လ္တူပရေၚ်ကံၚ်ဇြဳပၞာန် မကော်ဘိက်ကၠုၚ်ဂှ် စိုတ်ဟွံလုပ်စရောၚ် ဂကောံပၠန်ဂတးဂမၠိုၚ် ခၠေဝ်ပလန်ကၠုၚ်

နေဗျဳဒဝ်၊ ဂျူလာၚ် ၆

စပ်ကဵုပရေၚ်မကော်ဘိက်ကၠုၚ် PDF ကေုာံ ဂကောံရပ်လွဟ်ဂမၠိုၚ် သွက်ဂွံပံၚ်တောဲပါလုပ် ပ္ဍဲပေါဲရုဲမာဲဒဳမဝ်ကရေဇြဳဗော်ဇဳ ကံၚ်ဇြဳပၞာန် ကၠောန်ဗဒှ်အာ ပ္ဍဲဂိတုဒဳဇြေမ်ဗာဏံဂှ်တုဲ စိုတ်ဟွံလုပ်စရောၚ် ဂကောံပၠန်ဂတးဂမၠိုၚ် ခၠေဝ်ပလန်လဝ်ရ။

ပ္ဍဲကဵုလိက်ပရိုၚ်ကၟိန်ဍုၚ် မလလောၚ်ပ္တိတ်လဝ် ပ္ဍဲဂိတုဂျူလာၚ် ၅ တေံဂှ် နကဵုက္ဍိုပ်လိက် ကော်ဘိက်သွက်ဒတုဲဖဵုကၟိန်ဍုၚ်ဂှ် ကော်ဘိက်လဝ် ဂကောံရပ်လွဟ်ဂမၠိုၚ် ပါလုပ်သီုကဵု PDF  တအ် သွက်ဂွံပံၚ်တောဲပါလုပ်ကဵု လ္တူဂၠံၚ်တရဴပေါဲရုဲမာဲရ။

စပ်ကဵုဂၠံၚ်တရဴရပ်လွဟ် မမံဂတဝ်ကၠုၚ် ကြဴနူပၞာန်သီအဝဵုတုဲဂှ်တုဲ ကံၚ်ဇြဳပၞာန် သ္ဂးကၠုၚ် တၚ်စၟဳ ဂကောံရပ်လွဟ်ဂမၠိုၚ် ပါလုပ်သီုကဵုဂကောံဒပ်စဵုဒၞါညးဍုၚ်ကွာန် PDF တအ်ဂှ်ဝွံ သွက်ဂွံဒက်ပ္တန်ကၟိန်ဍုၚ်ပံၚ်ကောံ မဒုၚ်သ္ဇိုၚ်ကဵုသၞောတ်ဒဳမဝ်ကရေဇြဳ ကေုာံ ဖေဝ်ဒရာရ။

ဟိုတ်ဂှ်ရ ညံၚ်ကၟိန်ဍုၚ်ပံၚ်ကောံသာ်ဏံ ဂွံမံက်ဂတဝ်ကၠုၚ်ဂှ် စၟဳမၚ်တုဲ ဒတူလိုၚ်အပ္ဍဲဗွိုၚ်သၞောဝ်တုဲ ယဝ်ရေၚ်တၠုၚ်အာ ဒတုဲဖဵုကၟိန်ဍုၚ်၊ ဒတုဲဖဵုဒေသမ္ဂး အလဵုအသဳကၟိန်ဍုၚ် ကေုာံ ဒပ်ပၞာန် ဒုၚ်ဒၟံၚ်တၠုၚ်ရောၚ် ကဵုလဝ်သမ္တီရ။

ယဝ်ရဆန္ဒနွံ သွက်ဂွံပံၚ်တောဲအာ ကုအလဵုအသဳကၟိန်ဍုၚ်၊ ဒပ်ပၞာန်မ္ဂး ကေတ်အဆက် ပညဳပညပ်ကၠုၚ် ဇရေၚ်ဗ္ဒိုပ်ဒပ်မဆေၚ်စပ်ဂမၠိုၚ် ဇရေၚ်သၟိၚ်တၠဒေသတံမာန်ရောၚ် ဂကောံလလောၚ်ပ္တိတ်ပရိုၚ် ကံၚ်ဇြဳပၞာန် လလောၚ်ပ္တိတ်လဝ်ရ။

