၚ်ပကောံပလဝ်ကောန်ပၞာန် အတိုၚ်သၞောဝ်ယိုက်လျိုၚ်ပၞာန်ဂှ်ရ လ္ပာ်အစောံစရာဲပရေၚ်ဗ္တိုက်တံဂှ် ဂွံတောတက်ကၠုၚ်ဟွံမွဲရ” သာ်ဝွံ သ္ဂးရ။
သ္ကိုပ်ဗိုလ်ဇၞော် မောၚ်မောၚ်အေး ဝန်ဇၞော်ကာစဵုဒၞါ ဥက္ကဌဂကောံပကောံကောန်ပၞာန်တၟိဂှ်လေဝ် နကဵုညးလုပ်ပၞာန်ဂွံဂမၠိုၚ် သွက်ဂွံယိုက်အာတာလျိုၚ် ပ္ဍဲကာလအပိုၚ်အခြာဇကုမဒးလျိုၚ် ဗွဲမလိတ်ကလောတ်မာန် ဖန်ဇန်ဒၟံၚ်ရောၚ် ဟီုလဝ်ရ။
စဵုကဵုတ္ၚဲဏံဂှ် တန်ဗ္တောန်ကွတ်ပၞာန် လၟေၚ် ၁၁ တုဲဒှ်အာလဝ်တုဲ ယိုက်ဒၟံၚ်တာလျိုၚ် ပရေၚ်စဵုဒၞါကၟိန်ဍုၚ်ကဵု တာလျိုၚ်ဂီုကၠီုတံဂှ်ရောၚ် ဟီုဏာလဝ် ပ္ဍဲကောံဓရီုဝွံရ။
နကဵုဂကောံဗဟဵု စရၚ်ဒဒၚ်ဂွံဍာံပြ၊ ဍာ်ဇမၠိၚ်မ္ဂး ဂွံစုတ်စရၚ်သ္ပစၟတ်သမ္တီ ဗွဲမလောဲသွာမာန် ရန်သာ်ဏံတုဲ ထ္မံက်ဒၟံၚ်ရုပ်ရဴ သၞောတ်ကောပ်ကာဲတၚ်နၚ်ပူဂဵုညးမယိုက်လျိုၚ်ပၞာန် (National Service Information Management System-NSIMS) ရောၚ် ဟီုလဝ်ရ။
ဣဏံဂှ် ဂကောံစၟတ်သမ္တီ တၚ်နၚ် ကေုာံ နဲပညာ IT စပ်ကဵုပရေၚ်ယိုက်လျိုၚ်ပၞာန်ဂှ် ကၠောန်ဒၟံၚ်ရောၚ် သ္ဂးရ။
ပွမကၠောန်ကၠုၚ်သာ်ဏံဂှ်ဝွံ သွက်ဂွံဂၠါဲကေတ် တၚ်နၚ်ပူဂဵု ညးမယိုက်လျိုၚ်ပၞာန်ဂွံတအ် ဗွဲမလောဲသွာမာန် မဒှ်ရ။
သ္အာၚ်နူဂှ်ပၠန် စပ်ကဵုပရေၚ်ကဵုအခေါၚ်ဗၠးၜး၊ ပရေၚ်မဖအောန်ဖျေံကဵု၊ ပရေၚ်ကဵုအခေါၚ်ဆုဲပြံၚ် နူကဵုဂကောံပကောံကောန်ပၞာန် ရးဒေသဇၞော် ကေုာံ တွဵုရး ပါလုပ်သီုကဵု ကံၚ်ဇြဳနေဗျဳဒဝ်တံ မပ္တိုန်ထ္ၜးကၠုၚ်ဂှ်တုဲ နူကဵုဂကောံဗဟဵု စၟဳတ် ကဵုဒၟံၚ်အခေါၚ်ရောၚ် ဝန်ဇၞော်ကာစဵုဒၞါ ဟီုရ။
နကဵုဂကောံကော်ကောန်ပၞာန်တၟိ မဆက်စပ်ဂမၠိုၚ် ချူစၟတ်သမ္တီ ချိုတ်တ်ပၠိုတ်တ်တုဲ အခိၚ်ဒးကလေၚ်ကော် ညးမဂွံလဝ်အခေါၚ်ဆုဲပြံၚ်တံဂှ် သွက်ဂွံကလေၚ်ကော်ဂွံ တၟံကၠံပေၚ်ၚ်ဂှ် ဒးရေၚ်တၠုၚ်ကောပ်ကာဲကဵု ဗွဲမစှ်ေကဵုသၞောတ်ရောၚ် သ္ဂးရ။
