မတ်မလီု၊ ဂျူလာၚ် ၆
ပ္ဍဲတွဵုရးဍုၚ်မန် ယဝ်ရရပ်ဂွံကွဳစက်၊ ကွဳလိုန်ဓာတ် ကေုာံ ကွဳသၠာပိ ဟၟဲကဵုလာၚ်ဇြေန်တံဂှ်မ္ဂး ဒးကဵုဒၟံၚ်သြန် ကုဒပ်ဗၠာဲသၟိၚ်ကံၚ်ဇြဳပၞာန်၊ ကုဌာနမဆေၚ်စပ် မပါလုပ်ဒၟံၚ် ပ္ဍဲဂကောံရပ်စပ်တံဏံ ဂၠိုၚ်ကဵုဆတုဲမှ ကဵုဒုၚ်ဒၟံၚ်လျိုၚ် မၞိဟ်ရောၚ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဟိုတ်နူတၚ်စၞောန်က္ဍိုပ်သ္ကိုပ်ပၞာန်တုဲ စနူဂိတုမေ သတ္တာဟလက္ကရဴအိုတ်ဂှ်တုဲ အပ္ဍဲဒေသဂှ် ရပ်ဒက်ကေတ်ကၠုၚ်ဒၟံၚ်အရေဝ် လ္တူယာန်ဟၟဲကဵုလာၚ်ဇြေန်တအ် နကဵုကိုန်စဳမာန် သၠဲသၠဲလးလးရ။
ကၠာတေံ ယဝ်ရပ်ဂွံယာန်လာၚ်ဇြေန်ဟွံမွဲဂှ်မ္ဂး သီဂိုၚ်ကေတ်ဒၟံၚ်ကွဳလာၚ်ဇြေန်ဟွံမွဲတံဂှ်တုဲ ကုမၞိဟ်မဍိုက်ကွဳလာၚ်ဇြေန်ဟွံမွဲတအ်ဂှ် ဟွံကဵုဒုၚ်လျိုၚ်မွဲသာ် ဖျေံကၠုၚ်အမိၚ် နကဵုသၞောဝ်ဗၞိက်ပၠောပ်၊ ဗၞိက်ပတိတ် အပ္ဍဲပွိုၚ်မွဲတ္ၚဲ ဗွဲမပြဟ်ရ။
အခိၚ်လၟုဟ် ကံၚ်ဇြဳပၞာန်ဝွံ ယဝ်ရပ်ဂွံကွဳလာၚ်ဇြေန်ဟွံမွဲတံဂှ်မ္ဂး သီကေတ်တုဲ ယဝ်ရမိက်ဂွံဒုၚ်လျိုၚ် ကုညးမဒဳကွဳတံဂှ်မ္ဂး ဒးကဵုသြန်ဏောၚ်ဂးတုဲ အာတ်မိက်ကၠုၚ်ဒၟံၚ်ရ။
ညးဒေသတွဵုရးဍုၚ်မန်မွဲတၠ မ္ဒးဂဗလဝ်အလဵုညးဂှ်တှ်ေ သွက်ဂွံဒုၚ်လျိုၚ်ဂှ် ဒးကဵုလဝ်ဒပ်ဗၠာဲသၟိၚ် လှုဲတြဴကိုဋ်တုဲ လ္ပာ်ရုၚ်သၞောဝ်ဓဝ်ဂှ်လေဝ် ဒးကဵုဒၟံၚ်ဏီဏောၚ် ဟီုကၠုၚ်ရ။
“ ကေတ်လဝ်လျိုၚ် သွက်မၞိဟ်တုဲ သွက်ကွဳလိုန်ဓာတ်ဂှ် ဟွံဂွံပုဟ်။ ချိၚ်လဝ်ကဵုတ္ၚဲ။ ဒးကဵုလဝ်တြဴကိုဋ်။ ညအ်ဂှ် လ္ပာ်ပ္ဍဲဗ္ဒိုပ်ဂှ်ဏောၚ် လ္ပာ်ရုၚ်သၞောဝ်ဓဝ် ဟွံသေၚ်ပုဟ်။ လ္ပာ်ရုၚ်သၞောဝ်ဓဝ်ဂှ်တှ်ေ ကၠုၚ်သာ်လဵုဟွံတီဏီ” သာ်ဝွံ သ္ဂးရ။
