ဗေကျေန်၊ ဂျူလာၚ် ၆
ရုယှာ မဗ္တိုက်ဒၟံၚ်ယူကရုၚ်ဂှ် ယဝ်ကျအာပၞာန်မ္ဂး အမေရိကာန် စွံကၠုၚ်အာရီု လ္တူဗေကျေန်ဏောၚ်ဂှ်ရ စပ်ကဵုပရေၚ်ရုယှာ ဂွံကျပၞာန်ဂှ်တုဲ ဒုၚ်တဲဟွံမာန်ရောၚ် ဝန်ဇၞော်ကာဍုၚ်သ္အာၚ်ကြုက် ဝါန်ယိ ဟီုလဝ်ကဵု အမာတ်ကလုတ် သမဂ္ဂယူရောပ်ရ။
ကြုက် ဟီုကၠုၚ်လဝ် ဗွဲမပြာကတ် ဒဒှ်မဟွံလုပ်အကြာ ပထုဲပလာပ် အပ္ဍဲပဋိပက္ခတံဂှ်ကီုလေဝ် ဂလာန်ညးမဟီုကၠုၚ်သာ်ဏံဂှ်ဝွံ ဒစဵုဒစးဒၟံၚ်ကဵုအရေဝ်ညးတအ် မဟီုကၠုၚ်လဝ်ကၠာတေံဂှ်ရ။
ဝန်ဇၞော် ဝါန်ယိ ဟီုကၠုၚ်လဝ်သာ်ဏံ အခိၚ်ဆဵုဂဗလဝ်ကဵု ဇၞော်သ္ကိုပ် ကေၚ်ကာဍုၚ်သ္အာၚ်အဳယူ ကာဂျာ ကဝ်လက် ပွိုၚ်ပန်နာဍဳ ပ္ဍဲဍုၚ်ဗရာတ်သေဲ ပ္ဍဲဂိတုဂျူလာၚ် ၂ ဂှ် သၞာဲဒဴဂွံတိုန်စိုပ်လဝ် ပေါဲဆဵုဂဗဏံမွဲတၠ ဟီုရ။
အပ္ဍဲပရေၚ်ညးတံၜါတၠ ဆဵုဂဗလဝ်ဂှ် သဳကၠဳလဝ် ပရေၚ်ဂီုကၠီုသာ်ပါ၊ ပရေၚ်ဖကောဝ် ( မြေရှားသတ္တု) ၊ ပရေၚ်သွံရာန်ဗၞိက် ဟွံစှ်ေကဵုဗဗွဲဓဝ်၊ ကေုာံ ပရေၚ်ထိုၚ်ဝါန် သီုကဵုအကာဲအရာဒေသသ္ကုတ်လဒေါဝ်ဗၟံက်တေံဂှ်ရောၚ် ဂွံတီကေတ်ရ။
ဟိုတ်နူအမေရိကာန် ဒးစွံဒၟံၚ်အာရီု လ္တူပေါဲပၞာန် ယူကရုၚ်−ရုယှာဂှ်တုဲ နကဵုအမေရိကာန် ညံၚ်ဟွံဂွံဂတးကၠုၚ်က္ဍိုပ် လ္ပာ်ကြုက်ဂှ် ညးတအ် ဆန္ဒမၞုံရောၚ် ဝန်ဇၞော်ဝါန်ယိ ဟီုရ။
ကြုက် ဟွံလုပ်အကြာပလာပ်ပထုဲဂှ် ဟီုလဝ် ဗွဲမပြာကတ်ကီုလေဝ် ပ္ဍဲယူကရုၚ်တေံ ဒဒှ်ရဒတုဲဖဵုညးတံ စပ်ကဵုပထဝဳပရေၚ်ဍုၚ်ကွာန် နွံဒၟံၚ်ဂှ် ပရေၚ်ပရူလၟုဟ်ဏံ ထ္မံက်ထ္ၜးဒၟံၚ်ရ။
စပ်ကဵုယူကရုၚ်တုဲ နကဵုကြုက် ဒဒှ်ရဆန္ဒမၞုံ သွက်ဂွံကေတ်တၚ်တုပ်စိုတ် ပရေၚ်ၜိုဟ်လလမ် သဳကၠဳပ္ညဳပ္ညပ် ဒေါအ်ပန်ပှော်ဂှ် ညးဗြဴမၞုံအခေါၚ်ဟီုဂး ဌာနဝန်ဇၞော်ကာဍုၚ်သ္အာၚ် မၞုံယၟု မာအိုဝ်နေန်ဂှ် ဟီုလဝ် ပ္ဍဲပေါဲသောၚ်ကလးလိက်ပရိုၚ် ပ္ဍဲဂိတုဂျူလာၚ် ၄ တေံရ။
ကြဴနူသမ္မတကြုက် ယှဳကျေန်ဖျေန် လလောၚ်တြးကၠုၚ် ဒဒှ်ရပရေၚ်ဆက်ဆောံဟၟဲကဵုတွဵုဒၞက် ကုရုယှာတုဲဂှ် အကြာၜါဍုၚ်ဏံ ပရေၚ်ဆက်ဆောံ ပရေၚ်ပိုန်ဒြပ် ကေုာံ ပရေၚ်ဍုၚ်ကွာန်တအ် ဇြဟတ်ခိုဟ်ကၠုၚ်ရ။
Ref: CNN