ဥူဗညာ ဒါရိုက်တာ ဂကောံအခေါၚ်အရာမၞိဟ်ကရေၚ်ဍာဲဂှ်တှ်ေ ကံၚ်ဇြဳပၞာန်ဝွံ ဒးဆောံလေၚ်ဒၟံၚ်တိဍာ် ပ္ဍဲဒေသဗွဲမဂၠိုၚ်တုဲ ဂွံကလေၚ်ဗပေၚ်ဇြဟတ်ကောန်ပၞာန်ဂှ် ကော်ဒၟံၚ်တန်ဗ္တောန်ကွတ်ပၞာန်တံဂှ်ရောၚ် ဟီုရ။
“အခိၚ်လၟုဟ်ဂှ်တှ်ေ ကံၚ်ဇြဳပၞာန် ဒးဆောံလေၚ်ဒၟံၚ်တိဍာ် ဒၞါဲဗွဲမဂၠိုၚ်ရ။ တုဲပၠန် သွက်ဂွံကလေၚ်ကေတ် တိဍာ်မဒးဆောံလေၚ်လဝ်တံဂှ်တုဲ ထ္ပက်ဒၟံၚ်ပၞာန်ဂှ်နွံ။ တုဲပၠန် ပရေၚ်ချိုတ်ဂျိုၚ်ဂှ်လေဝ် ဂၠိုၚ်ကွေံကွေံ၊ ကောန်ပၞာန်ဂြိပ်တံဂှ်လေဝ် ဂၠိုၚ်။ ဟိုတ်ဂှ်ရ ဒးကလေၚ်ဗပေၚ်ဇြဟတ်ပၞာန်ရ” သာ်ဝွံ သ္ဂးရ။
မွဲလ္ပာ်ဂှ်ပၠန် သွက်ဂွံစဵုဒၞါ ဍုၚ်ဇၞော် ညံၚ်ရဴဍုၚ်လ္ဂုၚ်၊ ဍုၚ်မာန္တလေဝ်တံဂှ်ကီု သွက်ပေါဲရုဲမာဲ နွံပၟိက်ဒၟံၚ်ကဵုဇြဟတ်ဂီုကၠီုတုဲ နကဵုဗီုပြၚ်နာနာသာ် ပကောံကၠုၚ်မာန်ရောၚ် ဥူဗညာ ထံက်ထ္ၜးလဝ်ရ။
ဝန်ဇၞော်ကာစဵုဒၞါဂှ်တှ်ေ ဒဵုကဵုအခိၚ်လၟုဟ် ပကတ်ပကေၚ်ကဵုဒၟံၚ် တန်ဗ္တောန်ကွတ်ပၞာန် ပိလၟေၚ်တုဲ ပ္ဍဲအရာကော်ပကောံကောန်ပၞာန်တအ်ဂှ် ညးဟွံဒ္ဂေတ်ဗက် တၚ်နၚ်မစၞောန်ပျးလဝ်တံဂှ် ကေတ်ဒၟံၚ်အရေဝ် ရေၚ်တၠုၚ်ဒၟံၚ်ရောၚ် ကဵုလဝ်သမ္တီရ။
လအာတုပ်သာ်ဂှ်ကီု ပွမလီဠာန်တုဲ အာတ်အခေါၚ်ကီု၊ ပပရေံတုဲ တြးလဝ်ဝါဒ အရာမဇီုကပိုက်ကဵု လၟေၚ်ကမၠောန်ပကောံညးယိုက်လျိုၚ်ပၞာန်တံဂှ်လေဝ် ထ္မံက်ပတိတ်ကေတ်ဒၟံၚ်အရေဝ်တုဲ ပရေၚ်လီဠာန်သြန် ညံၚ်ဟွံဂွံမွဲ၊ ပရေၚ်ဗက်စအဂတိ ညံၚ်ဟွံဂွံက္တဵုဒှ်၊ သွက်ဂွံရေၚ်တၠုၚ် အတိုၚ်လၟေၚ်ကမၠောန်တအ်ဂှ် ညးတာလျိုၚ်အဆံၚ်ၚ် ဒးစၟဳတ်ကောပ်ကာဲကဵုရောၚ် ဟီုလဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−MOI