ဘာအၚ်၊ ဂျူလာၚ် ၆
နဲကဲဂကောံပၞာန်တအ် ရပ်လဝ်အဝဵု အုပ်ဓုပ်ဒၟံၚ် ဗွဲအဓမ္မဂှ်ဝွံ ရေၚ်တၠုၚ်ကဵုပရေၚ်ၜိုဟ်လလမ်ကၟိန်ဍုၚ်မာန်ဟွံသေၚ်၊ ဖောအ်ဗြေဝ်တောတက်ကၠုၚ်လေဝ်ဟွံသေၚ်တုဲ သွက်သၞောတ်တၠအဝဵုပၞာန် ဂွံသရိုဟ်ဂှ် ဒးရပ်စပ်နဲကဲနာနာသာ်တုဲ ဒးဒစဵုဒစးဏောၚ် ပဒိုဝ်သဝ်ဂွါထူဝေန် ဥက္ကဌ KNU ဟီုရ။
ပ္ဍဲကဵုလိက်သဝဏ် ပလံၚ်ဗစိုပ်လဝ် တ္ၚဲဒပ်ပၞာန်ကောန်ဂကူကရေၚ် မရနုက်ကဵု ၇၆ ဝါ ပ္ဍဲဂိတုဂျောန် ၅ ဂှ် ဥက္ကဌ ဗော်သွးကောန်ဂကူကရေၚ် KNU ပဒိုဝ်သဝ်ဂွါထူဝေန် ဟီုကၠုၚ်သာ်ဏံရ။
ဒပ်ပၞာန်သီအဝဵုဝွံ ညံၚ်အဝဵုညးတအ်ဂွံတန်ကြန် ကေုာံ သွက်ဂွံထံက်ဂလာန် ကုဒတုဲဖဵုညးတအ်ဂှ် ရပ်စပ်စကာကၠုၚ်ဒၟံၚ်ပရေၚ်ဂကူ ကေုာံ ပရေၚ်ဘာသာတံဂှ်တုဲ ညံၚ်အဝဵုပရေၚ်ဍုၚ်ကွာန်ဂွံတန်ကြန်ဂှ် ကေမ်ၛာပ်ကေတ်လဝ် သၞောဝ်သ္ဇိုၚ်ကၟိန်ဍုၚ် ၂၀၀၈ ဗိုန်န်တုဲ နကဵုဒပ်ပၞာန်ဗၟာ စဵုဒၞါဒၟံၚ် အဝဵု ကေုာံ ဒတုဲဖဵုညးတအ် အဆံၚ်ၚ်ရောၚ် ပဒိုဝ်သဝ်ဂွါထူဝေန် သ္ဂးရ။
ဂကောံပၞာန်ဝွံ ညံၚ်အဝဵုညးတအ်ဂွံတန်ကြန်၊ ညံၚ်ဍုၚ်သ္အာၚ် ဂွံသ္ပစၟတ်သမ္တီဂှ် ပ္တိတ်ဒၟံၚ်ဇြဟတ်တုဲ လးဖျေံဒၟံၚ်နဲဗျူဟာပရေၚ်ပၞာန် ကေုာံ ရပ်စပ်ဒၟံၚ်ကပေါတ်လွဟ်လက်နက် တိတ်လက္ကရဴအိုတ်တံဂှ်တုဲ ဂၠံၚ်ဍာန်ပရေၚ်ဍုၚ်ကွာန် ကေုာံ ပရေၚ်ကလုတ်တမာန်တံဂှ်လေဝ် ထ္မံက်ဒၟံၚ်ရုပ်ရဴတုဲ အခိၚ်လၟုဟ် ဂွံကၠောန်ပေါဲရုဲမာဲ အတိုၚ်သၞောဝ် ၂၀၀၈ မာန်ဂှ် ပ္တိတ်ကၠုၚ်မံၚ်ဇြဟတ် နကဵုနဲကဲနာနာသာ်ရောၚ် သ္ဂးရ။
တၞဟ်နသ္ဂောံကလေၚ်ဒက်ပ္တန် ပရေၚ်ဍုၚ်ကွာန်မၞုံကဵုဗဗွဲဓဝ်၊ ပရေၚ်ၜိုဟ်လလမ်ကၟိန်ဍုၚ် ကေုာံ ပရေၚ်ဖောအ်ဗြေဝ်တောတက်မာန် ဂကောံပၠန်ဂတးကောန်ဂကူ မဒစဵုဒစးပၠန်ဂတးဒၟံၚ် တၠအဝဵုပၞာန်ကဵု တၠအဝဵုအိုဿီု၊ ဂကောံပရေၚ်ဍုၚ်ကွာန် ကေုာံ ဂကောံမှာဇန်သီုဖအိုတ် ပံၚ်တောဲတုဲ ဒးဗတိုက်သရိုဟ်အာ သၞောတ်တၠအဝဵုပၞာန်ဏောၚ်ဂှ် ပဒိုဝ်သဝ်ဂွါထူဝေန် ဖတိုက်ဖ္အောဝ်လဝ်ရ။
ကောန်ဂကူကရေၚ်တအ်ကီု အလုံညးဍုၚ်ကွာန်မွဲ လုပ်မံၚ်ပေါဲဗ္တိုက် သွက်သၞောတ်တၠအဝဵုပၞာန် ဂွံသရိုဟ်စှ်ေဂှ်ဝွံ ချူဒၟံၚ်ဝၚ်ဂကူ၊ ချူဒၟံၚ်ဝၚ်ကၟိန်ဍုၚ်ဏောၚ်တုဲ ဒှ်ပွကဵုအာဲတၟာဲ ပရေၚ်ဗၠးၜး၊ ပရေၚ်ၜိုဟ်လလမ် ကေုာံ ပရေၚ်ဖောအ်ဗြေဝ်တောတက် သွက်သၟတ်တၞောဝ်ဒတောဝ်အနာဂတ်တံရောၚ် ဟီုရ။
ကုဂကောံပၠန်ဂတးဒၟံၚ် သၞောတ်တၠအဝဵုပၞာန် ကေုာံ သၞောတ်တၠအဝဵုအိုဿီုတံဂှ်လေဝ် ဒးပံၚ်တောဲအာပရေၚ်ပၞာန်ဏောၚ်ဂှ် ပဒိုဝ်သဝ်ဂွါထူဝေန် ဥက္ကဌ KNU ကဵုလဝ်သမ္တီရ။
ပရိုၚ်−သြၚ်လောန်တိုၚ်(မ်)
ဗီုရုပ်−KNU