သဝ်တာဂိုဝ် သ္ကိုပ်ပြုပြေၚ်ပၞာန် ကရောၚ်ပၞာန်ဒဝ်ဏ တိဍာ်ဗျူဟာ ၃၃ ဒေသပၞာန်သၠုၚ်ကျာ PDF ဂှ် အရေဝ်ဒပ်ပၞာန်တံဂှ်တှ်ေ ဒှ်ဒၟံၚ်ညံၚ်ရဴအရေဝ်ဂရိုၚ်တုဲ ညးလဵုမွဲမှ စိုတ်ဟွံလုပ်စတုဲ သွက်ဂွံပြံၚ်လှာဲကၠေံသၞောတ်ဂှ် ဆက်ကၠောန်ဒၟံၚ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“အရေဝ် မၞိဟ်တအ်ဏံ လွဟ်နွံတုဲ ဘပဠဒၟံၚ်နာနာသာ် ဒှ်ဂွံညိသီအဝဵုဂှ်တှ်ေ မးမးရဏောၚ်။ ညံၚ်ရဴမအရေဝ်ဂရိုၚ်ကီုရ။ ဟိုတ်ဂှ်ရ ညးမွဲမှ ဟွံပတှ်ေပုဟ်။ မၞိဟ်လဵုမွဲမှ စိုတ်ဟွံလုပ်စပုဟ်။ ပိုယ်တအ် ဆက်ကၠောန်ဒၟံၚ်ကလောန်ပိုယ်။ ဂွံပြံၚ်လှာဲကၠေံသၞောတ်ဂှ်တှ်ေ ပိုယ်တံသီုညးဖအိုတ် ဒးဆေၚ်မုက် ဒးဗတိုက်ဏောၚ်၊ အာကၟိန်ဍုၚ်ပံၚ်ကောံဖေဝ်ဒရာဏောၚ်ဟီုဂှ် ကောန်ဍုၚ်အရၚ်မံၚ်ဒၟံၚ်ပ္ဍဲဍုၚ်ပိုယ်တအ်ဏံသီုဖအိုတ် ဖျေံလဝ်သန္နိဌာန်တုဲတုဲရ” သာ်ဝွံ သ္ဂးရ။

ကံၚ်ဇြဳပၞာန်ဂှ်တှ်ေ တၚ်ရန်တၟံအလဵုအသဳ၊ ညးဍုၚ်ကွာန်၊ ဒပ်ပၞာန်၊ ဂကောံရပ်လွဟ်ကောန်ဍုၚ်အရၚ် ကေုာံ ဗော်ပရေၚ်ဍုၚ်ကွာန် မဒတူလိုၚ်ဒၟံၚ် ဗွဲမလုပ်သၞောဝ်ဂမၠိုၚ်ဂှ် ဒှ်ပရေၚ်ဒက်ပ္တန်ကၟိန်ဍုၚ်ပံၚ်ကောံ မဒုၚ်သ္ဇိုၚ်ကဵု သၞောဝ်ဒဳမဝ်ကရေဇြဳ ကေုာံ ဖေဝ်ဒရာရောၚ် ဟီုရ။

ပါၚ်ဂၠံၚ် ဂွံဂါံကွာ်အာ ဇရေၚ်ကၟိန်ဍုၚ်ပံၚ်ကောံ မဒုၚ်သ္ဇိုၚ်ကဵုသၞောတ်ဒဳမဝ်ကရေဇြဳ ကေုာံ သၞောတ်ဖေဝ်ဒရာဂှ်ဝွံ ဒှ်ပေါဲရုဲမာဲဒဳမဝ်ကရေဇြဳဗော်ဇဳ ဗၠးၜး ဗဗွဲဓဝ်မွဲရဏောၚ် သာ်ဝွံ တြးလဝ်ဝါဒရ။