သ္အာၚ်နူဂှ်ပၠန် ကောန်ဒပ်ဗၠာဲသၟိၚ်ကံၚ်ဇြဳပၞာန်တအ်ဝွံ ယဝ်ရပ်ဂွံယာန်လာၚ်ဇြေန်ဟွံမွဲတံဂှ်မ္ဂး တန်တဴကဵုမၞိဟ်တုဲ မိက်ကၠုၚ်ဒၟံၚ်သြန် ကဵုစှော်ကိုဋ်တုဲ ယဝ်ဟွံဂွံလှုဲမ္ဂး လုကဴရုၚ်သၞောဝ်ဓဝ် ဟွံကော်ဂှ် ဒးမံၚ်အာ အပ္ဍဲအချုက်ဏောၚ်ဂးတုဲ ဘပဠဒၟံၚ်နွံရ။
ညးဒေသတွဵုရးမန်မွဲတၠပၠန်ဂှ်လေဝ် အလန်ကၠာဂှ်တှ်ေ ကံၚ်ဇြဳပၞာန် သီကၠုၚ်သီုယာန်လာၚ်ဇြေန်ဟွံမွဲ ဖျေံကၠုၚ်ထံၚ်သီုမၞိဟ်ဂှ်တုဲ အခိၚ်လၟုဟ် ပရေၚ်ရပ်ဒက် အောန်စှ်ေကၠုၚ်ညိညရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ အလန်ကၠာဂှ်တှ်ေ ရပ်ဒၟံၚ်ကွဳလိုန်ဓာတ် ကၠုၚ်နူရးတအ်ဂှ်။ တုဲတှ်ေ ရပ်ဒၟံၚ်ကွဳစက်နူရး မွဲဖ္ဍိုက် ၜါဖ္ဍိုက်။ ပါသီုမၞိဟ် ဒးထံၚ်မွဲဂိတု ဒးကဵုသီုဒဏ်သြန်။ တုဲကၠုၚ်ဟွံလအ်ဂှ်လေဝ် ရပ်ဒၟံၚ်ဟွံအောန်။ လၟုဟ်ဂှ် ပရေၚ်ရပ်ဒက်တံဏံ အောန်ကၠုၚ်ညိညရ” သာ်ဝွံ သ္ဂးရ။
ကံၚ်ဇြဳပၞာန်ဝွံ ကၠာတေံ ယဝ်ရပ်ဂွံယာန်လာၚ်ဇြေန်ဟွံမွဲတံဂှ်မ္ဂး မၞိဟ်ဂှ်တှ်ေ ဟွံကဵုဒုၚ်လျိုၚ်တုဲ အခိၚ်လၟုဟ် ကဵုဒုၚ်ကၠုၚ်လျိုၚ်ဟီုဂှ် ဒှ်သဘဴဖဍိုန်ဖျေံ နူကဵုပတေၚ်ဂြတ်လဝ်ဂှ်ကီုလေဝ် ဟိုတ်နူဒးကဵုလဝ်သြန် ဂၠိုၚ်ကဵုဆဂှ်တုဲ သွက်ညးဒေသ ဗက်ကဵုသြန်ဟွံမာန်တံဂှ်တှ်ေ ဒှ်တဴအခက်အခုဲရောၚ် ညးဆက်ဟီုရ။
အပ္ဍဲဒေသဂှ် ကံၚ်ဇြဳပၞာန် ရပ်ဒၟံၚ်ယာန်လာၚ်ဇြေန်ဟွံမွဲ သီုဗ္တံသီုတ္ၚဲ ပ္ဍဲကဵုဒၞါဲဂၠံၚ်လုပ်တိတ်ဍုၚ် ဒၞါဲကွဳအာကၠုၚ်ဂၠိုၚ်၊ ဒၞါဲဟွံထေၚ်လဝ်တံဂှ်တုဲ ဂွံပရိုၚ်ဂးတုဲ လုပ်စိုပ်ရပ်ဒက်ဒၟံၚ် စဵုကဵုအပ္ဍဲသ္ၚိရ။
ပြဟ်ဟ်ဏံ ညးဒေသဂမၠိုၚ်ဝွံ ဍိုက်ကၠုၚ်ကွဳလာၚ်ဇြေန်ဟွံမွဲတအ်ဂှ် အောန်ကၠုၚ်တုဲ ဒှ်ဒၟံၚ်ဗီုပြၚ် ပရေၚ်ရပ်ဒက် အောန်ဒၟံၚ်ကီုလေဝ် လ္ပာ်ကံၚ်ဇြဳပၞာန်ဂှ်တှ်ေ ရပ်ဒက်စၟဳတ်ဒၟံၚ်လၟေၚ်တ္ၚဲ နွံဒၟံၚ်ရောၚ် ညးဒေသဂမၠိုၚ် သ္ဂးအိုတ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