ကျာ်ထဝ်၊ ဂျူလာၚ် ၆
ပ္ဍဲတမ်ဒပ်ဖျေံသ္ဇိုၚ် ပွိုၚ်ဍုၚ်ကျာ်ထဝ် သ္ကုတ်သၟဝ်ကျာတွဵုရးဍုၚ်မန် ဒၞါဲဂကောံဇြဟတ်ပၠန်ဂတးတအ် ချဳဒရာၚ်ဒၟံၚ်ဂှ် ကံၚ်ဇြဳပၞာန် သၠုၚ်ပတိုန်အသိၚ် ပလေဝ်ပလေတ်ကၠုၚ်ဒၟံၚ်အပ္ဍဲဒပ်တအ်ရောၚ် ညးမစုက်လုက်ကဵုဒပ်ကံၚ်ဇြဳပၞာန်တအ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
စနူဂိတုဂျောန်တုဲကၠုၚ်တေံတုဲ ပ္ဍဲတမ်ဒပ်ကံၚ်ဇြဳပၞာန်တအ်ဂှ် သၠုၚ်ပ္တိုန်ကဆံၚ်ဗာန်ကာ ဂဒုက်စဵုဒၞါတအ်ကီု၊ ဒၞါဲမဖျေံစွံလဝ်လွဟ်ဇၞော်တအ်ဂှ် ညံၚ်ထံၚ်ပရိုၚ်နူကဵုပၞာန်ကျာဟွံဂွံဂှ် ပလီုလဝ်ရုပ်ရဴကီု ကေုာံ ဖျေံကဵုဒၟံၚ်ကွတ်ပၞာန်တအ်ဂှ် ကၠောန်ကၠုၚ်ဒၟံၚ် ဟွံပိုတ်သ္ကုတ်ရ။
သ္အာၚ်နူဂှ်ပၠန် ပ္ဍဲဌာန်ဂအုပ်ကံၚ်ဇြဳပၞာန် ၝောံဒပ် ၄၄ ဖျေံသ္ဇိုၚ်ကျာ်ထဝ်ဂှ်လေဝ် စနူဂိတုဂျူလာၚ်မံက်ဏံတုဲ ဖျေံကဵုဒၟံၚ်တန်ဗ္တောန်ကွတ်ပၞာန် ကုလၟိဟ်မၞိဟ် ၜိုတ် ၁၀၀၀ မပကောံလဝ်နူအလုံဍုၚ်မွဲ နနဲအဓမ္မတံဂှ်ရ။
အတိုၚ်ဂလာန် ညးမစုက်လုက်ကဵုဒပ်ကံၚ်ဇြဳပၞာန်တအ်ဂှ်မ္ဂး ဒပ်ကံၚ်ဇြဳပၞာန် ပလေဝ်ကၠုၚ်ဒၟံၚ်အပ္ဍဲဒပ်ဂှ်ဝွံ ၜိုတ်ဗာန်ကာ၊ ဥမၚ် ဗီုကၠာတေံဟွံသေၚ်ရတုဲ ကဆံၚ်သၠုၚ်ကၠုၚ်ဂှ် ဂွံဆဵုကေတ်ရောၚ် သ္ဂးရ။
မွဲလ္ပာ်ဂှ်ပၠန် ကံၚ်ဇြဳပၞာန်ဝွံ မွဲဒမြိပ်ဂၠံၚ်ကွဳစက် မတ်မလီု−လ္ဂုၚ် ကဵု ဒဒန်သက်တိုၚ်(စစ်တောၚ်း) ဂၠံၚ်လုပ်တွဵုရးမန်ဂှ် ဖျေံဂလိုၚ်လဝ်ဇြဟတ်ဒပ်တုဲ မၚ်တောပ်ဗ္တိုက်ကၠုၚ်ဒၟံၚ်ကၚ် ဟွံပိုတ်သ္ကုတ်ရ။
လ္ပာ်ကံၚ်ဇြဳပၞာန် ပလေဝ်ကၠုၚ်ပၞာန်ဒုၚ် ချိုတ်ချိုတ်ပၠိုတ်တ်သာ်ဏံတုဲ သၠဲပတိုန်ကၠုၚ်ဇြဟတ်ဒပ်တအ်ဂှ်ဝွံ ဒစးဒုၚ်ပလေဝ်ပလေတ်ဒၟံၚ် သွက်ပေါဲရုဲမာဲကၠုၚ်စိုပ်ဏံလေဝ် ဒှ်မာန်ရောၚ် သ္ၚဳဂၠိပ်ဒၟံၚ်တအ် နွံဒၟံၚ်ရ။
ပ္ဍဲပွိုၚ်ဍုၚ်ကျာ်ထဝ်ဂှ် တမ်ဒပ်ကံၚ်ဇြဳပၞာန်ဂမၠိုၚ် ပါလုပ်သီုကဵု ဌာန်ဂအုပ်ၝောံဒပ် ခမရ စၟတ် ၄၄ ဂှ်မ္ဂး နွံဟွံအောန်နူကဵု ၁၀ တမ်ဒပ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