ထံက်ရံၚ်ကဵု အပ္ဍဲဒေသ ဟွံညိၚ်ဝတ်၊ ဟိုတ်နူပါလုပ် ပ္ဍဲလၟေၚ်တရဴရပ်လွဟ်တံဂှ်တုဲ မိမကောန်ဇာတ် မသကလောကောဒေံ မ္ဒးဇီုကပိုက်ကဵု ဘဝပရေၚ်မၞိဟ် ပရေၚ်ပိုန်ဒြပ်တံဂှ်တုဲ  စဵုစိုပ်တိုၚ်ပ္ကဴစၟဳစလဝ်ဂှ် ဒးအာစိုပ်မာန်ရောၚ် သ္ဂးရ။

ပရေၚ်ပလေဝ်သၞောဝ်သ္ဇိုၚ်ကၟိန်ဍုၚ် မကိတ်ညဳကဵု ကၟိန်ဍုၚ်ပံၚ်ကောံ မဒုၚ်သ္ဇိုၚ်ကဵုသၞောတ်ဒဳမဝ်ကရေဇြဳ ကေုာံ ဖေဝ်ဒရာတံဂှ်ဝွံ ဆက်သဳကၠဳ ပညဳပညပ်အာ ကုအလဵုအသဳ၊ ကၠတ်ထဝ် မမံက်ဂတဝ်ကၠုၚ် နူပေါဲရုဲမာဲဏံဏောၚ်ဂှ် ထ္မံက်ထ္ၜးလဝ်ရ။

သဝ်တာဂိုဝ်ဂှ်တှ်ေ ၜိုန်ရပေါဲသဳကၠဳဂမၠိုၚ် ရိုဟ်ကၠုၚ်လၟိဟ်ဟွံမာန်ကီုလေဝ် စဵုကဵုတ္ၚဲဏံ မုမွဲမှ ဟွံဒှ်ကၠုၚ်တုဲ အခိၚ်လၟုဟ် ဟီုကၠုၚ် ကု PDF ဂမၠိုၚ် သွက်ဂွံဖျေံလွဟ်ဂှ်ဝွံ အာရာဒနာမိက်ဇရေၚ်ကျာ်ရ ဂွံဏောၚ်ဂှ် ခၠေဝ်ပလန်ကၠုၚ်ရ။

“ဂွံဂွံပရေၚ်ၜိုဟ်လလမ် ထာဝရဂှ် ဗ္တိုက်ကၠေံတၠအဝဵုပၞာန်တံဏံတုဲ တၠအဝဵုပၞာန်တအ်ဏံ ဟွံမွဲမှဟေၚ် ပိုယ်တံ အာပရေၚ်ၜိုဟ်လလမ်ဂွံဏောၚ်။ သာ်လဵုဟီုဟီု အခိၚ်လၟုဟ် မန်ကီု ကရေၚ်ကီု ဗၟာကီု ကောဒေံကောန်ဍုၚ်အရၚ်မဆေၚ်စပ်သီုဖအိုတ် ဒှ်အာမွဲယျ။ ဟိုတ်ဂှ်ရ ဟီုကၠုၚ်ဒၟံၚ် PDF တအ် ဂွံဖျေံလွဟ်ဂှ်တှ်ေ ဒးရာဒနာကေတ် ဇရေၚ်ကျာ်ရဏောၚ်ဂှ် အဲမိက်ဂွံဟီုရ” သာ်ဝွံ သ္ဂးလဝ်ရ။

မွဲလ္ပာ်ဂှ်ပၠန် ပ္ဍဲအရာကော်ဘိက်ကၠုၚ် ဂကောံရပ်လွဟ်ဂမၠိုၚ် ကေုာံ PDF သွက်ဂွံပံၚ်တောဲကဵုပ္ဍဲပေါဲရုဲမာဲဂှ် ကံၚ်ဇြဳပၞာန် စောဲစပ်လဝ် CRPH, NUG နဒဒှ်အလဵုအသဳဂွံဒုၚ်ရုဲစှ် မကေမ်ၛာပ်လဝ်အဝဵုကၟိန်ဍုၚ် ဟွံဗဗွဲကဵုသၞောဝ်ရ။

CRPH ကေုာံ NUG တအ်ဝွံ ကၟာတ်လဒဵုကၠေံ အရာညးတံ မပတိတ်ကၠုၚ်ဇြဟတ် သွက်ဂွံကေမ်ၛာပ်အဝဵုကၟိန်ဍုၚ် နနဲအဓမ္မ ကေုာံ ပရေၚ်လီဠာန်မမာဲဂှ်တုဲ ဆက်ကေတ်လဝ်အဝဵုကၟိန်ဍုၚ်ရောၚ် ထ္မံက်ထ္ၜးလဝ် ပ္ဍဲကဵုဂလာန်ကော်ဘိက်ဂှ် ဂွံဆဵုကေတ်ရ။

စပ်ကဵုပရေၚ်ဏံတုဲ ဥူနေဖုၚ်လာတ် ညးမၞုံအခေါၚ်ဟီုဂး ရုၚ်သ္ကိုပ်ဝန်ဇၞော် အလဵုအသဳညဳသၟဟ်ဂကူ NUG ဂှ် CRPH ကေုာံ NUG ဝွံ ဒုၚ်သ္ဇိုၚ်ကဵုမမာဲညးဍုၚ်ကွာန် အတိုၚ်သွဟ်ပေါဲရုဲမာဲ ၂၀၂၀ ဂှ်တုဲ ဒှ်အလဵုအသဳ ကေုာံ ကၠတ်ထဝ် လုပ်သၞောဝ်ရောၚ် ခၠေဝ်ကၠုၚ်လဝ်ရ။

ကံၚ်ဇြဳပၞာန်ဂှ်တှ်ေ ဒၟါနူ CRPH ကေုာံ NUG တအ် တြးကၠုၚ်ဝါဒတံဂှ်တုဲ ဂၠံၚ်ဟွံဒးကၠေံမွဲသာ် ညံၚ်ဂွံစိုပ်လ္တူဂၠံၚ်တရဴ ဓဝ်ပတှ်ေဇကု၊ တၚ်စၟဳဇကုဂှ် ဒးဆက်ဂါံကွာ်အာရောၚ် သ္ဂးရ။

သ္အာၚ်နူဂှ်ပၠန် ကၠောန်ဗဒှ်ပေါဲရုဲမာဲတုဲ ယဝ်ကၠတ်ထဝ် ကေုာံ အလဵုအသဳဂမၠိုၚ် မံက်ဂတဝ်ကၠုၚ်မ္ဂး ပြဝ CRPH ကေုာံ NUG တအ်ဝွံ ယဝ်ဒစဵုဒစးဒၟံၚ်ကဵု တၚ်စၟဳဇကုတအ်မ္ဂး ဒးပြံၚ်လှာဲကၠေံဂၠံၚ်တရဴမဍာံစၟတ်ဂှ်တုဲ မ္ဒးကွာ်အာဏာၚ် ပါ်ထ္ကးကၠုၚ်ဆီရ။

ဥူနေဖုၚ်လာတ်ဂှ်တှ်ေ လ္ပာ်ဂကောံဇြဟတ်ပၠန်ဂတးတအ် ညံၚ်ဟွံဂွံညဳသာသၟဟ်န်ဂှ် ပါ်ထ္ကးဒၟံၚ်ဆီဏောၚ်တုဲ ဒးညဳသာ သွက်ဒတုဲဖဵုကၟိန်ဍုၚ်ဂှ် ပၟိက်ဇၞော်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ လ္ပာ်ဂကောံဇြဟတ်ပၠန်ဂတးတအ်ဏံ ညံၚ်ဓဝ်ညဳသာ ဟွံဂွံမံက်ဂတဝ်ကၠုၚ်ဂှ် ပါ်ထ္ကးကၠုၚ်ဒၟံၚ် နကဵုနဲကဲနာနာရ။ အဏံတှ်ေ ဂ္စါန်ပါ်ထ္ကးကၠုၚ်ဆီ အကြာ CRPH, NUG, PDF တအ်ဂှ် ဂွံဆဵုကေတ်ရ။ ညအ်ဖအိုတ်ဟွံသေၚ်ပုဟ် ကၠောန်ဒၟံၚ် ပါ်ထ္ကးဒၟံၚ်ဆီ အကြာ NUG, CRPH , ဇြဟတ်ပၠန်ဂတးကောန်ဍုၚ်အရၚ်တံဂှ်လေဝ် နွံရ။ ဂကောံဇြဟတ်ပၠန်ဂတးပိုယ်တအ် ဂွံဗၠးၜးအလုံဍုၚ်မွဲ သွက်ဒတုဲဖဵုကၟိန်ဍုၚ်ပံၚ်ကောံဂှ် ဒးပံၚ်တောဲ ဒးညဳသာဒၟံၚ်ဂှ် ပၟိက်ဇၞော်ရ။ ညအ်ဂှ် ဖေက်ဓဝ်ညဳသာတုဲ ပါ်ထ္ကးဒၟံၚ်ရောၚ်” သာ်ဝွံ သ္ဂးရ။

အခိၚ်လၟုဟ် ကံၚ်ဇြဳပၞာန် ဂွံကၠောန််ဗဒှ်ပေါဲရုဲမာဲဂှ် စိုပ်ဒၟံၚ်တၟာသ္ၚောဲရတုဲ ဗော်ပရေၚ်ဍုၚ်ကွာန် တၚ်ရန်တၟံတုပ် ကုအလဵုအသဳ၊ ဒပ်ပၞာန်တုဲ မလုပ်စိုပ်အာဂၠံၚ်တရဴပေါဲရုဲမာဲဂှ် ၅၄ ဗော် နွံရောၚ် ကဵုလဝ်သမ္တီရ။

ပ္ဍဲအကာဲအရာဒှ်မံၚ်သာ်ဏံဂှ် ယဝ်ဆက်ဂါံကွာ်အာ ဂၠံၚ်တရဴရပ်လွဟ်မ္ဂး ဒှ်ဖဵုသွက်ကၟိန်ဍုၚ်ဟွံသေၚ် ဒှ်သဘဴဆုတ်ကလေၚ်အာဒၟံၚ်ဏောၚ်တုဲ အရာမဒးဆောံလေၚ်လဝ်ဒဳမဝ်ကရေဇြဳ ဟိုတ်နူပရေၚ်သီအဝဵုဂှ် ကံၚ်ဇြဳပၞာန် ပပၞဟွံတီတုဲ  ဟီုဏာလဝ် ပ္ဍဲဂလာန်ကော်ဘိက်ဂှ်ရ။

ကြဴနူဒပ်ပၞာန် ကလေၚ်သီကေတ် အဝဵုကၟိန်ဍုၚ်မွဲဝါပၠန်တုဲဂှ် ကု NUG, CRPH ကေုာံ ဒပ်ပၞာန်စဵုဒၞါညးဍုၚ်ကွာန် PDF တအ်ဂှ် ကံၚ်ဇြဳပၞာန် လလောၚ်တြးလဝ် နဒဒှ်ဂကောံပကီုပရာပ်ရ။

လအာတုပ်သာ်ဂှ်ကီု ဂကောံဇြဟတ်ပၠန်ဂတးတအ်ဂှ်လေဝ် ကံၚ်ဇြဳပၞာန် လလောၚ်တြးလဝ် နဒဒှ်ဂကောံပကီုပရာပ်ကီုရ။

ပရိုၚ်−သြၚ်လောန်တိုၚ်(မ်)

ဗီုရုပ်−MOI